西螺tī góa ê心內, 本來m̄是真特別ê所在, m̄-koh經過chit 5工了後, góa發現ka-tī已經有法tō͘思考chiok chē m̄-bat思考ê mi̍h件.
Tī西螺chit 5工, 當然免不了ē sì-kè pha-pha走, mā參觀真chē Pi-thâu社區ê古厝kap景點. M̄-koh góa感覺siōng特別ê tāi-chì是góan tú-tio̍h 1 ê「超級社區營造師」林--先-生, i是米ká工場ê頭家, 1年前開始做社區總體營造ê khang-khòe, i ê出發點是為tio̍h beh hō͘ kui-ê Pi-thâu-pòe koh khah súi.
M̄-koh有改變tō有反彈ê聲, 甚至有ê所在, 人根本to無愛chhap--i, m̄-chiah kap i開講ê時, góa ē-sái感覺tio̍h i ê無奈, mā ē-tàng體會i ê辛苦. 若khiā tī里民chit pêng, in koh án-chóaⁿ想--leh?
Tī chit 2工ê訪問過程, góa發現有ê人無chiâⁿ同意林--先-生ê做法, 像有ê人認為林--先-生做tāi-chì siuⁿ chhóng-pōng, lóng無kap人參詳. Góa想, che是chiâⁿ值得思考ê tāi-chì: 問題到底出tī林--先-生, iah是chit-kóa里民?
其實, 社區營造本來tō是1 tīn人ê tāi-chì, m̄-koh自底以來, 台灣tō無chit種觀念, chiah ē造成Pi-thâu-pòe chiah-nī chē問題. M̄-tāⁿ是Pi-thâu-pòe, góa相信che是kui台灣所有社區ê問題.
Lán應該án-chóaⁿ做? Lán kám ē-sái kā所有ê問題lóng放hō͘時間去解決? 今á日ê困擾, kám講5年後iah是10年後tō ē自動hō͘時間化解了了? 無法tō͘避免--ê, che一定需要時間, m̄-koh 1 ê社區ê推動者kap居民ê互動, chiah是koh khah需要phah拚ê所在. 互相體諒, 了解kap共識chiah是真正ē-sái hō͘ chit ê社區團結--起-來ê救命藥á.
Lán ǹg望社區營造bē變做1~2 ê人ê tāi-chì, 有ta̍k-ê ê真心參與, lán chiah ē-sái hō͘ lán ê環境koh khah好!
◎第8屆台語生活營(2004/6/26-30)專刊
留言列表