冬, 是四季之1, mā是人類時間計算ê單位. Tī草地大hàn ê pa-pa, chēng ē行路tō tī田--nih tàu choh, i bat kā góa講, chhek-á 1冬ē-sái收2 kái, 1 piàn是4月冬, 1 piàn是10月冬, i koh講, 中國話講ê 1年, góan lóng講 1冬, che m̄-tāⁿ是因為冬過春tō來, 代表koh 1 kái ê循環, koh khah重要--ê是, 冬是收成ê季節, 1冬ê辛苦盡看tō看chit kái, m̄-chiah對 i來講,「1冬」m̄-tāⁿ有one year ê意思, koh有收成, 理想, 希望ê意義.
SOI (生活營), TGB chē-chē活動之1. 出世tī台語家庭ê góa, chēng細hàn tō tī台語ê環境chhia-po̍ah-péng, 開嘴合嘴lóng是台語, kā人mē kā人o-ló, 甚至kā人表明 lóng是用台語, SOI若taⁿ-á強調台語, 對góa無siáⁿ-mih特別. O͘h! Góa減講1項, góa 1方面tī台語ê田園--nih吸收成長, 另外1方面mā tī烏烏臭臭, 紛紛擾擾ê政治氣氛--nih喘khùi, 1 pêng hō͘ góa養分pōe高, 1 pêng放毒氣hō͘ góa中氣bē順, che, 實在真衝突, 害góa無法tō͘放(hòng)膽落大, tńg-châiⁿ tńg無siáⁿ過.
Ta̍uh-ta̍uh-á, góa tī TGB chhōe-tio̍h chi̍t-kóa解釋大了無kôan, 生了無súi ê緣故. Ta̍k冬ê SOI變做góa chiok重要ê schedual, tī ta̍k冬ê營隊--nih, 熟sāi新ê朋友, 了解新ê議題, mā面對舊底ê自我, 批判頭殼--nih過時ê價值觀. 比較「冬」對pa-pa ê意義, góa想以後góa計算冬ê單位, tō beh kā講做SOI, ia̍h tō是, lín講 1冬ê時chūn, góa lóng講做「1 SOI」.
2000~2003, ia̍h tō是góa teh講ê頭3 SOI, 課程安排khah重tī教室--nih討論, 議題有文學, 歷史, 女性, 自第4 SOI了, góan kā學習ê所在徙去社區(社會), 工人kap choh-sit人tō是góan ê講師, ta̍uh-ta̍uh-á tī chia印證(衝突) chi̍t-kóa chìn前講kah嘴角全pho ê理論.
頭3 SOI, kā重心hē tī純意識ê覺醒. 當ka-tī知iáⁿ hông欺騙hiah久, kui-ê人ē氣chho̍ah-chho̍ah, 精神peⁿ kah chiok ân, 眼神憤怒kiōng beh噴火--出-來, 講話聲sàu真bái, bē-su beh kā某1 ê無形ê對象thiah食落腹; 因為án-ne ê情緒帶動, 對別人要求真kôan, 擋bē tiâu人無講台語, m̄知台灣史, siāng氣--ê是知koh bē怨恨ê人.
經過 1 pái koh 1 pái ê討論, góa知iáⁿ kā góa欺騙, 屠殺祖先ê冤仇人, m̄是具體ê個人, hit ê bē-su sa無phīⁿ無ê對象號做體制, 體制ê起造者是外來--ê, lán mā有人kā tàu起--tio̍h. 雖然真chē人m̄是實際kā in tàu做, iah m̄-koh kek-tiām-tiām, tō是容允 i 繼續chau-that弱勢者, 事實上, ta̍k-ê lóng是共犯.
真相愈明, 愈siūⁿ-khì, án-ne落--去根本無才tiāu giú人來了解歷史, 參與運動. 斟酌kā想, 學生gín-á hō͘人am-khàm洗腦ê場所 lóng tī教室(室內空間), hōan-sè聽某1 ê教授講課, iah是看冊chhōe-tio̍h破phāng mā是tī教室, 若準 lán oan-na kā頭殼kha步停留tī室內, hō͘虛幻ê空間(m̄是真正tín動ê社會)縛tiâu--leh, án-ne lán無才tiāu chhōe-tio̍h出路.
為tio̍h走chhōe活路, m̄是beh做爽--ê, 做心酸--ê, 做安慰--ê, SOI 2003開始行入社區, 接觸--ê有埔里Taⁿ-bí-kheⁿ, 西螺Pi-thâu-pòe......, 因為án-ne góa開始有能力理解chit ê社會是án-chóaⁿ hiah chē人kek-tiām-tiām? 是án-chóaⁿ人lóng無覺醒? Góa kā道德式ê要求phiaⁿ去邊--á, peⁿ真ân ê情緒, 自án-ne放鬆--落-來, 對個人性命beh chóaⁿ樣實踐運動, mā得tio̍h chi̍t-kóa-kóa啟示.
921地動, 迫Taⁿ-bí-kheⁿ面對社區重建, in用生態村來做社區ê mà-kuh, ta̍k-ê chò-hóe參詳社區beh án-chóaⁿ做一體性ê建設. Chit款型態, 是siāng世俗化ê理由, 若m̄是地動chit ê chhiàng-suh, nah有可能ta̍k-ê坐落來討論社區beh行tùi toh, éng-éng lóng是隨人起隨人ê, nah有整體ê概念?
西螺Pi-thâu-pòe ê客觀環境tō真bái--a, in無生活上ê迫切性, beh用siáⁿ-mih來吸引居民投入社區營造? Taⁿ-bí-kheⁿ ê居民知 iáⁿ in若隨人bú隨人ê, 生態村(4-kha-á, 田eⁿ, làm-á) tō顧bē起--來, Pi-thâu-pòe無beh做生態村, 比較--起-來, koh khah oh kho͘人, m̄-tāⁿ án-ne, i koh面對人口外流ê危機, tī chia soah hō͘ góan發現Pi-thâu-pòe ê問題, 是農業問題, 產業政策kui-ê ká chò-hóe, beh提高 in ê公民意識來參與社區ê tāi-chì, tio̍h-ài kā kui-ê結構phah破chiah有可能.
台文運動tú--tio̍h ê困境, ká-ná hām Pi-thâu-pòe beh kâng beh kâng, 對大多數ê台灣人來講, 建國, 台文mā無迫切性, lán憑siáⁿ-mih kā in giú來運動? 語言問題hām性別問題, 勞工問題, 環境問題牽chò-hóe, lán若kan-taⁿ beh bih tī大學內底開研討會, 為tio̍h chi̍t-kóa幼chat ê問題chìⁿ kah ta̍k-ê pháiⁿ看面, án-ne mài講起國, 到底是án-chóaⁿ beh bú台文, hōan-sè tō hoe-hoe--去.
5 SOI改變góa人生ê路向, hō͘ góa看tio̍h個人性命hām社會國家ê牽連, 了解tio̍h覺醒是tī行動m̄是意識, 是chiâⁿ做性命ê計畫, 甚至性命ê 1部份. 對góa來講, SOI tī 2000年變做計算冬ê單位, i hām pa-pa ê「冬」kāng款, 有收成, 理想, 希望ê意思, ǹg望用熱情做基礎, SOI ē-tàng影響koh khah chē人, kā運動pìⁿ-chiâⁿ性命ê 1部份, 愈來愈chē人kā 1冬講做「1 SOI」.
留言列表
