台灣組合

接到電話時，我正在看下午拿到的小林多喜二寫的《1928.3.15》這本書。

那時候，日本政府對共產黨展開大掃蕩，「一個集團，以一樣的行動走向一樣的方向的時候，所有原本存在的差別卻因此消失，變成同樣的心情！……他們的手臂大力地牽在一起，肩膀和肩膀擠在一起；黑而犀利的眼睛望向前面～他們唯一的目標——“革命”。」

我不相信，存在感這麼大的你，怎會這麼快就離開。

還未認識你之前，我就常聽到你的名字。經過一回又一回的聚會，使我對你有愈來愈深的了解。

積極、認真是你一貫的態度，冷靜、理性是你的風格，為了理念打拚是你對正義的堅持。不止是學生，連你的同志都從你的身上發現自己的欠缺，想向你學習。長昇，對抗病痛長長的日子裡你勇敢面對，沒有給自己任何藉口，你堅定向前走，去過每一天有意義的日子，你的人生態度實在讓我很欽佩。

長昇，認識你是我很大的光榮，你是重要的同志，你是我們寶貴的兄弟。雖然失去你是我們共同的痛，不過你此生已經寫下精采的記錄，所以我要替你歡喜，因為你已經遠離病痛。

長昇，我將會記住你的笑容。因為你對台灣的愛，我相信：你只是缺席，並未離開。

接tio̍h電話ê時chūn, góa tú tī leh看e-po͘ the̍h--tio̍h ê小林多喜二寫ê《1928.3.15》chit本冊.

Hit當時, 日本政府對共產黨展開大清掃,「1 ê集團, 以同款ê行動行向kāng款ê方向ê時chūn, 所有原底存在ê差別soah來消失, chiâⁿ做kāng 1款ê心情!...... In用手骨大力sio牽chò-hóe, 肩胛kap肩胛kheh tàu-tīn; 烏koh lāi ê目chiu看tùi頭前~ in唯一ê目標——“革命”.」

Góa m̄相信, 存在感chiah-nī大ê lí, nah ē chiah-nī-á趕緊beh來離開.

Iáu-bōe se̍k-sāi li chìn前, góa tō不時聽tio̍h lí ê名. 經過1回koh 1回ê聚會, hō͘ góa對lí有jú來jú深ê認bat.

積極, 認真是lí一貫ê態度, 冷靜, 理性是lí ê風格, 為tio̍h理念phah-piàⁿ是lí對正義ê堅持. M̄-nā是學生, hām lí ê同志lóng ùi lí ê身上發現ka-tī ê欠點, 想beh向lí學習. Tiông-seng, 對抗病疼長長ê日子--nih lí勇敢面對, 無hō͘ ka-tī借口, lí堅定向前行, 去過每1工有意義ê日子, lí ê人生態度實在hō͘ góa真欽佩.

Tiông-seng, se̍k-sāi lí是góa真大ê光榮, lí是重要ê同志, lí是góan寶貴ê兄弟. 雖然失去lí是góan共同ê疼, m̄-koh lí chit世人已經留下精采ê記錄, 所以góa beh替lí歡喜, 因為lí已經遠離病疼.

Tiông-seng, góa ē kā lí ê笑容記tiâu--leh. 因為lí對台灣ê愛, góa相信: lí kan-taⁿ是欠席, 並無離開.

──《TGB通訊》第119期(2009/8)