「Phia̍k! Phia̍k!」「Kán! Nah會點bē to̍h?」風有夠透, 前幾工iáu teh出大炎日, 今á日soah變天, 烏陰gah落bi-bi-á雨, m̄知leh kôaⁿ siáⁿ-mih意思--ê?
「Phòng!」火to̍h--起-來-a, bē記ê he是「九五」--ê, lài-tah uh--起-lih就會sái--a, liam-mi-á 『陳水扁』3字已經烏mì-mà看lóng無--a.
Hiah-nī大ê廣場, to̍h這pha火, 真緊就kho͘ chiok chē人óa--過-來, ta̍k-ê lóng chiok好玄--ê, 探頭問講:「Ah是teh燒sáⁿ?」有人keh-sī góan teh燒hit-tīn China人ê mi̍h-kiāⁿ, tòe leh chhoh, iân-nā khian mi̍h-kiāⁿ落去燒.
這chūn, 有人認出he是『扁帽』, 外kho͘圍koh有1個大kho͘--ê teh hoah:『怎麼有人在燒民進黨的東西』, 群眾聽著這句話soah起phùi面:「Kā phah hō͘ hoa--lah, nah會teh燒Chhiân-sùi-piàn(陳水扁) ê帽á? 是燒m̄-tio̍h nih.....ah, 這tīn人是頭殼pháiⁿ--去o͘?」
這款聲一直ùi外口溢--入-來, chham像海水kāng款, 我ná像hō͘ 1 kho͘ koh 1 kho͘ ê湧束tiâu--ê, tiām-tiām m̄知beh án-chóaⁿ, 目chiu無神, bē tín bē動, 耳孔邊phi̍h-pho̍k跳ê心跳聲竟然聽gah hiah-nī清楚, TOUCH著心內ê驚惶, 我擋bē-tiâu--a.
Khiā tiàm hit-pha火邊--á ê少年家, 用嚷--ê kā 1個o͘-bá-sáng講:「你去hō͘陳水扁騙--去-a-lah, i根本就無法tō͘ kā China民國ián--倒!」
Góan ê應話hō͘群眾koh khah lia̍h狂, 愈聽愈心光火熱, 性地lóng giâ--起-來-a, 賴góan是青瞑á黨--ê, hoah-hiu ê聲愈來愈chē, 愈來愈chē人óa--來, ta̍k-ê khi-mó͘-chih lóng chiâⁿ bái.
Góan是臨時臨iāu想beh án-ne創--ê, 根本就無想著會pìⁿ-chiâⁿ án-ne, 勢面愈來愈bái, 若有sió-khóa無tú好, hōan-sè kui-tīn人就會phah--起-來.
Góan這pêng有人chiok大聲kā群眾應:「就是陳水扁teh thún-ta̍h台灣人--ê-lah!」
群眾起siáu--a, chhi̍h過TS身軀邊去, 用枴á kā tǹg, koh kā塗kha ê火póe向TS, TS ōan-nā真火大, mā kā sak胸坎, 愈來愈chē人chiⁿ óa--來, 想beh cheng góan ê人.
這chūn我應該ài過去挺ka-tī人chiah tio̍h, 我行向TS, 這tia̍p, 我soah m̄敢iah是m̄知beh án-chóaⁿ óa--過-去, kui個世界ná像lóng停--起-來-a, tiām gah連1枝針lak落塗kha都聽會著. 我無法tō͘忍受ka-tī這個樣相, 愈急愈行bē出--去, 手--nih ê lok-á kōaⁿ愈ân....
衝突愈來愈大, ka-chài A昭兄tú-á好經過, 過來擋群眾, hoah講góan m̄是反台灣人, kan-taⁿ是對Chhiân-sùi-piàn無滿意, góan ê人mā緊離開現場, tāi-chì chiah án-ne煞戲.
M̄-koh, 我ê心肝頭iáu未結束, tú-chiah ê每1個畫面, tī我頭殼內用『停格』ê方式一直放送--出-來──TS ê反駁, hit-pha火冷冷á笑, iáu koh有我心內ê驚惶....
尾--á ta̍k-ê相招去北投洗溫泉, lim酒, 看電視, 我lóng teh麻痺ka-tī, hiah-ê畫面猶原一直放送無停khùn, 我ê不安, 驚惶kap懷疑mā愈來愈重. Tú離開現場ê時, 我甚至m̄敢看TS, 做兄弟--ê無kā相挺, 我算siáⁿ-mih! 連che都m̄敢, 我會tàng keng jōa久?
平常時á坐tiàm教室--nih, 講lán ài反體制, ài kap惡質ê勢力對抗, 經過這層tāi-chì, hō͘我知影: 親身體會著個人價值觀崩--去, che bē jōa困難, koh khah大ê挑戰, 是beh án-chóaⁿ用行動實踐理論!
這個體制hiah-nī-á chāi, lán kám有決心kap意志堅持--落-去? 體制像銅牆鐵壁, 真pháiⁿ kā hàiⁿ tín動, 反抗ê決心若無夠, 恐驚ê顛倒會懷疑ka-tī存在ê意義.
Tī hit-pha火內底, 我看著góan ê熱情, mā看著透風當中群眾ê冷淡kap無奈, hit-pha火猶原無才調kā群眾hoah cheng-sîn.
我tiām-tiām看著hoah-hiu, 相khiú, chhoh-kàn-kiāu, 一切ná像lóng停tī hia, 像電影『駭客任務』ê攝影技巧, gāng--去-a, 精神ê超脫m̄是簡單tāi, 肉體承受ê疼chiah是正港ê疼, m̄-koh我mā知影, m̄管án-chóaⁿ, lán bē-tàng ut-chut, mā bē-tàng失志.
留言列表