4年á以來, góa lóng teh過無siáⁿ動力ê生活, chìn前góa有真chē理想想beh做, m̄-koh góa soah kā góa ê生活重心khǹg tī考試 iah是其他tāi-chì頂頭, 到beh出業ê時, soah感覺ka-tī已經脫離社團kap運動ê實踐.
舊年參加生活營, góa得tio̍h真chē, mā改變ka-tī原本ê chi̍t-kóa觀念, hō͘ góa對社會充滿希望kap生活動力.
舊年生活營看tio̍h Taⁿ-bí-kheⁿ ê社區總體營造, 引起góa對社區改造ê注意, mā想過社區改造kám有可能tī ka-tī ê所在做--出-來.
Chit pái生活營, 看tio̍h社區營造對Pi-thâu-pòe ê改變, 原來雲林mā ē-sái做社區營造, m̄是góa印象ê sàn庄.
Tòe林--先-生走2工Pi-thâu社區, 看tio̍h chiok chē古厝, 聽tio̍h chiok chē故事. 林--先-生雖bóng m̄是在地出世--ê, m̄-koh i對tòa ê所在chiah-nī-á了解, 對chia ê mi̍h件kap故事chiâⁿ珍惜, koh講:「是beh做20冬ê社區營造, chín chiah是開始niâ!」
Góa tī Ba̍k-sa讀4冬冊, Ba̍k-sa kan-taⁿ是góa寄tòa ê所在, hia ê歷史kap人文, góa lóng無了解, góa ê真chē同學mā lóng是án-ne. Góa感覺真phah損. 4冬來, góa無好好á了解Ba̍k-sa, soah tō beh出業--a.
Koh來, góa tō beh tńg高雄食頭路, góa ǹg望ka-tī ē-sái對ka-tī ê所在有tām-po̍h-á貢獻. Góa想beh tī góa khang-khòe以外ê時間, tī góan tau附近ê老人活動中心教英語, iah是辦讀冊會, mā趁機會聽hia ê老人講 in ê生活經驗. Góa mā想beh tī ka-tī tòa ê所在做chi̍t-kóa tāi-chì.
Góa koh iáu-bōe有完整ê想法, m̄-koh chit pái tńg高雄, ē-sái好好á想看māi--leh. Góa想, góa koh beh chhōe-tio̍h生活ê動力--a, 生活營真正chán!
◎第8屆台語生活營(2004/6/26-30)專刊
留言列表
