「Án-ne kám有公平?」永--á hiông-hiông大大聲hoah--出-來.
Tī龍山寺廟埕, 永--á kap 1-tīn人teh辯, chiah-ê人平常時都tiāⁿ tī chia開講phò-tāu, 真chē是有路無厝ê羅漢kha-á, in是青旗á ê死忠票.「Lán 1991就獨立--a, 無, 是teh講siáⁿ siáu話? 96年?是koh叫lán ài tǹg hō͘--in台灣chiah會獨立? 話lóng據在in teh講--ê?」永--á有嘴講kah無nōa, kiōng-kiōng beh起phùi面.
永--á teh駛計程á, kap 2~3冬前比--起-來, 平平走10點鐘, thàn--ê soah減千外kho͘,「政黨輪替」了後, 「在野黨」一直用「經濟變bái」teh攻擊hōaⁿ政權ê台灣黨, 雖bóng對台灣黨愈來愈chhè心, m̄-koh i無án-ne就肯定hiah-ê「在野黨」.
「自有投票權開始, góa lóng bē-giàn tǹg hō͘顧面桶--ê!」細hàn不時都聽sī大teh chhoh顧面桶--ê, 做兵hit 3冬, koh hō͘ hiah-ê老芋á蹧躂, 「顧面桶--ê kā lán台灣人sńg-tn̄g gah án-ne, 無kā péng nah算是人!」
細hàn ùi Āu-lâng(後龍)搬來台北杭州南路, kui-phiàn枋á厝lóng下港來台北討生活ê台灣人, 環境bái gah bē講--得, 無浴間á mā無便所, gín-á人lóng tī厝外路邊洗身軀.
「Lí ê學費會tàng買kúi斤肉?」讀高中ê時, 老pē作sit tńg--來, tiāⁿ-tiāⁿ都án-ne kā khau, 熱--人若chūn電風吹, 一定hō͘老母siah kui工. In老pē teh踏3輪車, 老母50~60歲--a koh teh做女工, 雖bóng讀--ê是hit-chūn真出名ê高中, m̄-koh知iáⁿ厝--nih無錢, 無機會chiūⁿ大學, 就án-ne sńg 3冬.
Chhím退伍 i就結婚, in厝mā搬去新莊, i tī信義區做業務, thàu早8點到公司, 暗時8點半chiah有thang下班, in厝到公司tio̍h開1點鐘, 真緊家庭就出問題, in bó͘怨 i kui工tī外口, tńg到厝就是睏, ang-á-bó͘感情愈來愈bái, 2 ê不時都teh oan-ke. 厝--nih chit款氣氛hō͘ i chiâⁿ chak, kui-khì去走船, khah免ang-á-bó͘ ta̍k工見面都pháiⁿ面chhiuⁿ.
朋友紹介 i去基隆.「真chē人lóng kioh-sī討海chiâⁿ好thàn, 無iáⁿ--lah, 艱苦gah beh死, 錢mā無iáⁿ thàn khah有, 準有, 艱苦錢mā留bē久--lah......」講tio̍h走船ê日子, 永--á就滿腹心酸. 1 chōa出--去tio̍h 3月日chiah有tńg--來, hit-chōa是去北海道lia̍h魷魚. 船出海走半個月chiah到位, koh來是siōng艱苦--ê, 網á落--去, 起--來, lia̍h, khioh, 送冷凍庫, 落冷凍艙......1工chiah睏2點鐘.
3月日後船tńg來基隆, i分tio̍h 5萬kho͘. 1-chōa tńg--來, kui隻船船員分無到4成, chhun--ê lóng船公司ê. 船員ê部份mā m̄是ta̍k-ê公分(kong-pun), 船長分5份, 輪機長kap電報員分3份, 永--ê講船長in做gah真sáng-sè, 顧出嘴nia顛倒分khah chē, 討海--ê lóng kā叫做「食肥--ê」; 大車, 二車, 3車kap漁ló長分2份, 其他船員kan-taⁿ分tio̍h 1份.
尾--á koh tī高雄走1-chōa, hit-chōa去lia̍h sàng-bah(秋刀), 出海2~3禮拜, 魚á lia̍h siuⁿ chē, 船chih-chat bē-tiâu, 船長宣布棄船, in落救生船無jōa久, 船就沈--去-a, kui船lia̍h tio̍h ê sàng-bah mā lóng了了--去. Chit-chōa tńg--來1-sián都無thàn--tio̍h, i choaⁿ-á bòai koh討海--a.
討海kám有iáⁿ thàn無siáⁿ? 永--á講, 1-chōa出--去tio̍h kúi-lō月日chiah有tńg--來, in出海chìn前, lóng tio̍h先kā船公司借安家費, mā tio̍h借kóa所費買chit kúi個月tī船--nih需要ê mi̍h-kiāⁿ, 分錢ê時, 船公司chiah kā借--ê扣--起-來, 實際分--tio̍h-ê就chhun無kúi-sián--a. 討海人1-chōa tńg--來, tio̍h-ài tī港邊等有sit頭chiah koh出海, 像高雄港港邊éng-chūn lóng是涼水間, 討海人lóng kui-tīn tī hia ná等sit頭ná食酒po̍ah-kiáu, 無2~3手錢就開ta--a, 出海chìn前chiah koh kā船公司借, 艱苦錢lóng留bē久, kan-taⁿ 1-chōa 1-chōa出--去, 錢是愈欠愈chē.
離開高雄了後, 永--á就tńg台北送gasuh, 1月日kan-taⁿ hioh 2工, 1工做12點鐘, 薪水無kôan, m̄-koh i真kut-la̍t做, 經理koh對 i bē-bái, 靠1-kóa外lō͘-a生活mā算會過--得. 2冬後, i想講年歲mā有--a, gasuh chit途做bē長久, chiah改途去駛計程á, 時間khah自由, mā bē hiah艱苦.
Ná走車ná聽lajio做gī-niū, soah去chūn tio̍h地下電台, i koh se̍h tò-tńg來想過去是án-chóaⁿ hông蹧躂--ê, soah愈聽愈soah-phah. 尾--á有1-tīn做運動--ê ta̍k禮拜6 tī台北市政府辦「市民講台」, i真感心, 走去做義工tàu-saⁿ-kāng, 就án-ne開始參與運動ê事工.
96年年中, 永--á聽人kiāu講Kan-tāu 1間地下電台kui工teh批青旗á kap獨派, i想講是siáⁿ-mih青面jiâu牙--ê, 好玄kā chūn來聽, hit-chūn台灣人teh siáu kap顧面桶--ê拚總統位, hit台--ê soah批講選舉chit-lō路線顛倒是teh出賣台灣人運動, i愈聽愈認為有道理, 主動走去kā寄付, soah choaⁿ-á tiâu--leh, koh hông鼓勵chiūⁿ線做節目, mā bat tàu-tīn tī龍山寺公開講演, i chhōe tio̍h ka-tī ê自信kap尊嚴, mā決志beh一直kā運動做--落-去. 參與hit-ê電台, hō͘ i轉變chiâⁿ chē.
電台尾--á hông抄--去, 走車koh愈來愈pháiⁿ thàn, m̄-koh i無失志, 一直ka-tī讀冊, mā不時teh kap hiah-ê電台熟sái ê基層兄弟聯絡. I知iáⁿ chit-má勢面bái, in chit-tīn兄弟chit-má無才tiāu做siáⁿ, m̄-koh iáu是tio̍h繼續準備, 早慢koh tio̍h出來拚.
「Góa有自覺, 特別是過去艱苦--過, 知iáⁿ ka-tī若無拚, 後pái ê人beh án-chóaⁿ?」永--á心內一直án-ne teh kā ka-tī鼓舞.
留言列表
