「Góa真歡喜有機會參加反淡北道路運動, 過去góa bat chhit-thô--過, 對家庭mā有虧欠, m̄-koh無論反淡北kám有thang成功, góa有參與--tio̍h-a, góa chit世人siōng無有做1件值得驕傲mā thèng好kā kiáⁿ孫交代ê tāi-chì!」
拜2 (1/22)透早接tio̍h A-tiong兄電話通知廖文德廖大哥離開góan ê消息, góa心肝內tō有àn-sǹg是siáⁿ情形--a, i bat kā góa講--過ê chit句話, kui工lóng tī頭殼內kún-ká.
Ùi竹圍á行到淡水河溪岸, tī i性命siōng尾chit chat路, 心境是平靜iah是激動? Kám有beh kap朋友hām ka-tī用心守護ê土地sio辭ê m̄甘? 是siáⁿ款ê決志, hō͘ i tī chit chat性命siōng尾ê路直直行--過, 無koh hoan頭?
2008年參與反淡北運動ê時, 廖大哥bat kā góa講, 聯盟其他人有bó͘有kiáⁿ, 有家庭ài照顧, i kiáⁿ-jî lóng大hàn無tī身軀邊, 無siáⁿ掛礙, 惡勢力若siuⁿ超過, i ē-kham-tit kap in輸贏.
I mā不止1 pái kā góa講--過, i若感覺性命無需要koh留戀ê時, tiāⁿ-tio̍h beh用ka-tī選擇ê方式, hō͘性命結束kah有意義. Taⁿ講ē到做ē到, i正經án-ne做--a. Tī身苦病疼teh治療chit段siōng尾半冬ê時間, i oan-na bat lio̍h-lio̍h-á kā góa提起chit ê phah-sǹg, góa總--是tìⁿ-chhiⁿ kā講:「Lí tio̍h專心回復健康, lán ài做ê tāi-chì koh chiok chē--leh.」