Chit 1工, 台北落雨天, koh濕koh冷. M̄-koh iáu是有chiok chē父母chhōa gín-á行街頭, 有ê家庭全家出動, mā有ma-ma ka-tī嚴重感冒koh chhōa 3 ê gín-á來參加, 有ê ma-ma ná行ná飼gín-á suh奶, 有ê kā幼eⁿ-á āiⁿ--leh抱--leh, koh有chiok chē chiok chē細hàn gín-á坐sak車á, iah是騎腳踏車, pushbike, 甚至用步lián--ê行全程, 宣示廢核ê主張, ǹg望ē-tàng tī無核電威脅ê環境--nih平安健康大hàn.
做人父母對gín-á siōng基本ê ǹg望tō是ē-tàng平安健康大hàn, m̄-koh chit ê ǹg望soah不時受tio̍h威脅, 其中siōng大ê威脅tō是台灣有4座核電廠. 台電為tio̍h減少核廢料ê量, tī核電廠燒核廢料, tòe leh飛去空氣中ê輻射, hō͘台灣空氣中ê輻射量phēng有核災ê日本koh-khah koân. Khǹg tī核電廠內底ê核廢料bē-su無定時炸彈, chiah-ê核廢料beh án-chóaⁿ處理, 到taⁿ iáu無châi-tiāu解決. 台灣若發生核災, 人民beh án-chóaⁿ避難, 政府ē án-chóaⁿ應變, ē-sái講完全bē ǹg望--chit. 台鐵1 pái事故tō無châi-tiāu疏開旅客--a, koh-khah免講若台北發生核災, beh án-chóaⁿ疏開人民去中南部避難?時到tō是無政府狀態--a.
1項mi̍h-kiāⁿ koh-khah便利, i ê影響kap威脅若是無châi-tiāu解決, koh-khah好用mā是無kha-choa̍h, koh再講台灣有chiok好ê條件thang發展綠色能源, 核電m̄是無thang替代.
核電ê bái--處, 替代方案, chiah-ê環保團體kap學者專家, 有研究ê人lóng講chiok chē--a, 是án-chóaⁿ政府iáu是無chùn無būn, 堅持核能發展ê政策? Che後piah牽涉ê利益siuⁿ過頭大, 大kah做官--ê ē-sái am-khàm資訊, 講pe̍h-chha̍t, kā台灣人ê性命安全裝siáu--ê. Kap chit款政府有影m̄是講道理, ē-tit-thang照phín照行--ê, lán tio̍h聚集koh-khah大ê社會力量, chiah有thang改變現狀.
核電廠若爆炸, 空氣, 水, 土地, 植物, 動物, lán ê chia̍h-mi̍h, 全面性lóng ē受tio̍h輻射污染, lán ē破病, bē-tàng koh自由自在tī外口sńg, 甚至ài離開khiā起ê所在, kap朋友分開, 對大人gín-á來講, 是siōng大ê威脅kap驚惶. 大人kā gín-á講chiah-ê, chhōa in行街頭反核, m̄是beh製造gín-á ê驚惶, 輻射看bē tio̍h mā phīⁿ無, m̄-koh chiah-ê威脅kap驚惶是確實存在--ê, mā是做人父母chiok大ê不安, hō͘ góa m̄知beh án-chóaⁿ面對i, kā i講是án-chóaⁿ lán ē-tàng容允起核電廠, 無kā擋--落-來.