前1-chām-á A-bî招我上i ê電台節目, 分享1-kóa cha-bó͘人ê想法, chiok久無chham人án-ne討論cha-bó͘人ê議題--a, éng-kòe tī社團, 我hām Ahong會sái講che講thàu暝, 出業了後, chit款機會顛倒khah chió.
Kap A-bî做夥討論ê 3篇文章是「走chhōe信仰, thiàⁿ kap分享」(A惠), 「Ka-tī ê房間」(嘉芬)kap「藝術品」(劉雅琪), chit 3篇文章kā cha-bó͘人tī社會ê地位, tī家庭ê角色, kap hō͘外界束縛ê價值觀寫kah chiok活跳, tī chia, mā想著用cha-bó͘人ê形體tī社會生存ê ka-tī.
M̄知ùi siáⁿ-mih時chūn開始, chit ê世界開始pun cha-po͘ cha-bó͘? Mā m̄知ùi siáⁿ-mih時chūn開始, cha-po͘ cha-bó͘無kāng款ê標準hông訂gah chiah-nī清楚, chiah-nī嚴格, 連食飯, 放屎, 講話ê聲sàu mā hông訂死死? Tī時cha-bó͘人tī chit ê社會hông看soe-siâu? Bē-sái有想法, bē-sái妝了bái, bē-sái主動追求ka-tī ê權利hām幸福, bē-sái做ka-tī ê主人, siáⁿ-mih tāi lóng ài照沙文ê價值觀kiâⁿ, tī chit種無尊重人性ê社會規範內底, m̄-tāⁿ cha-bó͘人hông扭曲, 連cha-po͘--ê mā hō͘ chit種game rules bú gah m̄-chiâⁿ人--去.
Chit-chām-á siōng時kiâⁿ ê話題就是『璩美鳳偷拍案』, ùi tāi-chì piak-khang到案件審問, ta̍k-ê lóng teh討論『璩美鳳』個人ê行為, 媒體lóng teh報『偷拍光碟』iáu有siáⁿ-mih版本, 男主角是siáng, koh有jōa chē有頭有面--ê kāng款有『情色風暴』......chit款氣氛m̄-tāⁿ ka-chài ka-tī m̄是『偷拍案』ê主角, ká-ná koh有看好戲ê味.
Chit件tāi-chì piak-khang, 是社會問題, m̄是單純ê個人事件. 當然, tī chia個人ài負責任, chit-ê變態ê社會, m̄-tāⁿ縛死cha-bó͘人ê頭殼, koh tēⁿ死cha-bó͘人ê身體, ùi éng-kòe ê『貞節牌坊』, 『三從四德』, 到現代ê『美麗新女人』, cha-bó͘人對ka-tī ê頭殼kap身體lóng m̄-bat有自主ê權利, 永遠m̄是獨立ê個體, kan-taⁿ因為i是「cha-bó͘人」.
到21世紀, 女性主義kún-ká--過了後, tī「性自主」, 「性解放」ê口號hām具體行動下kha, lán soah看tio̍h 1-kóa cha-bó͘人追求ka-tī ê權力ê時, 顛倒teh符合cha-po͘人ê價值觀, 結果koh反tò-tńg--來hō͘社會批判鎮壓, chit點lán tī『璩美鳳』『陳文茜』chia就看gah chiok清楚.
In 1手giâ女性主義ê大旗, hoah beh爭取cha-bó͘人ê權力, 私底下soah運用ka-tī ê智慧hām妖嬌美麗, 用ka-tī ê身軀做買賣, 交換個人ê政治地位kap經濟利益, tī chia, in m̄-tāⁿ扭曲女性主義ê原則, koh傷tio̍h另外1 ê cha-bó͘人(hiah-ê cha-po͘人in bó͘) ê尊嚴. 有影看無hit kóa「進步」ê婦運團體teh聲援siáⁿ-mih?
批判『璩美鳳』了後--leh, 社會對人ê規範kám就有châi-tiāu逃避責任? 呂秀蓮講gah chiok好: 若是社會bē-sái容允1 ê『璩美鳳』, án-ne是án-chóaⁿ beh繼續容允koh khah chē cha-po͘ ê『璩美鳳』? Lán ài--ê是一致ê標準, m̄是雙重標準, hiah-ê享受『璩美鳳』身軀ê cha-po͘人bih tī toeh? In kám免負責?
是án-chóaⁿ cha-po͘人有複雜ê性關係m̄免接受社會譴責, 顛倒hông o-ló『人不風流枉少年』? 像張俊雄, 黃義交......, tī外口烏白來, lām-sám-tāi piak-khang了後, 請正牌bó͘出來背書就船過水無痕, 有--ê koh反tò-tńg--來官愈做愈大, 聲望愈來愈kôan. Ah cha-bó͘--ê是án-chóaⁿ顛倒ài擔chit種社會壓力?
Lán beh追求--ê是有人性, 尊重個人選擇ê社會價值觀, cha-bó͘人beh對抗--ê m̄是cha-po͘人, 是chit ê社會體制!
留言列表
