台灣組合

Kiàn-nā pōng tio̍h選舉beh kap中國黨sio-kiat,「維新」ê口號tō koh hō͘人hiau出來liān.

Siáⁿ-mih是「維新」? Tī台灣, ta̍k-ê teh強調明治政府kā國家變強變hó-gia̍h. 關係日本幕末維新ê歷史, 台灣人kan-taⁿ知影伊藤博文, 福澤諭吉, ke̍k-ke koh聽過坂本龍馬, kā明治維新講kah chhùi角全pho, soah m̄知影29歲tō hō͘幕府(Bakufu)判死刑ê吉田松陰主張「草莽崛起」, 伊藤博文是吉田ê學生內底siōng han-bān, siōng投機--ê, 第一流ê勇將早tō lóng戰死--a. 台灣人koh-khah無想beh知--ê是, 明治政府thang好成功, 是hit當時日本下層武士為tio̍h走chhōe民族ê出路, 用性命piàⁿ--出-來.

Kyushu (九州) ê Satsuma (薩摩)武士是維新成功siōng重要ê力量, 西鄉隆盛kap大久保利通是Satsuma武士成就大事ê核心者. 下層武士出身ê西鄉隆盛是án-chóaⁿ ē pìⁿ做hit-tang-chūn日本不滿武士ê精神領袖? 是siáⁿ款ê思想kap意志, hō͘ in成功kā幕府kiat-tó? In ián-tó幕府ê統治chìn前, 有付出siáⁿ款ê代價?

創建明治政府siōng大ê功勞者是西鄉隆盛, 新政府成立, i無法度忍受新政府內底hiah-ê官僚, 奸商kap投機者, 辭官tńg Kagoshima (鹿兒島), 軍隊內底大部份Satsuma武士mā kui-tīn tòe i辭官tńg故鄉. 西鄉sàng無beh反明治政府, i kan-taⁿ想beh kā Satsuma武士安tah--落-來, 維持in ê武士精神, thèng-hāu新政府無法度hō͘天下順服, iah是外國勢力威脅日本國生存ê時, i tōē chhōa Satsuma武士出面, beh tī徹底毀壞ê土地產生出新ê日本人.

M̄-koh新政府無法度容允西鄉sàng kap Satsuma武士, 終其尾西鄉sàng為tio̍h boài放棄chiah-ê武士, chhōa in chò-hóe造反(西南戰爭), chit場挑戰新政府權威soah koh無phah-sǹg beh戰贏ê戰爭, 結束日本武士ê時代, kā不滿政府ê武士力量ê Satsuma武士chò-hóe chhōa ǹg死亡, hō͘明治政府thèng好鞏固--落-來.

革命像風颱, lí看ē tio̍h i形成, 壯大, chông tùi lí chia來, 破壞lí sì-kho͘-liàn-tńg ê一切, m̄-koh lí無châi-tiāu阻擋. 革命像風颱kāng款, 有組織, 有路線, m̄-koh lí無法度創造革命, lí kan-taⁿ ē-tàng thèng-hāu.

3--月ê日頭花kap洪仲丘事件是西北雨, 落bē過田岸, 有ê人m̄-bat hō͘社運ê西北雨ak--過, tō講che是革命, 實在是teh講笑詼.

社運西北雨無像風颱hiah-nī有組織, 有方向, kan-taⁿ ē tī無特定ê所在hiông-hiông出現, koh hiông-hiông消失, kan-taⁿ thang暫時hō͘社會止chhùi-ta.

Kúi-nā冬前ê野百合是人造雨, 1場完全受控制來滿足少數權力者需要ê人造雨, 根本無值得chùn-būn.

1團koh 1團ê社運團體發動ê 1場koh 1場ê街頭抗爭示威, 是1場koh 1場失敗ê人造雨, 成分總是hut bē清楚, sì-kè làu人, 氣身ló͘命, soah hām 1 pû鳥á屎to pàng bē出--來.

Piān-nā到「決戰ê關鍵」, ta̍k-ê to lóng ē顧慮「事後算siàu」(無論是內場iah外場), m̄-chiah ē jú來jú無人beh開路, 衝頭1 ê. Chit-má內場做頭ê壓力已經大kah接受採訪ê時, 講tio̍h學生安全tō目屎liàn--落-來.

24冬過--去-a, 台灣ê反對運動iáu kāng款停留tī「議會路線」kap「街頭路線」teh kà力, 增差tī統治者kap抗爭者, 雙方ê手段kap表面工夫lóng做kah koh-khah iù-lō͘. 簡單講, 統治者kā「吞忍」(boài回應, boài鎮壓) ê siáu鬼á殼, khah早ê老1輩mài講蔣經國, 連李登輝時代to lóng真正動手鎮壓, 統治者chiah-nī iù-lō͘ ê處理手路, 是ùi陳水扁時代開始--ê.

街頭抗爭者, beh衝ê「衝組」早tō老--ê老, chheh心--ê chheh心, 無人beh衝第1線。頂pái陳雲林ê圓山對chhiâng tō chiok明顯, 現場kui堆人chi̍t看tō知影是「衝組」--ê, m̄-koh tō是欠頭1 ê人第1 chhèng ê煽動.

Chiah ē chit-má ê學生抗議(連學運tō無算, 因為無平常時校內基層組織kap思想武裝, koh-khah免講學校之間ê聯合運作), tō kan-taⁿ ē-tàng利用「公民運動」來擴大參與面, 來衝人數, 拚氣魄! M̄-koh有chi̍t-kóa同學當然mā敢衝, 若無chit-pái mā無法度衝入去立法院.

「公民活動」一定有i ê作用, 踏出chit步總比bih tī厝內iah是新聞kap網路khah好. 嘉年華會式ê遊行sui-bóng真弱, m̄-koh同時mā hō͘ 統治者ê武裝hām心防弱化.

5--月是民進黨進行2年1 pái ê黨內黨職選舉, 今年因為年底ê七合一大選, koh本屆黨職(中央) ē-tàng決定2016年總統kap立委ê提名方式, 競爭khah激烈. 今年年頭有chi̍t-kóa所在ê黨員人數hiông-hiông大量增加, tō ná選舉ê幽靈人口kāng款, hiông-hiông出現, 投票了tō koh無--去, 一直到後pái ê投票若有需要, chiah koh la̍p 1 pái 2冬ê黨費, che tō是民進黨hō͘人keng-thé ê人頭黨員問題.

民進黨beh解決人頭黨員, 是先解散派系, 初選採取民調, ta̍k冬ê黨費繳納通知單統一寄去戶籍住所, 黨員tio̍h ka-tī去la̍p-chîⁿ, kioh是án-ne ē-sái解決人頭大戶統一la̍p-chîⁿ ê問題. 結果頂頭有政策, 下底有對策, 黨員大戶若kap地方黨部主委kāng派系, 關係好, iáu是thang直接到黨部統一la̍p-chîⁿ (tī黨部tō ē-tit-thang直接印通知單la̍p-chîⁿ), 問題iû-goân無解決.

人頭黨員其實m̄是造chiâⁿ民進黨cháu-chengê原因, koh-khah害--ê是, 為tio̍h解決人頭黨員所進行ê各種方案chiah是真正cháu-chengê主因. 1 ê基層代表有100-200 ê thiāu-á-kha是chiok sù-siông--ê, m̄-koh解決人頭黨員ê改革方案soah kā基層代表培養基層黨務人員ê必要性消除掉, 親像取消黨員初選ê權益, 改用全民調, 造成基層欠人經營, 只要甘khai-chîⁿ, 透過媒體造勢tō有夠, 無代表願意tī基層栽培新人, 橫直若有chîⁿ ē-hiáu造勢, siōng重要--ê是tòe有tio̍h人, beh tī黨內sa tio̍h參政權tō ná像桌頂ni柑hiah-nī簡單. 過去國民黨beh參選黨職, tio̍h-ài有資產kap借貸證明, chiah有參選資格, 除了有chîⁿ買票, koh ài ē-tàng控制.

Chiah ē現此時民進黨基層lóng是chi̍t-kóa無頭殼, kan-taⁿ ē-hiáu liam-hiuⁿ ê代表, ē-sái講是1代不如1代. 黨內ê人頭hoàn-á kan-taⁿ chhun黨內ê黨職選舉有利頭, 造chiâⁿ黨職ê選舉tō kap國民黨選舉買票kāng款lah-sap, mā hō͘ 民進黨pìⁿ做是有chîⁿ無理想, 投機炒短線ê人出頭ê現象, 理想性jú來jú消風--去.

有chi̍t-kóa號稱入黨chē年ê老黨員, 本底應該是支持民主進步ê觀念, soah pìⁿ做人頭hoàn-á, 為tio̍h利益支持hit-kóa號稱無黨籍, 從政過程ta̍k ê重要決定lóng選擇khiā tī人民ê對立面, 也tō是óa過有資源有黨產ê國民黨, hō͘ chit款人來領導/敗壞kap i個人無chi̍t-sut-á關係ê民進黨.

Chit-pái ê學運góa無去過現場, 對現場ê觀察góa無siáⁿ意見, góa想tio̍h khah早ê chi̍t-kóa運動, lán來看chiah-ê運動有siáⁿ成果?

農民運動tī當年ê 520氣勢chhèng到siōng koân, m̄-koh結果--leh? 農民ê困境到taⁿ iáu無解決.

野百合學運kap李登輝sai-kong-á siūⁿ-poe配合廢掉萬年國會, m̄-koh台灣人kám有án-ne tō有減輕飼豬ê負擔?

總統直選爽tio̍h政客, 選民kioh是ē-sái用選票選總統tō是做主人--a, sió-khóa爽--chi̍t-ē niâ, siōng爽--ê是中華民國, 統治台灣ê正當性大大增加, 連寫過台灣國憲法草案ê許世楷to同意中華民國統治台灣ê合法性. 鄭南榕因為刊許世楷ê憲法草案hō͘國民黨追殺, 當年i無應該自焚, 若死無去應該ē去thâi許世楷.

公投法, 教育改革等等kui大堆ê社運, 一直到chit-pái ê日頭花, lán到底成就siáⁿ-mih? Lán kan-taⁿ成就kui tho͘-lá-kuh ê政客, in臭彈講che tō號做民主, in叫lán tǹg票hō͘ in入去議會kap國民黨chhia-piàⁿ, in有影是piàⁿ贏--a, 國民黨lim輸in, in kan-taⁿ piàⁿ酒niâ, 因為che是真無簡單chiah有ê台灣民主, bē-sái phah人.

50萬「公民」khiā--出-來了後, koh來--leh?

反服務貿易協議chit場已經進行10月日ê運動, tī 3月18少年世代主導ê「佔領立法院」行動了後, hō͘全台灣看tio̍h chit ê議題, 3月23「佔領行政院」行動kā kui-ê社會lóng khiú入來chit場抗爭ê爭論--nih.

Chit場運動一直強調「堅持到底」ê決心, m̄-koh總--是看出步調混亂, 戰略思想, 政治操作, 媒體操作kap行動操作lóng lām-lām做kāng 1 ê層次. 3月21, 批判馬英九政權已經失去統治ê正當性了後, 續接提出ê訴求soah是「要求對話」; 無充分ê計畫為tio̍h beh分散壓力, hoah出「各地包圍國民黨黨部」. 過1禮拜了後ê訴求是「罷課, 罷工」; 50萬人chiūⁿ街頭了後, soah無châi-tiāu hō͘統治者具體ê壓力, sûi koh退tńg去「和平理性, 無限期佔領」ê模式. 兩岸協議監督條例若成功立法, 未來lán beh抵制中國統戰, 顛倒是ka-tī tok腳tok手; 呼召人民議會ê行動了後, tō kan-taⁿ是beh hō͘行政kap立法部門重視人民ê要求?

組織, 領導社會運動ê社運團體升級做「專業」ê「NGO」iah是「公民團體」ê過程, tī專業ê分析, 專業ê流程, 專業ê分工, 專業ê活動安排思考操作--nih, 抗爭ê集體意義pìⁿ做集體siau-tháu ê表演, 抗爭ê形式tio̍h配合媒體ê khùi口, 人民群眾mā ta̍uh-ta̍uh-á pìⁿ做「被動員」ê工具性iah是功能性ê角色, kan-taⁿ是配合戲齣演出ê活道具, 人民群眾ê意志tio̍h-ài服從決策中心ê「規格化」要求.

1906年Rosa Luxemburg tī德國社會民主黨(SPD) ê大會, 大聲批判SPD內底ê機會主義派, 批判in kā罷工當做1支刀á, tio̍h看in歡喜iah是照in ê需要, 決定kā刀á收入去lak袋á避免萬一, iah是poe̍h--開sa出來用. Chit-tang-chūn台灣反體制人民群眾ê熱情kap憤怒, kám m̄是tō hō͘頭人án-ne teh看待?

前kúi工á tī報紙面頂看tio̍h施明德寫了1篇文章, 題目是〈英靈kap冤魂〉, i寫講, 北京kā tī台灣因為支持共產黨soah hō͘中華民國統治集團chhèng-sat ê人, chhāi 1支「無名英雄碑」, 施明德看過chiah-ê人hông chhèng-sat chìn前大聲hoah「共產黨萬歲」, 北京替chiah-ê人chhāi石碑記念, ná像chiâⁿ受tio̍h施明德肯定.

M̄-koh góa soah感覺有問題, 問題tō是: 當年hō͘中華民國統治集團chhèng-sat ê人, 大部份lóng有名有姓, 查hō͘清楚chiah chhāi碑, kā名刻--起-lih chiah tio̍h ā, 是án-chóaⁿ北京無án-ne做? 政治現實, chhāi記念碑是teh應付niâ, 中國共產黨早tō無需要chiah-ê人ê故事來做政治宣傳--loh!

施明德chit篇文章另外1段講--tio̍h, i講i親目chiu看tio̍h 228事件台灣人主動參與反抗軍隊來戰死, 所以i對228受難家屬一直提出質疑, 是án-chóaⁿ kā受難者講做是冤枉死--ê, thang好去領補償金?

Góa ka-tī mā bat寫過chit款ê文章, 提出chit款質疑當然是應該--ê, m̄-koh真怪奇, 是án-chóaⁿ施明德kan-taⁿ質疑228受難家屬, 是án-chóaⁿ無去質疑美麗島事件i hit-kóa同志? 是án-chóaⁿ無質疑i ka-tī認中華民國chit ê賊做父? 施明德siōng愛講「權力hō͘人腐化」, m̄-koh 228受難家屬無掌握權力, 是án-chóaⁿ mā腐化--a?

Góa認為, 體制hō͘人腐化, 腐化ê人kan-taⁿ ē kéng符合ka-tī需要--ê去做, 北京是án-ne, 228 hit-kóa衰尾道人ê後代mā án-ne, 施明德tō koh-khah m̄免góa koh ke講--a.

「今日拆大埔，明天拆政府」已儼然成為對執政者宣洩不滿的代名詞，事實上早已被人遺忘的1989年新竹市的濱海路拓寬工程案，較之大埔案實有過之而無不及，更凸顯了民進黨派系矛盾的角色，因此民進黨新潮流系賴清德市長針對南鐵東移的的自清動作，在識者眼中實不值一駁。

新竹市的濱海路拓寬工程，原本計畫從當時的冠軍食品股份有限公司攔腰而過，當時的執政者圖利廠商，變更設計路線改採截直取彎，因此必須拆除民房數十戶。被拆戶委以重任的民進黨新潮流系的中央委員吳秋穀市議員於拆除當天不知去向，沒有在現場出現，甚至連拆除的時間也沒告知拆遷戶，就神隱而去，致使抗爭戶失去了抵抗的先期準備先機，所以濱海路自救會也因此質疑其中似有對價關係。

當時的執政者也是耍了調虎離山的小手段才完成拆屋，執政者先放出消息稱，拆除大隊已從濱海路南端朝北挺進中，因此拆遷戶出動大批聲援者堵在濱海路南端的路口，企圖阻止拆除大隊的拆除動作。詎料就在現場人員空虛之際，大批的拆除人員在警方護送之下，突然從濱海路的北端蜂擁進入現場，所以房子在受害戶未及回防，僅存微弱的力量抵抗下，房子被夷為平地了。

濱海路拆除案之鴨霸，較之大埔案實有過之，當時現場維安的是從中央抽調專為鎮暴的保四總隊，護衛著拆除大隊人員，強行進入民宅清空住戶，因此當時就有婦女指控，警方用警棍戳其胸部，且在人員與家具尚未清空時，怪手就發動，將房子鏟倒，致發生未即離開的老人掛在危樓上的情形。

即時趕到的民進黨新科立委柯建銘因為尚不懂政治權謀的運用，竟然「真的動手」與警方發生拉扯，致手受傷嚴重，血流如注，使得現場所有記者與抗爭戶莫不感動莫名。當時柯建銘屬新科立委，但是競選時在新竹市被新潮流與美麗島系排斥，所以進入立法院後選擇加入福利國連線，並在經過自我肯定與學習中「成長、茁壯」，也才有今日的「柯總召」。

我們台灣至今還不是一個獨立自主的國家，台灣人當然沒有什麼人權可言。

軍公教退休，每年18%優惠利率吸收我們血汗超過800億，外加1.5個月的年終慰問金、三節慰問金及子女教育補助等三大福利，又吞食了232億。公立銀行退休者的13%優惠利率再搶走40億。四、五十萬退休者平均每人每年領走近百萬元退休金；若以退休40年計，每人可領走兩千萬至四千萬。

65歲以上老人靠退休金、撫卹金及保險給付的「外省人」佔47.3%，台灣人只佔6.7%；主要依靠子女奉養的台灣人佔54.6%，「外省人」則只有19.4%。

中央政府的上層主管，藍色的佔50~80%；台大學生中，台灣人只佔50%（1991年）。這就是為什麼兩千萬台灣人被兩百萬「外省人」統治68年，仍在受苦受難的原因。（請參考劉重義、李逢春《革命運動研究》，前衛出版社，2006）

基本人權在台灣是國民黨的恩賜，1987年解嚴前，台灣有14~20萬名政治犯。言論自由在台灣仍被當局嚴控。1989年鄭南榕為追求「百分之百的言論自由」而自焚；1990年11月，黃華第四度因「言論叛亂」而坐牢。

Ta̍k冬lán-lâng 3--月ê「迎媽祖」, 已經chiâⁿ做台灣民間民俗慶典ê大tāi-chì, tī台灣ûn境割香iáu無夠, chit-má koh siáu kah tùi無神論ê中國去, beh ùi中國請關公來台灣ûn境. 先mài講據在民間利用神明連結兩岸一體ê政治操作, kan-taⁿ講kā神像kap信徒chhōa去無神論ê國家, 進行信仰ê朝聖行為, chit ê現象本身tō hàm kah有chhun.

過去台中大甲鎮瀾宮去北港朝天宮, tńg大甲路--nih經過彰化chit段, 總--是ē發生「搶轎」ê事件. Éng-kòe khah chē是地方角頭為tio̍h搶地頭來搶轎, lō͘尾soah連地方法院mā來半途「cha̍h轎」koh跪koh拜, 無論是beh求ka-tī官位jú做jú大, iah是sa媽祖保佑kap彰顯公義做藉口, 實在lóng hō͘ lán感覺siuⁿ過hàm-kó͘. 司法機關無強調獨立kap公正ê辦案精神, soah來拜神拜佛, chiah-nī迷信ê hàm-kó͘顛倒是破壞機關ê形象; 一般大眾對司法本底tō chiâⁿ無信任, 普遍認為法院有chîⁿ判生, 無chîⁿ判死, chit-má法院ê執法官cha̍h轎拜媽祖, 是beh kā人民宣示講m̄-nā ài「chîⁿ」, koh tio̍h靠chē-chē好運? 拜神chiah thang好求tio̍h好運?

法院ê hàm-kó͘開先例, 縣政府為tio̍h選舉, mā kā縣內ê媽祖廟lóng聯合--起-來, ta̍k冬辦媽祖ûn境, hō͘ koh-khah chē人nǹg轎腳, 學校koh叫學生排隊chò-hóe nǹg, 有學生nǹg過轎腳了後, 講ǹg望媽祖保庇考試ē-tàng 100分, 學校ê課本kám m̄是教lán ài phah-piàⁿ chiah有好收成? Chit-má nah ē pìⁿ做拜神nǹg轎腳來求好成績--leh?

政客利用宗教bú選舉, 教育者soah mā tòe leh khí-tâng, che是siáⁿ-mih款ê信仰? 是siáⁿ-mih款ê教育? Tī民間風俗, 若有人吊tāu自殺ē送肉粽, 表示kā lah-sap-mi̍h kap怨氣送出海, 傳說講送肉粽ê隊伍經過ê所在ē有lah-sap-khùi, khah強ngē ê庄頭tō ē要求隊伍se̍h路bē-tàng入庄, 學校mā ē宣佈叫學生hit ê時chūn m̄-thang出門, tio̍h tiàm tī厝內, 大門kap窗á mā tio̍h關hō͘ ân. 舊年有人tī道東書院內底吊tāu自殺, 道東書院tō kap鎮公所chò-hóe主辦送肉粽, 結果iáu是有庄頭ngē boài hō͘隊伍經過. 道東書院是過去ê漢學堂, 是傳授智識ê所在, chit-má soah chhōa頭teh傳播迷信.

最近國民黨ê林益世, 李朝卿kap賴素如chiah-ê人因為o͘-se案件hông收押, 交保了後第1件tāi-chì tō是hāⁿ火爐去pháiⁿ運, 犯錯kám m̄是ài檢討? Nah ē pìⁿ做teh怨嘆ka-tī無夠好運, beh緊kā pháiⁿ運勢hò͘走, kám講若求神拜佛得tio̍h好運勢, tō thèng好為非sám做?

牛奶粉有毒, 牛肉有毒, 豬肉有毒, 米有毒, 麵粉mā有毒, kui-khì講真hán tit有無毒ê chia̍h-mi̍h. 討海人出海lia̍h魚ē hông扣船甚至hông thâi, beh哭無目屎. Tī hiah-nī chē社會事件發生了後, 台灣人siōng愛問:「政府tī toh位?」Siōng愛講:「政府無能.」台灣人kám有想過ka-tī是siáng? Tī所謂ê政府ê目chiu內, 台灣人是siáⁿ-mih?

Góa kā lí講, 台灣人, lí是奴隸! Tī統治者ê面頭前, lí tō是奴隸! Lín台灣大部份人lóng tio̍h phah-piàⁿ做工生產, lín是供應chió數特定人享受ê生產工具, 統治者tī台灣自頭到尾lóng khiā tī殖民霸佔ê角度來看待台灣人, 所有kap統治者khiā chò-hóe幫贊in霸佔ê軍公教lóng知影, kan-taⁿ台灣人m̄知影.

Chit-má ê台灣人tòa大樓, 駛名牌車, 出國坐飛行機, koh有高鐵thang坐, tō kioh是ka-tī活tī文明社會, soah m̄知影ka-tī iû-goân是奴隸, iah是m̄願承認ka-tī是奴隸.

奴隸是工具, ē-sái用tō用, bē-tàng用tō hìⁿ-sak, 所以奴隸ê食品有毒是正常--ê, 統治集團無hit-lō美國時間替lí做檢驗, thai選食品ê安全. 奴隸萬不一死--去tō準tú-soah.

台灣人ah, góa講--ê chiah是真相ah! M̄願面對真相, 發生100 pái ê毒食品事件, kā政府罵100 pái, mā是無khah-choa̍h--lah!

Chit ê拜6 kap禮拜2工加班辦文化資產ê相關活動, sui-bóng其中1工無冷氣, kiōng-beh hip--死joa̍h--死, m̄-koh課程iáu是有chi̍t-kóa收成, kap ta̍k-ê分享.

過去bat參加過kúi pái研討會, lóng有中國ê學者來講中國ê文化資產, 前kúi冬有1 ê學者講tio̍h西湖文化景觀申請世界遺產ê經驗, teh談西湖景觀區ê整理過程--nih, 其實有chiok chē所在是照傳說故事, 小說iah是古早詩詞ê景重做--ê, 其實tō是人工起造ê景, 像白蛇傳ê雷峰塔, khah早hoān-sè真正有1座塔tī hia, mā hoān-sè是照白蛇傳故事做--出-來-ê, hit-tang-chūn tō有人質疑大量人工改造ê景緻kám有符合世界遺產ê場所精神. 杭州西湖有chiok chē天然美景, m̄-koh為tio̍h beh重新起造杭州西湖ê文化景緻, sì-kho͘-liàn-tńg ê khiā-ke, 傳統建築kap地景kui-ê總thiah掉sóa走, 完全失去場所--nih人ê元素, m̄-koh西湖iáu是tī 2011年成功登錄世界遺產名錄.

Hit-chūn hit ê中國學者講kah chiâⁿ iāng, chit pái tú--tio̍h-ê是另外1 ê中國學者, 是推動雲南元陽哈尼梯田申請世界遺產ê其中1 ê學者, i講tio̍h中國目前tī山西大同1 ê仿古早建築計畫ê案例. 山西大同有遼kap金時期ê重要遺址, 目前中國ê做法是全部thiah掉lu平了後, chiah koh根據文獻kap調查資料, 用新ê材料重起, 包括華嚴寺, 善化寺, 古早街á kap城牆, 其實tō是新起ê「古蹟」. Chit ê學者其實真反對án-ne做, i講中國有chiâⁿ chē『文青』去到當地聲援, iah是tiāⁿ-tiāⁿ去當地hip相, 留做記錄, 因為ta̍k pái去lóng減chiok chē mi̍h-kiāⁿ, tī『微博』mā有chiok chē人teh討論chit ê議題,

中國政府ê做法真有可能pìⁿ做台灣「學習」ê案例, 未來若是有人koh借古蹟來「阻擋」建設, lán ê「萬能政府」chiâⁿ有可能ē用chit款步數, tī別位重起仿ê古蹟, 來balance文化kap經濟ê發展.

Chiah 2~3冬ê時間, 中國學者對文化資產ê講法tō有真無kâng ê眼界, hō͘ góa chiâⁿ意外, mā改變ka-tī對中國學者ê態度. 研討會soah, góa koh kap hit ê學者討論tio̍h台灣chit-má真時行去中國拜媽祖iah是關公, m̄-koh文化大革命ê時, hiah-ê神像kap廟寺to lóng拆了了--a, 中國人已經真久ê時間是無拜神像ê無神論. I講, chit-má為tio̍h觀光ê經濟利益, 中國官方chiah ē出面chhōa頭直直起廟寺, thang好吸引觀光客, 像湄洲ê媽祖廟mā是chit kúi冬chiah起--ê, 同時mā破壞當地chiâⁿ chē珍貴ê文化資產.

爭議已久的「淡江大橋」是否興建一案，4月24日的第三次環差會議在環保署過關，預計5月送環評大會審查，通過的可能性極高，屆時淡水重要的文化景觀「淡水夕照」將成絕響！

「淡水夕照」自日本時代以來就是有名的「台灣八景」之一，多少文人雅士為她填詞歌詠、為她作畫訴衷，是淡水人引以為傲的天然景致、文化景觀，今天的觀光客也大多為她而來；不幸的是，今天卻在少數所謂「民代」的慫恿下，讓官方做出破壞這珍貴歷史人文資產的錯誤決定，讓現任官員將來要背負歷史罪名，藝文界與學術界決定一起站出來，阻止這悲劇的發生！

訴求：

1. 文化部應立即將「淡水夕照」指定為「文化景觀」，規範淡水河口兩岸之景觀限制。

2. 撤銷「淡江大橋」建設案，並做好淡水河口之環境生態與人文考古之調查與保護。

敬邀藝文界與學術界共同連署（請註明職稱），也歡迎大眾與團體一起連署守護淡水夕陽～～

2001年Argentina開始清算獨裁者, ùi 1條無hông列入去軍隊特赦項目ê罪行——誘拐gín-á開始, 1976到1983年Argentina軍政府hōaⁿ權期間, chiok chē失蹤者ê 紅嬰á hām gín-á, hō͘ in lia̍h去交hō͘獨裁者kap in ê共犯io飼, 造chiâⁿ bē-chió「失蹤ê世代」.

2003年, 南部偏遠地區出身ê律師Néstor Carlos Kirchner就任總統, sûi取消前總統Carlos Saúl Menem保護軍事特權ê特赦法令, 因為國會beh取消法令ê追溯tio̍h-ài經過最高法院ê同意, Kirchner tō先解除前總統任命hiah-ê法官ê職位, 2005年最高法院sio連續宣佈違憲法條, chit-kóa法條過去20冬來保護不止á chē加害者kap謀殺者免受刑罰, 宣佈違憲了後tō開始清算獨裁軍官kap共犯者ê罪行.

2006-2008年, 前警察總長Miguel Etchecolatz kap前將軍Luciano Benjamin Menédez hām Domingo Antonio Bussi lóng hông判kui世人關監, 前軍政府「五月營」軍隊ê拷問中心主事者Reynaldo Biobnone hông判25年徒刑, 其他6 ê軍政府成員mā tī kāng hit件審判案hông判17-25年徒刑. 2008年法院宣判ê時, 已經82歲ê前將軍Domingo Antonio Bussi坐tī輪椅頂講kah真āng聲:「Góa感謝hit-kóa hō͘ Argentina免受tio̍h共產主義傷害ê兵á.」列席ê受害者家屬真不滿表示講:「Nah ē-sái hō͘ chit ê人民兇手繼續án-ne講chit款話.」另外1 ê前軍政府將軍Jorge Rafael Videla因為牽涉謀殺德國公民, 德國要求kā引渡, Argentina法庭拒絕, ka-tī進行審判. Videla hông控告570件誘拐案, 270件刑求案kap 29件謀殺案, 2010年12--月chit ê獨裁者hō͘法院判無期徒刑, 出席審判ê Nobel和平獎得主Adolfo Pérez Esquivel表示:「真相kap司法是行向真正民主ê唯一道路.」

拉丁美洲真chē國家一直到獨裁結束了後20冬chiah真正開始面對過去, 是因為chit ê世代ê少年人開始對頂1世代ê人提出質疑, 追究in tī獨裁時期ê態度, kap in可能ê共犯行為(無論是主動iah是被動). 當然m̄是ta̍k ê國家lóng像Argentina chiah順利, Brasil ê Luiz Inácio Lula da Silva 2009年成立真相委員會負責追究獨裁政權ê罪行, i任命ê國防部長tō反對追究軍官kap in心腹罪行ê刑責, koh提出「報復主義」ê警告, 因為軍隊tī Brasil iû-goân控制飛航, 影響力iáu chiâⁿ大.

Chile過渡到民主社會了後, hiah-ê無受tio̍h政治迫害, tī新自由主義經濟政策得tio̍h利頭ê人, iáu繼續支持臭名ê前獨裁者Augusto Pinochet, 2000年英國回應Chile ê要求kā Pinochet遣送tńg Chile了後, kan-taⁿ判i tī厝監禁, 司法無法度對i進行審判.

4月初1 chái-khí hông動員去參加『25年後重讀蔣經國』ê活動, che是góa chia̍h頭路ê單位贊助桃園1 ê聯合報退休記者辦--ê. 有同事無想beh去, 我是想beh去看in到底beh pìⁿ siáⁿ báng, 看in ē-tàng無恥到siáⁿ-mih程度.

Chit-má是án-chóaⁿ? 文化部『龍應台』管ê中正紀念堂bú 1 ê『台灣設計蔣——文創中正』, 用蔣介石kap宋美齡ê感情生活來o-ló獨裁者iáu無夠khùi, 文化資產局koh bú 1 ê『蔣經國攝影展』造神, 肯定威權beh koh重來?

今á日唯一hō͘ góa感覺心適--ê是, 蔣經國過身beh移靈去大溪ê時, 大路雙pêng民眾跪leh háu ê相片. 看tio̍h che相片, góa tō開始kā hiah-ê少年--ê講góa hit-tang-chūn ê經驗, góa kā in講he lóng是動員--出-來-ê, ùi國校á, 國中到高中, 甚至警察kap憲兵to hông動員khiā tiàm雙pêng路邊, 隊伍bē-sái斷--去, bē-sái làng-phāng, koh tio̍h事先演練, 前kúi工先去現場khiā位, 當工teh thèng-hāu ê時間mā ài預演, pi-á chi̍t-ē pûn tio̍h-ài sûi跪--落, koh tio̍h大聲háu. Hit-tang-chūn góa是桃園高中ê女童軍, m̄免跪, m̄-koh ài gia̍h棍á管理秩序, 防止同學無跪iah是hi-hi-hoa-hoa, 演練ê時ka-tī tō chiok beh笑koh m̄敢笑, hit-chūn tō感覺有影是hàm kah有chhun, 命令chi̍t-ē落--來tio̍h跪--落, koh tio̍h假哭.

Góa kā hiah-ê少年同事講chit段往事, chiâⁿ chē人lóng kioh是he是民眾主動去--ê, góa強調m̄是, lóng是hông動員--ê, 有老師chhōa隊koh有警察沿路維持秩序, tō是bē-sái hi-hi-hoa-hoa, ài像ka-tī厝--nih辦喪事kāng款悲傷, bē-su chit-má ê北韓kāng款. In lóng m̄敢相信, 笑講nah有可能, góa指hit本新冊內底ê相片做證, 沿路lóng是標語kap寫學校名ê柴牌á, 人kheh人, ta̍k ê to憂頭結面, 面頭前koh giú 1條soh-á, 男女童軍kap警察khiā tī soh-á頭前.

Chit-chām-á讀《孤寂的盡頭》chit本冊, 是1 ê德國記者寫1990年代以後ê拉丁美洲, góa ná讀ná感嘆, 拉丁美洲ùi脫離歐洲ê殖民, 到美國帝國主義支持ê軍人獨裁, koh到民主化了chē ê左派執政, 進行資源重新分配. 因為自然資源豐富, 拉丁美洲pìⁿ做歐美帝國siàu想ê 1 tè肉, ta̍k ê國家lóng有chiâⁿ chē in ka-tī悲慘ê歷史, m̄-koh ta̍k段歷史當中mā lóng有bē-chió反抗英雄, 留tiàm ta̍k ê民族ê心內, 甚至chiâⁿ做拉丁美洲共同ê英雄.

軍公教在來享受特殊ê待遇, 像18%, 退休iáu thang領年終獎金, 學費補助, 在額ê薪水iah是退休金lóng phēng一般社會ke真kôan......etc, chiah-ê chhiâng-chāi chiâⁿ做社會爭論ê議題, m̄-koh iáu是m̄-bat有通過任何正經beh改善ê政策.

Kiàn-nā tú tio̍h社會不滿, 總--是有軍公教hoah聲講, in jōa認真tú jōa認真, 無, tō是哀講若kā in ê siáⁿ-mih待遇減少iah取消, in ē活bē落--去.

看tio̍h 1條新聞, 訪問1 ê主管級ê公務員, 講1975年i chhím開始做公務員ê時月給kan-taⁿ 3,000 kho͘, m̄-koh i感覺真有尊嚴. 話語--nih暗示講in過去薪水無kài chē.

Chiūⁿ網入去主計處ê中華民國統計資訊網, 1975年台灣人平均年所得是33,497 kho͘, 換算做月給無到3,000 kho͘. Kan-taⁿ講月給, koh無算軍公教其他實物補貼, 專業加給等等實質收入, án-ne tō已經kôan過台灣人平均所得--a, 軍公教生活若算pháiⁿ過, in ê待遇若算無kôan, án-ne其他大多數台灣人kúi 10冬來是án-chóaⁿ活--落-來-ê?

M̄-koh講--tńg-來, chiah-ê議題ta̍k不時teh ká, nah ē總--是一直m̄-bat解決? 軍公教是米蟲chit ê tāi-chì, m̄免人講, lán生活經驗lóng知, m̄-koh若m̄是有政治iah是選舉需要, hō͘政客kap選舉班á iah是政論節目sa來lā, 社會kám正經有teh chùn-būn? 講--tio̍h ê時, kiāu bóng kiāu, sōan bóng sōan, kiāu soah, sōan soah, koh續--落-來, 若無等到後1 táu chit ê議題koh hông lā出來thi̍h ê時, bē-su lóng無要無緊, siōng好是, ka-tī ê sī細有夠gâu thang考tiâu公務員, 享受tio̍h hit款phēng人khah好ê待遇.

香港chiâⁿ千chiâⁿ萬ê少年家khiā出來「反洗腦」, 迫香港總督撤回洗腦教育政策. 台灣媒體報導chit項tāi-chì ê kāng 1段時間, mā直直報導中國共產黨『十八大』ê權力交替過程, koh特別突顯出中國新領導者『習近平』開明ê形象.

民進黨年初中華民國總統選舉輸--去了後, in認為beh koh得tio̍h執政權「siōng尾1哩路」, bē-su tio̍h-ài先通過中國北京. 中國對Tibet kap East Turkestan ê壓制直直加強, 過去1冬外來, Tibet已經有chiâⁿ百人自焚, 用性命強調in反抗ê意志; tī台灣, 民進黨ê權力頭人soah siàu想thèng好得tio̍h北京關愛ê眼神, 一直pàng出對中國真善意ê表示.

日本國會改選, 財團政治ê代表, mā堅持bē-tàng關核電廠ê自由民主黨大贏, 安倍晉三(Abe Shinzō) koh 1 pái chiâⁿ做首相, 台派kho͘-á普遍認為che對台灣真有利, 因為chit ê新總理對中國態度khah強硬, kap台派大老koh有政治交情.

韓國總統大選, 獨裁者朴正熙(Park Chung-hee) ê cha-bó͘-kiáⁿ朴槿惠(Park Geun-hye)當選, tī台灣, hō͘台派支持者當做ǹg望ê政治明星soah肯定講che是韓國女性從政, 民主發展kap轉型正義ê成果.

台灣在額kap退休ê軍公教lóng享受過頭好ê待遇, ta̍k回若講tio̍h軍公教優惠政策ê改革, in tō哀父叫母, hoah講若減in ê收入in ē真pháiⁿ過日子, m̄-koh自kúi-nā 10冬前, 軍公教ê月給tō一直phēng台灣平均所得khah kôan. Chit ê議題kan-taⁿ是選舉ê sio罵本, 一般人sōan bóng sōan, 對chit款chiah-nī無合理ê tāi-chì, 台灣社會kám正經有teh憤怒不滿?

中秋節前tńg到出世ê所在siàu-liām父母, tú tio̍h交通管制被迫se̍h路, choaⁿ-á駛到a-má tau ê社區. Chit ê細hàn時不時teh行踏ê社區, 當初時ê剃頭毛店, kám-á店kap a-má tau lóng pìⁿ做1堆磚á角tàn tī路邊, 看chi̍t-ē不止á感傷.

舊年tō bat聽a舅a姨講起, 因為機場捷運teh-beh開通, 沿線地區beh進行區段徵收, 用公告地價4倍ê價siàu賣hō͘財團, iah是選擇無到4成價siàu ê土地sio-tú分配. Hit當時bat質疑捷運to已經開始teh起--a, 是án-chóaⁿ koh tio̍h徵收土地? A舅a姨kan-taⁿ無奈講是政府ê政策. 看tio̍h a-má tau pìⁿ做1堆磚á角, 實在是真艱苦, 原來若beh領搬sóa ê補貼費tio̍h-ài ka-tī thiah厝, 有夠殘忍ê做法, hōng割肉koh tio̍h ka-tī khai-chîⁿ買刀á hō͘對方thang方便liô去煮; 親手thiah父母留--落-來ê繼承物又koh是siáⁿ款ê心情--leh?

上網查資料, chiah知影he是內政部規劃ê『配合改善庶民生活行動方案—機場捷運沿線站區周邊土地開發—A7站區開發案興辦事業計畫』, hō͘人keng-thé--ê是, 原來政府強制人民kā世代tòa ê土地賣hō͘財團, koh ài人民ka-tī thiah厝, 搬sóa離開故鄉ê作為竟然是改善人民生活行動! 人民kám tio̍h soe-siâu到chit款程度, hông侮辱koh ài感謝政府ê恩賜?

捷運通車對人民當然有幫贊, m̄-koh khai人民ê稅金chîⁿ建設ê公共設施完成了後ê經濟利益, soah báu tio̍h財團, 政府koh趕緊替財團處理人民ê抗議kap阻擋, 犧牲人民權益來利益財團, soah講是beh改善人民生活, góa看應該正名做『庶民配合○○改善生活行動方案』, án-ne m̄-chiah有法度表明政府推動政策ê本意.

機場捷運A到A9車頭, 除去A7站（體育大學站）sì-kho͘-ûi ê土地是農業區, 其他各站sì-kho͘-liàn-tńg ê土地lóng已經是都市發展區--a. Án-ne講--來, ē-tàng koh開發--ê tō是A7站邊--á ê地區, 包括桃園縣龜山鄉樂善村, 文化村, 長庚村chiah-ê所在, 面積大約是236.74公頃（大部份tiàm tī樂善村）, 其中有197.64公頃是私人土地.

領月退ê退休軍公教koh thang ta̍k冬領年終獎金, chit條新聞tī媒體炒kah tng jia̍t, 公營銀行員工存款13% ê特權mā hông piak--出-來, ùi chia koh牽出周美青mā有領13% ê報導. Kap éng-kòe ê新聞jia̍t kāng款, 議題sûi tō cháu-cheng--去, koh過kúi工á新聞jia̍t tō退燒, ài thèng-hāu後1回對政客iah是選舉有lō͘-ēng ê時, chiah ē koh hō͘選舉班á ùi in ê lak袋á--nih sa出來lā屎.

Chit pái chiah-ê議題ê爭論, lán ē-tàng看tio̍h台灣社會ê價值標準iû-gôan hiah-nī-á錯亂.

1冬前, 中華民國總統選舉戰kah jia̍t-phut-phut, 退休軍公教存款18%特權引起社會爭論ê時, 關係民進黨候選人蔡英文領18% chit項tāi-chì, 支持者kap反對者ê講法kap chit pái周美青13%特權tú-tú tò-péng. 當初時用18% teh批評蔡英文操守--ê, chit-má顛倒用制度問題來kā周美青辯護; hit-chūn thīn蔡英文--ê講18%是制度來造chiâⁿ, kap個人道德無關係--ê, taⁿ面對周美青ê 13%, soah直直thuh tùi享受特權ê個人道德問題.

用ka-tī ê利益kap立場來決定tio̍h kap m̄-tio̍h ê標準, 用無原則ê原則來評斷是非, chhiâng-chāi tī chiâⁿ chē社會爭論--nih出現, che tú-tú是阻擋lán改變不公不義現狀ê重要源頭.

2008年中華民國總統選舉chhím soah戲, hit-chūn憤慨宣佈無beh koh承認中華民國體制--ê, 2012年選舉m̄-tāⁿ kui心liâu--落, 強調若hō͘國民黨選贏, 台灣sûi ē hō͘中國人民解放軍接管; liam-mi講決心beh ián-tó中華民國, liam-mi koh講中華民國無存在; liam-mi講ài對抗外來政權, liam-mi koh講台灣早tō是獨立ê國家.

有1對ang-á-bó͘, 有1工kha-báng hông搶--去, 去報案. 過1段時間了後, 搶匪因為其他案件hō͘警察lia̍h--tio̍h, 警察通知in去警察局指認, mā kā hông搶--去ê kha-báng kap內底ê mi̍h-kiāⁿ領--tńg-去. 警察kā kha-báng phah--開, kap chit對ang-á-bó͘ hām搶匪1項1項點交, 發現ke 1 ê皮包á出--來, 搶匪講hit ê皮包á是i ê, in ang-á-bó͘清點了後, kā mi̍h-kiāⁿ lóng koh lok落kha-báng內底, thèng-hāu手續辦好勢, tō kā kha-báng拖--leh tńg厝--a.

經過1段真久時間, 搶匪接受法律制裁了出獄--a, chit對ang-á-bó͘聽講當年搶in kha-báng ê人其實真hó-gia̍h, koh有人風聲講, 當年hit ê皮包á內底té--ê lóng是鑽石. In ang-á-bó͘真m̄甘願, chi̍t-sì-kè kā人tâu講當年hit ê皮包á mā是in ê. 人kā in ang-á-bó͘講, 是lín ê, tō去kā討--tńg-來ā; m̄-koh chit對ang-á-bó͘ m̄敢, kan-taⁿ一直放風聲, koh煽動別人去替in討——che tō是釣魚台ê真相.

台灣有chi̍t-kóa人講釣魚台是台灣ê, 原因是: 日本時代釣魚台是宜蘭頭城管--ê. Tī日本時代, kui-ê台灣, 澎湖lóng是日本ê, 日本政府想beh kā釣魚台行政範圍畫tī toh位, he是日本人ê tāi-chì. 二次大戰結束, 日本kā台灣, 澎湖hām附近島嶼ê範圍交hō͘盟軍, 是根據〈馬關條約〉當初時得--tio̍h hām佔領ê部份, 釣魚台無tī當年〈馬關條約〉割讓ê範圍內, 當然tō脫離宜蘭頭城, tńg去日本ê管轄--a. 台灣人nah ē hiah-nī gōng, soah koh有台灣人跳出來要求馬英九tio̍h ngē--起-來.

China人一直真討厭台灣人kap日本siuⁿ óa近, 一直chhōe問題beh hō͘台灣人kap日本人oan-ke, 為beh煽動台灣人kap in kāng款bē kiàn-siàu去『保釣』, tō講釣魚台有真chē石油, kā釣魚台the̍h--tńg-來, ta̍k ê人ē-tàng pun kúi-nā千萬chit款siáu話. 最近koh-khah hàm, khah早台灣sông kan-taⁿ知石油值chîⁿ, chit kúi年來『稀土』chit ê名詞chhiâng-chāi出現, in tō koh講釣魚台有大量ê『稀土』. Kán, 保釣船chi̍t-ē óa近釣魚台tō hông lia̍h--去--a, nah有法度去研究kap探測? 若無正經實地做過研究kap探測, nah有資料thang好證明hia有『稀土』? Toh 1工屎若值chîⁿ, in māē講kui-ê釣魚台lóng是屎做--ê.

Kā台灣裝siáu--ê到chit款地步, 犧牲--ê是台灣ê漁民.