台灣組合

時間過了真緊, 目chi̍t nih tō到siāng尾á 1工, 有chi̍t點á m̄甘. M̄-koh看tio̍h Pi-thâu-pòe進步chiah chē, 來chia koh學tio̍h chiah chē, 心內ê感動自然是khah chē過m̄甘.

Ē記得tī góa細hàn ê時chūn, ta̍k禮拜lóng ē來Pi-thâu-pòe收驚. Pi-thâu-pòe tī góa過去ê印像中, 是1 ê sì-kè lóng是pùn-sò kap豬屎雞屎味chiok重ê所在. Chia ê gín-á m̄是kui身軀烏sô-sô, tō是一直流phīⁿ, 流kah kui-ê面烏lu-lu. 總講1句, tō是「thái-ko」.

7冬過--去-a, Pi-thâu-pòe mā tòe góa大hàn ê kha步ta̍uh-ta̍uh-á teh進步. 因為有林--先-生kap chiah-ê人ê付出, hō͘ Pi-thâu-pòe sì-kè lóng有花ê phang味.

Chit-má ê Pi-thâu-pòe sì-kè lóng有種花ê小公園, kap畫圖ê牆圍á. Gín-á ê笑聲, 美麗ê花園, 人情ê溫暖, 充滿tī Pi-thâu-pòe ê ta̍k ê所在.

相信Pi-thâu-pòe ê未來, mā ē kap花kāng款, 充滿美麗ê色彩.

──《TGB通訊》第58期(2004/7)

◎第8屆台語生活營(2004/6/26-30)專刊