1.「中華民國」chit ê名有iáⁿ真害, España (西班牙) ê庄kha所在, 有ê人根本m̄-bat聽過「台灣」, hit工góa去到Ronda, 1 ê tī Andalucia ê山城, ho͘-thé-luh (hotel) ê人chhím看tio̍h góa ê護照頂頭國籍寫做「Republic of China」, tō tī ho͘-thé-luh ê名簿kā góa ê nacionalidad (國籍)登記做「China」, góa kā講寫了m̄-tio̍h--去-a, 應該是「Taiwan」, nah知i真頂真直直比護照頂頭講「Chi-na...Chi-na...」(Español ê英語無講kài通, in有iáⁿ ka China讀做支那), góa是hō͘氣kah beh死, m̄-koh護照ê nationality明明tō án-ne寫, khah講mā講bē hoan-chhia.
2. España西北部是Catalonya地區, in用ka-tī ê語言Catalan來做官方語言, tī街路頂ê號頭, iah是tī餐廳內底ê菜單, lóng用Catalan來寫, 雖bóng Catalan kap Castellano (一般講ê Spanish西班牙語)真sio-siâng, 有ê字kan-taⁿ增差1~2 ê字母niā-tiāⁿ, m̄-koh tī khah大ê車頭等等, in猶原kā 2種語文lóng寫--出-來(有時chūn koh ke寫第3種語文─英文), koh是Catalan寫tī頭前/頂頭, Castellano寫tī後piah/ē-kha, tī Bacelona siōng大ê美術館Palau Nacional內底, góa看tio̍h 1份印kah真súi ê展覽說明, 甚至分做Catalan語kap Castellano語印做2份, hō͘ góa看--tio̍h真感慨, 台灣惡質ê語言環境kap母語ê危機, tī hia看--起-來koh ke真清楚.
3. España有4種官方語言, tī中部kap南部用Castellano (一般teh講ê Spanish), 北部有1 ê地區是Basque, 西北是Garlician (kap Portugal葡萄牙語khah sêng), 東北是Catalan, tī無kāng地區, in lóng用ka-tī ê語言來寫官方ê文書, 街á路ê號頭, 文學ê創作等等, Castellano m̄是in唯一ê官方/文學語言.
留言列表