Hit個ta-sò等無梅雨ê 3--月, 日子mā是ài過.
1年1 pái ê媽祖生, tī中部海線ê庄á頭開始leh鬧熱, 拜拜是庄á內sī大人ê解藥, phòa病bē好--ê, 豬á飼bē大--ê, 娶無bó͘--ê, 去廟--nih chhōe神明po̍ah-poe, 暗時就會好睏.
A-má m̄-bat字mā m̄-bat teh看新聞, siáng做總統, siáng teh歪哥, tī a-má心內, 永遠比bē過siáng in厝koh有好嫁iáu-bōe嫁ê姑娘á, toh位有thang買tio̍h紅標米酒khah要緊.
舊曆19, 是庄á內迎媽祖ê日.
等1冬--a, 等kah kha手phī-phī-chhoah ê a婆a-má, 早就thâi雞thâi鴨, 2支kha--ê, 4支腿--ê早就lóng khû tī廟口咬鳳梨teh等--a. Mā m̄知ùi tang時開始, lán拜拜hiah-ê用來下願ê禮數, nah會是別種動物tn̄g-kha tn̄g手做牲禮? 興趣拜拜kap koah-hiuⁿ來安心過日ê a-má, ta̍k年若a公做忌mài算, thâi雞thâi鴨thâi kah上歡喜--ê就是這pái.
已經thàu中tàu--a, 日頭真炎. Thàu早就起來thâi雞bán毛ê a-má, 這chūn, 看tio̍h面頭前kui桌ê chheⁿ-chhau, chiah吐1口khùi, bûn-bûn-á笑講:「M̄知媽祖婆有kah意--無?」
我知a-má ta̍k年chiah-nī kang-hu leh拜拜, mā是因為i心內做老母ê 1個責任, 我上細hàn ê a叔, 食到40 thóng歲iáu-bōe娶bó͘ , 就因為a叔無想beh娶, ta̍k年拜拜都m̄知koh有jōa chē soe-siâu ê雞ài hông thâi. A-má mā無i ê法, kan-taⁿ 1 sian拜過1 sian.
「Góa bē記得換lān-san--e!」A-má hoah 1聲, ùi lak袋á jîm 2張紅色ê紙票, 叫góa去廟口換錢. A-má叫góa換ê銀á角, 是beh hō͘ hiah-ê行tī媽祖婆出巡隊伍頭前, teh lāng獅頭hoah-hiu ê乞食公kap乞食婆--ê, a-má kā gún講, hiah-ê人就是無好好á讀冊, chiah會tòe tī媽祖婆身軀邊teh討生活, a-má一直lóng m̄知, 這個thâu路, 是góa kap細hàn弟弟上想beh食ê thâu路. Góa kap弟弟mā講好--a, góa lāng獅頭i tòe獅尾.
Góa手phâng a-má叫góa去換ê銀á角, ná行已經ná聽tio̍h人teh放炮á ê聲. Tú oat過巷á口, 就看tio̍h a-má ná行ná走, 嘴--nih koh ná hoah講:「Góa koh去買1-kóa金紙sûi tńg--來, lí先tńg--去m̄-thang ná走ná sńg, 拜拜ê時bē-tàng sńg笑......」
A-má走去廟口ê kám-á店, hit個tì笠á phāiⁿ豬kha-kho͘ teh kā媽祖婆跪--落ê報馬á, 已經行過門kha口, a-má koh iáu m̄ tńg--來, 就beh bē赴--a, hiuⁿ gia̍h--起-來, góa學a-má leh拜án-ne, ná拜嘴--nih ná唸, 赤ia̍h-ia̍h ê日頭mā來tàu鬧熱.
Hiông-hiông有1個人chông入來厝--nih:「Gín-á! Lín a-má暈倒tī廟口, lín厝內有大人--無?」
Tàu中tàu, 廟口ê táⁿ-má膠chiok燒--ê, 廟口khiā 1-tīn人, 有--ê teh kā a-má chhit kōaⁿ, 有--ê teh ia̍t風, kui面ê老人斑kap tâm-tâm ê目kho͘, 日頭iáu tī天頂tiām-tiām-á炎.
『過度亢奮, 腦血管栓塞導致下半身血管嚴重阻塞, 必須予以截肢, 否則血液無法流通, 動作要盡快, 以免危及病人的生命安全, 家屬請簽讀此份切結書, 手術即刻進行.』
A-má出院半年後, a叔就結婚, 新娘是照顧a-má ê護士姊姊.
Hit工, 坐tī輪椅頂頭ê a-má, 已經歪--去ê嘴, 笑kah真甘願, 嘴nōa ná流目屎ná滴, he是1個mama ê笑容.
A-má坐tī輪椅頂頭, khiau-ku ê形影, kap hit工拜媽祖ê牲禮, 看--起-來nah會hiah kāng款?
留言列表
