溫度降到14度, 這lō chiah gàn ê天, 喘氣鼻孔都會疼, 驚面pit--去, 出門chìn前lóng會抹kóa NIVEA.
「黑松沙士」對真chē人來講, 是伴in成長chiok重要ê記tì, NIVEA對góa mā有kāng款ê意義, 包含mama對góan ê關心.
讀國校á ê時, 便若到kôaⁿ--人, chái起時á mama beh載góan去讀冊ê時, lóng會kā góan抹NIVEA. Góa無愛面á油油, i手若來我就閃, kiàn-pái lóng bú kah i風火tõh, kā góa ê頭chhi̍h--leh, 手kā大大力hôe落嘴phóe kap額頭, 抹了就koh tì毛帽, hit-ê時chūn góa無kah意NIVEA ê味, kô͘油油hō͘ góa chiok無爽快, tiāⁿ-tiāⁿ等坐起o͘-tó͘-bái頂, 就隨用毛帽做面巾, kā面á ê油chhit清khì.
有抹加減有差, 而且下港ê kôaⁿ--人khah無hiah酷刑, 雖bóng lóng kā NIVEA hôe-hôe掉, 面是lóng無去pit--tio̍h.
大hàn來到雨水kāu濕氣重ê台北, 有1-kiàn tńg台南, hō͘ mama看tio̍h góa ê面pit--去-a, i ná kā góa唸, o̍at--leh就出去kā góa買1盒NIVEA, kāng款ê包裝, 相siâng ê氣味, mama ê關心mā猶原無變. I嘴--nih交帶góa ài ka-tī照顧ka-tī, 大人大種--a, mama是bē-ēng leh tòe tī lí身軀邊.
Góa chiok pháiⁿ-sè, tio̍h koh hō͘ mama煩惱, koh去看tio̍h i無閒出--來, bak水洗碗, 洗衫, lóng kā kha手弄kah pit--去-a, 有tang-chūn koh會流血, 真m̄甘. 叫i m̄-thang taⁿ-á顧老(爸)顧細(góan), ka-tī m̄ tio̍h-ài會hiáu保養......
看khǹg tī桌á角ê NIVEA, 想tio̍h故鄉ê mama, mama, lí有抹NIVEA--無? Tio̍h穿khah燒--leh, m̄-thang kôaⁿ--tio̍h. 有1工, mama老--a, góa mā會kā抹NIVEA!
留言列表
