入秋了後ê淡水街á頭有tām-po̍h-á冷, m̄-koh ta̍k-ê心內lóng無sió-khóa-á kôaⁿ ê感覺, 因為góan kap 1 ê真趣味mā真熱情ê人chò-hóe, tī leh 1 ê無jōa大ê所在mā感覺溫暖, chit-ê人就是互助兄.
互助兄10外歲á就來到台北做sai-á, hit當時ta̍k-ê生活lóng無好過. 互助兄高中出業了後, tāi先tī台北西門町萬國戲院邊--á ê理髮廳做三七á, 經過2個外月, 互助兄kap hit-chūn ê少年起衝突, 就koh tńg去下港, m̄-koh下港確實pháiⁿ過日, 互助兄18歲ê時koh來到台北, tī 1 ê朋友ê理髮廳做khang-khòe, 真長1段時間了後, 互助兄來到淡水, ka-tī開理髮廳, 尾--á換牽手經營, ka-tī去送海產.
互助兄chit-ê人真開朗, kā góan講海產, koh講tio̍h i細hàn庄kha所在ê生活, i koh講tio̍h ka-tī細hàn ê時, tī大林偷走去看脫奶舞ê tāi-chì. Chit-kóa tāi-chì講kah hō͘ kui厝間ê人笑hai-hai, 看bōe出來講, 其實互助兄本chiâⁿ是講話細聲, mā無siáⁿ敢發表ka-tī想法ê人, 對政治1-sut-á都m̄-bat, m̄-koh自參加「青年電台」了後, 接觸tio̍h無kāng款ê觀點, mā kap真chōe人chih接, chiah ta̍uh-ta̍uh-á kā ka-tī ê心phah--開, chit-má互助兄已經是i作sit hit-ê所在ê意見領袖, mā真有ka-tī ê想法, siōng kài明顯--ê, 就是ta̍k-kái選舉, 互助兄lóng會專工tńg去嘉義舊厝tǹg廢票, 別人選舉是有錢thang thio, m̄-koh互助兄選舉顛倒ài ka-tī開錢坐飛lêng機走tńg--去tǹg廢票.
做電台ê時, 互助兄參加街頭遊行lóng是sù常--ê, i mā tī電台節目--nih講bōe-chió批判ê言論, kan-taⁿ為tio̍h 1 ê理想teh衝, mā是àn chit-chūn chiah開始學台文. I店ê khangpang就用台文羅馬字寫「Tek Ko Chhu」.
為tio̍h 1 ê kap別人無kāng款ê理想, 互助兄bat hō͘保七總隊chhōe麻煩--過, 店á ê khangpang mā bat hō͘人lòng破kúi-lō-kái, 真chōe時chūn, i ê朋友bōe-tàng理解i ê想法, m̄-koh互助兄lóng知iáⁿ ka-tī beh做siáⁿ, bōe hō͘人影響, 不時mā kap人辯論意見.
互助兄有時á mā真感慨kong, chit-má ê台北gín-á lóng bōe-hiáu講台語--a, i講tio̍h ka-tī tī厝--nih會要求gín-á講台語, m̄-koh gín-á tī外口iah是學校lóng講北京語, 致使tiàm厝內6~7成mā lóng teh講北京語. Chit-má ê社會, 連互助兄chit款真有意識ê人, 都無法tō͘改變chit款情形, án-ne是m̄是問題會愈來嚴重? Lán真正tio̍h好好á思考, mā tio̍h khah緊形成台灣人ka-tī ê意識.
Kap互助兄開講, hō͘我看tio̍h 1 ê我m̄-bat接觸--過ê世界, 知iáⁿ 1 ê人ê改變, mā看tio̍h i ê熱情, che是lán chit代ê gín-á kap in bōe-tàng比phēng--ê. 看tio̍h互助兄, hō͘我想真chōe, mā思考tio̍h後pái beh án-chóaⁿ行--落, 雖bóng chit-má ê少年á對身軀邊ê tāi-chì lóng無關心, ah是lóng m̄-bat, m̄-koh聽著互助兄1路行--過ê心內話, 我soah感覺lán ê未來koh有tām-po̍h-á ǹg望, koh有tām-po̍h-á光線.
留言列表
