90年代, 中華民國統治chiâⁿ 40冬. 228, 白色恐怖, 國語政策......無停睏ê壓迫, 人民早就驚破膽, m̄敢出聲. 美麗島事件以來ê反對運動, 加減消tháu ta̍k-ê心肝頭ê tū-lān.
行到90年代前chat, 解嚴kap國會全面改選ê訴求, 吵kah鬧熱kún-kún, 學生gín-á mā真熱情teh參與. 3月學運了, 1-kóa運動幹部tńg去學校思考--tio̍h, 運動若beh thòaⁿ--落-去, 根本tio̍h-ài顧hō͘ chāi, m̄-chiah tńg去iā種, 組社團. Ǹg望台灣人ài beh tháu-pàng ê意志, tī少年輩中ng會tàng生根puh-íⁿ. 有--ê就ùi文化hām歷史落手; 有--ê引用左派ê理論來chhōe出路, 雖bóng bú--ê無kâng, m̄-koh lóng是beh ián倒體制. 政大台文社就是hit tang-chūn成立--ê.
政大台文社éng過有辦過228 kap平埔族ê專題演講, 台灣史kap左派小說ê讀書會, koh有民俗活動ê討論. Che lóng是想beh引chhōa ta̍k-ê來熟sāi lán ê鄉土hām歷史, 用kap主流社會無kâng ê思考方式kap價值觀, 面對ka-tī, mā面對chit-ê世界. 現此時外口吵kah鬧熱滾滾ê「愛台灣--無?」實在是teh搶選票, hoah心酸--ê niâ, khah輸lán開kóa時間péng歷史, 看māi-á chit-má弱勢階級tú tio̍h sáⁿ問題; 知iáⁿ過去ê tāi-chì hām現此時ê困境, khah thang好chhiâu-chhek未來beh án-chóaⁿ行.
Tī社團--nih, góan lóng是用台語teh開講hām討論, koh用台文記錄感想, 會sái講是「嘴講pē母話, 手寫台灣文」. 過去KMT ê語言政策, 造chiâⁿ台灣各族文化pháng見了了, má孫á話語bē通, 祖先ê智慧無法tō͘傳教(thôan-kà), 現此時無人禁止lán講母語--a, iah m̄-koh考試, 升等, 資源分配ê結構, mā是對khah gâu使用華語漢字ê人khah有利. M̄-chiah góan主張「本土語言文字化」, 若無án-ne, 根本bē堪得強勢語言ê打擊.
M̄管你是講Hō-ló話, Hak-fa iah是原住民語, 若無ka-tī ê字, tī華語漢字面頭前攏ài認輸, 早慢會bē喘氣. 語言是文化上重要ê 1部分, 祖公á傳教所形成ê風俗kap生活慣勢, kan-taⁿ會tàng用ka-tī ê話來了解. Teh-beh絕種ê動物á有人beh救, 強beh死--去ê語言--leh? 1種語言展現1種價值觀, 準講全世界kan-taⁿ chhun hit幾種強勢語言, 是beh án-chóaⁿ有多元ê思考?
講chiah chē, 若beh解決tāi-chì, 最後當然是政治力ê對決. Ta̍k-ê想看māi, 台語會beh死beh死, chhun 1絲氣絲á, kám m̄是政治勢力ê壓迫? Chit-má九年一貫ê課程--nih有台語課, kám m̄是政治抗爭討--來-ê? 原住民運動beh爭取原住民ê權益, 到尾--á m̄就是關係到國家資源ê分配? 女性運動面對China父權文化ê霸權beh án-chóaⁿ? 環保運動遭遇先進國家對台灣ê科技kap經濟殖民beh án-chóaⁿ對付? 勞工運動beh挑戰資本主義hām買辦ê剝削, kám m̄是oan-na ài透過政治?「政治--ê hōan政治, xx--ê hōan xx」根本是gōng人teh講siáu話!
政治m̄-tāⁿ是投票iah參加政黨niā-tiāⁿ. 今á日ê執政黨過去爭取民主確實有功勞, m̄-koh進入體制了soah愈行愈倒退, 可見台灣ê問題m̄-tāⁿ是「有民--無」. 台灣正經ài面對統獨問題, mā確實有民族衝突, 中華民國ê各政黨攏teh閃避, chit款情形落--去, lán nah有未來?
Lán面對ê壓力m̄是中國, mā m̄是全世界ê競爭, 是內部ê爭議. 228事件到taⁿ iáu無清無楚, 1人講1 kó͘, 歷史ê是非無講清楚, ta̍k-ê nah會kāng心? Ǹg望「『用時間沖淡一切』, 久--á就會產生認同」, 根本是teh hām眠. 公共事務無beh chhap, 無法tō͘改變siáⁿ.
Lán bē-giàn坐tiàm chia等死, 想beh kā濁水變清水, 起造lán ê新國家. Tī che chìn前, 台文社kan-taⁿ ǹg望chhōa ta̍k-ê tńg來看ka-tī, 了解lán心肝頭ê驚惶, 就看會tio̍h chēng到taⁿ lán ê困境hām苦悶, 台灣歷史ê形容詞˜是「被出賣」就是「悲情」, koh續--落-來-leh?
留言列表
