Lyiking Yuma, chit-ê名tī台北運動kho͘-á ná像消失chiâⁿ久--a.
I是台灣原住民部落聯盟ê頭人, 社運kho͘-á活跳ê同志, tī建國黨宣佈成立hit-kang, kap kúi-ê實際走chông組黨事工ê朋友chò-hóe退出, koh過1~2冬, tō聽講 i beh離開台北tńg去部落, 了後, kan-taⁿ聽講 i tī新竹五峰ê清泉部落chhōe-tio̍h 1 tè地, 決心beh tī hia釘根.
一直想beh去看--i, m̄-koh總--是無chhiàng-suh. 舊年, 以早青年電台ê同工beh寄付hō͘ Lyiking chi̍t-kóa錢kap冊, 拜託góa想辦法交到 i手--nih, góa chiah親身走chit-chōa路.
清泉tī新竹chiâⁿ出名, hioh-khùn日真chē人ē走去hia chhit-thô peh山, m̄-koh有jōa chē人知iáⁿ, 清泉落溪khàm koh peh過hit粒山 ê Mintuio, 有人tiām-tiām-á tī chia teh實踐信念.
Ùi新竹出發, 駛2點鐘久chiah到清泉, Lyiking in ang Walis駛tho͘-lá-kuh出來清泉路邊kā góan chhōa路, oat入去細條路, koh行1 chat山路chiah到.
Chhím到位, Lyiking坐tī門kha口teh看報紙,「Nah koh ē記得góa chit-ê朋友?」講soah請góan入去厝內, chò i繼續看報紙. Walis kā góan紹介 i 設計ê厝kap柴刻. Lyiking出現了後, 換 i kap góan káng, Walis走去煮咖啡, 咖啡phâng--來 i tō無看見影--a.
到taⁿ去過kúi-lō pái--a, kiàn-pái to án-ne, Walis先chhōa góan看in koh有siáⁿ-mih新規畫, 進度án-chóaⁿ, 入來厝內, 坐leh káng無kúi句, Lyiking入--來, Walis煮咖啡, koh來tō看Walis tī外口chia行hia chông, ná kài無êng, 心內 ê pe̍h-chhi giau疑soah lóng無機會kā問: Walis是澎湖人, 用siáⁿ款ê心境陪Lyiking tńg--來-ê?
Ah Lyiking--leh? 當初離開台北大都市ê舞台, 放棄久長累積ê基礎, 決定tńg來ku tiàm chit-ê深山林內, 是為tio̍h siáⁿ-mih? I講kah真輕鬆: ià-siān tī台北頭人kho͘-á了嘴nōa ê生活; in部落聯盟ê成員, mā lóng散--開, tńg去部落經營, ǹg望tī ka-tī ê部落, chhōe-tio̍h真正ê khùi力.
Tńg來chia 5~6冬--a, 空氣好, 生活單純, 環境清爽bē ak-chak, 根本to無想beh落山, mā無想beh chhap山kha hiah-ê有孔無sún ê tāi-chì. 話to講 iáu-bōe soah--leh, i tō緊問góan山kha chit-má ê狀況, góa講to無kúi句, i 隨kā台灣chhiah-cha-bó͘ ê本性展--出-來:「Hiah-ê政客講--ê lóng phùi話, he kā-kam-á--ê kap食豬屎--ê講--ê, lí kā聽beh chhòng siáⁿ? 無chhái時間......」
無意無意去講tio̍h部落工作隊, i 隨tō koh kiāu--落, in是tī部落進行「統戰」, 有才tiāu不時10 kúi-ê chhōa--leh, 落去部落bú抗爭kúi-lō月日mā bē吊鼎? 資源ùi toh位來? 部落聯盟kap in hit-tīn--ê界線分明, 講明--ê tō是「獨」kap「統」ê立場!
選舉愈來愈óa近, i mā kā góan講, 原住民部落 iáu是藍--ê ê勢力, 藍--ê tī部落真有組織kap資源 teh pháng, 派1 ê平地人來hōaⁿ黨部, 下kha手lóng chhiàⁿ部落ê人, 不時替 in做宣傳戰, 當然洗腦 ē成功; 民進黨--ê soah kan-taⁿ beh ti̍h選票ê時chiah出現, ia̍h無正經想beh長久經營, 民進黨ê原住民精英mā kāng款, kioh是tī大都市經營人脈tō ē-tàng peh--起-lih, kám有teh注重草根? Kám有iáⁿ teh操煩部落ê生存? 飼kúi-ê thiāu-á-kha kám有lō͘用? Kan-taⁿ in部落聯盟chiah-ê gōng人beh khut--落-來, tńg來部落經營, tńg來「反洗腦」, m̄-koh民進黨kap台派mā無kā in重視.
Hiah-ê人kan-taⁿ ē-hiáu tī嘴--nih hoah「族群尊重」, m̄-koh kám正經有beh重視原住民各族ê處境? Kám有正經teh「尊重」原住民? He m̄是中央訂1 ê政策, iah是hoah好聽ê口號, lóng免落實tō看ē tio̍h效果--ê, 無直接ê效果, 當然tō無人beh重視. 像原住民委員會, tō是tī辦公室--nih計畫審審--leh, 政策寫寫--leh, án-ne tō是重視kap尊重? 陳水扁政府beh chhiàⁿ原民會主委人選, 是án-chóaⁿ無來問in chiah-ê運動工作者ê意見? 是án-chóaⁿ chhōe過去運動反抗ê對象──舊國民黨政客, 去做 in「新政府」ê原住民委員會主委? Án-ne tō是尊重原住民族群? 用舊體制ê價值來解說kap執行原住民事務 tō叫做「尊重」?
I tńg來tī chia beh經營草根, 無資源mā無人tah便ê舞台, kám bē做kah真艱苦? I講是ka-tī選擇--ê, 該做--ê khah艱苦mā tio̍h keng--落-去, ǹg--ê是心內m̄甘願, m̄甘願看hiah-ê ou-lok-bo̍k-chê ê tāi-chì一直teh kā lán chau-that, m̄甘願看ka-tī ê族人一直soe-bái--落-去, 嘴齒筋kā--leh mā tio̍h au--落.
I強調講, 原住民部落實在愈來愈淒慘, 免講siáⁿ-mih政治, 文化, 族群ê問題, in族人ài先tī經濟上khiā ē起--來, chiah有生存ê前途, mā chiah有thang來談文化iah是族群發展ê未來; 政客ê口號hoah kah koh khah好聽, mā bē解決in部落ê困境, 原住民tio̍h-ài ka-tī beh反省, beh靠ka-tī ê khùi力khiā--起-來, chiah ē有出路, in部落聯盟ê成員tō是beh用ka-tī ê實踐, kā chit條出路拚--出-來, 無路tō ka-tī開路!
「無人ē記得góa--a, kan-taⁿ lí niâ.」Beh走chìn前, Lyiking pok出chit句話sio辭, m̄-koh góa顛倒 tī i身軀感受tio̍h性命力, 比以早tī台北chhia拚走chông koh khah實在ê氣質, 土地kap草根ē puh出新ê性命, kap選舉輸贏sio比較, che chiah是lán面對未來koh khah實在ê hō-jiah.
留言列表
