Ká-sú 講 hō͘ góa 有機會 thang tńg 去無煩無惱 ê 日子,
有 kúi 種可能, 無包袱 á ê 9 歲, 16 歲, iah 是 23 歲 chìn 前, koh 活 1 pái.
Góa 實在真想 beh tńg--去.
Góa 真懷念 góa koh 是 cha-bó͘ gín-á ê 時,
乖巧--ê, 騎 kha 踏車--ê, 整理房間--ê, 穿學校制服--ê, 傳紙條 á--ê, 煩惱--ê, 固執--ê......
kúi-nā 款 ê cha-bó͘ gín-á.
Kiám-chhái,
góa 懷念--ê, m̄ kan-taⁿ góa ka-tī,
koh 有 góa gín-á 時 ê 弟弟, koh tī 台灣食頭路 ê pa-pa,
身體 iáu chiok 勇健 ê a 公 a-má, góa gín-á 時 ê 朋友,
甚至 hit chūn ê 世界.
Hit 種 80~90 年代 ê 氣氛, 一直 tī góa ê 頭殼內底 póe bē lī.
Hit chūn gín-á 時代單純清閒 ê 狀態,
koh 有 hit chūn góa hām 變 khah liù ê chit-má 比--起-來,
góa nah 有可能 bē 懷念?
M̄-koh,
góa 想 góa iáu 是 ē 選擇 bòai tńg--去.
Góa 真 kah 意 chit-má ê ka-tī, 一直 teh 改變,
góa 把握 to bē 赴--a!
Siōng 無, chit-má ê góa,
ta̍k 工講--出-來 ê 話 lóng phēng cha-hng koh khah 老實--chi̍t-kóa,
ta̍k 工親像 lóng phēng cha-hng koh khah khiáu--chi̍t-kóa,
ta̍k 工 koh khah cheng-sîn--chi̍t-kóa,
koh 看 khah 有 chit ê 世界--chi̍t-kóa,
koh khah 看 thàng 人生--chi̍t-kóa.
23 歲真好,
chit-má ká-ná 比 éng-chūn khah 好.
Góa m̄ 甘 tńg--去-a!
留言列表
