生tī台灣, m̄是lí hō͘社會改變, 就是lí去改變社會. 受豬狗教育大hàn ê gín-á, 無思想, 無人格, 看bē tio̍h ka-tī, mā看bē tio̍h世界.
Ka-chài, 大學時代接觸「運動」了後, góa看清楚體制ê本質, mā看清楚ka-tī, 知iáⁿ ka-tī beh追求siáⁿ, koh khah知iáⁿ ka-tī m̄甘願gōng-gōng做奴隸.
「運動」是teh反壓迫, beh phah破扭曲ê價值觀, 重新chhiau-chhōe人ê價值, 起造新國家, 新社會, kā chit-ê原則chiâⁿ做ka-tī ê主體意識, 用chit-ê中心思想去參與獨立運動, 婦女tháu-pàng運動, 母語運動, 工人運動, 環保運動, 原住民運動......, 運動是全面性--ê, kan-taⁿ cheng差lí是khiā tī toh 1 ê位出發niā-tiāⁿ.
M̄-koh chit 3冬, tī 1-kóa社運kho͘-á看--tio̍h ê現象soah m̄是án-ne: hoah台獨--ê, 無beh講階級; bú工運--ê, 無teh尊重cha-bó͘人; 做女權--ê, bē去思考母語ê重要......, chit-kóa社運團體chiú tī ka-tī ê kho͘-á內底, 1 ê人做1款, án-ne落--來, Vision siuⁿ e̍h, mā無法tō͘開闊. 借問, 若kan-taⁿ beh爭取國家獨立ê空殼á, 無beh討論新國家ê內涵kap文化, án-ne beh ài chit-chióng繼續人食人ê國家chhòng siáⁿ? 若kan-taⁿ beh爭取工人利益, 無beh檢討現此時ê父權體制, án-ne cha-bó͘人ê階級地位tī toh位? 若kan-taⁿ beh爭取女權, 改善生活環境, 無beh lòng破國家機器, 消滅統治集團, án-ne lán ê gín-á kāng-khóan bē-hiáu講母土ê語言, 學--tio̍h-ê是統治者àu-tah ê文化, 台灣人猶原hō͘豬á管.
舊年年底, kap朋友去工會食尾牙, 本底想講, 借chit-ê機會去感受工會ê氣氛, mā熟sāi長久以來bú工運ê sianpai, 就hèng-phut-phut kap朋友kho̍k火車落南, 去到會場, 人chiâⁿ chē, 氣氛mā不止燒lo̍h, m̄-koh kap góa頭殼內想--ê, 聽--ê無kâng, 顛倒是選舉場ê氣氛, hit-chūn tng beh選縣議員, kui場lóng是候選人teh走chông拜票, koh 1 ê 1 ê排隊去台á頂講話, 本底hèng-phut-phut ê心chiâⁿ soah chhek--1-ē. 開桌了, 主持人換做1 ê chhēng-chhah chiâⁿ hiam ê cha-bó͘人, 會場ê氣氛sûi koh變款, 『辣妹』1 ê 1 ê換, 衫愈chhēng愈chió, 動作愈來愈引動cha-po͘人ê原始慾望, koh會落去台á kha kap cha-po͘人「身體互動」, kui場ê pho̍k-á聲, hoah-hiu聲, hō͘ góa lak入去「酒店」hām「貓á間」ê空間內底, 工會幹部kap員工1 ê 1 ê變做消費cha-bó͘人身體ê人客, 小姐tī人客ê目chiu前thǹg kah光光光, tī in ê身軀頂kôan nóa來nóa去, 少年--ê擋bē-tiâu, 鼻孔血sûi chōaⁿ--出來. 散場ê時, 聽tio̍h 1 ê工會幹部kā人phín講:「Chhiàⁿ chit團chiah萬5 kho͘ niâ, lín若有需要, 會sái chhōe--góa, góa kap in chiâⁿ熟......」. Góa 1時分bē清楚是tī工會食尾牙, ah是tī「牛肉場」hông chau-that?
辦chit種尾牙, 對cha-bo͘工人ê尊重tī toh位? 工會是工人教育kap戰鬥ê組織, 是beh挑戰chit-ê體制, 社會對cha-bó͘人phìⁿ-siùⁿ無尊chhûn, 當然mā是挑戰ê對象, chit-má ê人soah變做嘴--nih講teh做運動, 現實生活顛倒teh chau-that cha-bó͘人.
運動ê原則是tī生活中檢驗--ê, 做--ê kap講--ê無一致, beh án-chóaⁿ kā人講lí teh做運動? Lí ê人格beh án-chóaⁿ hō͘人信服? M̄免消費cha-bó͘人ê身體了後, chiah koh牽thoa kui堆理由來póe-hōe, ka-tī都無法度tō͘堅持運動ê原則--a, beh án-chóaⁿ引動台灣革命ê湧? 做運動無siáⁿ, ta̍k-ê lóng會hiáu hoah, 重要--ê是你án-chóaⁿ kā理念落實tī生活--nih, 革命chiah是ùi生活中開始.
留言列表
