台灣組合

Se̍h 1大liàn chiah發現m̄是teh建國; 建國, 是beh重新打造lán ê心!

有真chē mi̍h-kiāⁿ m̄-bat, mā有真chē mi̍h-kiāⁿ了解--a, góa總算知iáⁿ ka-tī m̄-bat chiok chē, mā bat真chē!

會驚會chhoah, 是lí tng teh面對, tng teh ǹg頭前行, tī hia, góa lia̍h tio̍h重點: 有好食--ê無beh食, 有好khang--ê無beh báu, chiah有影厲害. 人ê力量原來hiah大, kā驚惶ê感覺lia̍h tiâu, lí就會tàng控制ka-tī, lia̍h tio̍h lí想beh確定--ê.

有幾nā種力量tī內心teh相khiú, soah thàng到上內底, 人ê上內底. Tī hia, 平靜hām不安相óa, 烏暗hām光明做夥, 驚惶hām勇氣tàu-tīn, 希望hām絕望隔piah. Lí kám知? Tī hia, lí bē逃避驚ê感覺, lí知iáⁿ海總--是會pōng tio̍h陸地.

Beh到--a, ká-ná tih beh到--a, beh到上平穩ê hit-tè地--a.

Góa ká-ná看tio̍h歷史, mā看tio̍h革命者, beh開始看hō͘斟酌, 看hō͘清楚, 雖bóng霧霧, 總算是出現--a.

Lán ê歷史--nih有jōa chē人有這lō機會? Góa bē hō͘走--去, bē kā phah損--去. Peh--起-來, 看世界àn ka-tī ê內心khiā--起-來!

人ê力量是無限大--ê! 起--來! 起--來! 死--去ê心, hòe-hoa--去ê性命, 起--來!

──《TGB通訊》第30期(2002/3)