背景
少年人ê熱情往往是推動社會進步ê動力.
1987年, 台灣解嚴, 本底hō͘國民黨束縛tiâu--leh ê社會力得tio̍h tháu-pàng, 各議題ê社會運動kā台北街頭bú kah lāu-jia̍t滾滾, 1990年代前後大學校園內底mā反映chiah-ê社會變化, 成立chiâⁿ chē學運性社團, 台語文社團是其中1款.掌控被統治者ê歷史kap語文, 是統治者在來ê手路, 語言koh是曲別lí góa無kâng siōng簡單ê證明, 台語文社團ê成立, 有反外來統治, 追求台灣人解放ê深層意義tī--leh.
1993年7月16-19, 台大台語文社tī金山舉辦第1屆高中生台語生活營, 營隊結束了後, 學員董耀鴻tńg去tī ka-tī ê學校台北市大同高中成立台語社. 1994年hioh-jo̍ah, 台大台語文社繼續tī新店舉辦第2屆高中生台語生活營, 營隊soah, 為tio̍h beh維持高中生ê聯繫, 開始籌備「高中生台灣語文促進會」, 1995年4--月正式成立, 6--月kap入去「學生台灣語文促進會」. 語文自覺ê種籽, mā tòe董耀鴻高中畢業考tiâu花蓮師範學院, iā入去到保守ê師院校園.花師台語文社ê成立, ē-sái講是赴tio̍h 90年代校園台語文運動ê尾班車.
初期
花蓮師範學院台灣語言文化研究社(簡稱台語文社) tī 1997年3--月成立, 創社社長是董耀鴻(Abon), 社團指導老師是社會科教育學系教授康培德. 社團宗旨是學習各族群ê母語文化. 社團成員各族群lóng有, 包括各族原住民, Hō-ló, Hak-ngin, 大部份是kap董耀鴻kāng班ê社教系學生.
成立頭1冬, 社團活動以母語學習課程為主, 利用ta̍k工chia̍h-tàu ê時間, tī社團辦公室進行母語ê聽講課程, 由社員輪流負責主持ka-tī ê族語教學, 拜1是「Pangcah語教學」, 拜2是「Truku語教學」, 拜3是「Bunun語教學」, 拜4是「Hakfa教學」, 拜5是「Holo語教學」, mā利用BBS kho͘社員練習寫羅馬字. 計畫學習到一定階段ê時, chiah koh去部落考察, hō͘社員除了學習其他族群ê母語以外, koh thang進1步了解部落ê歷史kap文化.
1997/7/5-8, 參與籌備辦理高中生台語生活營: 有董耀鴻參與「學生台灣語文促進會」chit層關係, koh來ta̍k冬hioh-jo̍ah lóng ē kap其他學校ê台灣研究社團tàu-tīn舉辦高中生ê台語生活營. 10/18-19, kap台灣大學台灣語言文化研究社, 政治大學台文社, 淡江大學台灣語言文化研究社, 世新大學台灣研究社, 東吳大學母語社, 中正大學台灣語言研究社, tī創國基金會野人谷營地chò-hóe舉辦台灣研究社團聯合迎新. 12/19, 參加玉山神學院聖誕暗會, 上台演唱1條Pangcah ê歌, 1條Tso͘ ê酒醉歌. 1998/2/6-9, kap台灣教授協會koh有各校台灣研究社團tàu-tīn舉辦青年營.
1998年頂半年, 思考各族群應該有ka-tī ê學生社團, thang加深學習族群ê母語文化, 開始積極籌備「部落社」kap「客家社」. Chit學期主要ê活動有3/7吉安田野之旅: tī Pangcah社員in tau ê農地體驗choh-sit ê艱苦, 學習Pangcah辨識野菜ê技巧, 訓練野外求生ê能力, koh有聽Cikasuan (七腳川社)老人講古, 了解Cikasuan Pangcah ê歷史kap生活方式. 3/13舉辦母語歌唱比賽: che是花師校園頭pái舉辦ê母語歌唱比賽, 吸引不止á chē人tàu-lāu-jia̍t, 大約á有1,20 ê人報名參加. 4/2-3 Bunun文化之旅: 參觀台東延平鄉桃源村ê布農文教基金會, 聽負責人白牧師講Bunun ùi文化流失到布農部落復興, 傳統文化重新受tio̍h族人重視ê過程. 7/5-8 tī基隆海洋大學舉辦高中生台語生活營, chò-hóe籌備辦理ê社團有花師台語文社, 海洋大學鄉土研究社, 台大台語文社, 中興台語文社, 淡江台語文社, 交大台研社, 世新台研社, 政大台文社, 師大人文學社.
1998年9--月,「部落社」kap「哈客社」成立, 台語文社choaⁿ-á專注tī台灣歷史, 台灣文學kap台語文ê學習, ta̍k學期初lóng ē安排羅馬字課程, 社員用母語交談, 學習, 主張「嘴講台語, 手寫台文」ê生活運動. 學期初kap學藝性社團tàu-tīn舉辦校內聯合冊展. 11/27邀請台語詩人兼作家陳明仁分享台文創作過程──「小說kap咖啡」. 12/11-12去玉里田野考察. 另外, mā支援部落社tī BBS頂kôan kap山服社對戰救國團式ê「山地服務」對原住民部落ê文化侵略kap消費行為.
中期
1999年頂半年, 做2冬社長ê董耀鴻kā社長位交hō͘王寶漣(Tōa-thâu-liân), 社員有社教系董耀鴻, 康伶妃(A-hong), 莊建鋒, 陳淑金, 陳勁航, 李家賢, 語教系曾筱婷. Chit學期kāng款有羅馬字課程, 由資深社員分組教學. 3/24 kap部落社, 哈客社, 慈濟醫學院原動力社合辦母語歌唱比賽, iû-gôan吸引不止á chē人參加. 3/29 kap台灣教授協會合辦台灣問題入公投法巡迴演講, 邀請台灣獨立聯盟主席黃昭堂主講「台灣咱ê夢」. 4/14是《海翁》(蔣為文著)台灣史讀冊會. 4/20 kap哈客社合辦《褪色的藍衫》記錄片欣賞, 邀請導演林筱芳座談. 4/23看電影《失樂園》,《熱帶魚》. 4/28看記錄片《二月風暴》,《520事件》,《土城事件》. 5/11-12舉辦台灣文學kap台灣歌謠座談會, 再度邀請陳明仁主講. 5/22組團去台北拜訪運動界ê sianpai, 有《台灣人400年史》ê作者史明,《簡明台灣史》ê作者楊碧川, 台語詩人陳明仁, 台文工作者陳豐惠, 台語學生Looⁿg等等. 7--月參與籌備辦理高中生台語生活營(台東布農部落). Chit學期有淡江大學畢業ê學長陳德樺來tàu o͘-ián, chhōa ta̍k-ê了解台灣ê反體制運動kap歷史, kāng時chūn mā積極kap ta̍k-ê討論重組學生台灣語文促進會ê計畫.
1999年下半年, 換陳淑金做社長, chit學期主要是社會主義ê讀書會, ta̍k禮拜利用hioh-khùn日ê時間, 由逢甲大學畢業ê學長, mā是勞工運動kap環保運動工作者ê林長昇chhōa ta̍k-ê讀《社會進化與人類出路》(E. Mandel著). 另外, mā邀請大漢技術學院教授楊允言講授台語文課程. 11/4邀請台灣史kap社會主義運動史研究者楊碧川主講台灣史概論──「Lim茶講台灣」. Chit學期社員mā積極籌備「台灣查某社」(tī後1學期成立).
2000年頂半年, 社長林雅玲, 社員有社教系康伶妃, 陳淑金, 王寶漣, 蕭幼丹, 語教系曾筱婷. Chit學期再度邀請楊允言講授台灣羅馬字ê課程. 3/29邀請台文工作者陳豐惠分享「台文運動kap婦女運動ê參與經驗」. 5/3邀請陳明仁演講「Pha荒ê故事」. 5月中舉辦台語卡通影片欣賞, 有《風之谷》,《魔女琪琪》,《叮噹貓》等等. 另外mā安排3 pái ê寫作會, hō͘社員練習用台語思考, 用羅馬字寫文章. 7/5-9參與籌備辦理「TGB全國高中生台語生活營」(新竹基督長老教會聖經學院).
2000年下半年, 社長王寶漣, 社員有社教系陳淑金, 林雅玲, 陳勁航, 李家賢, 江秀紋, 蕭幼丹, 杜佳燕, 謝秀靖, 語教系曾筱婷, 初教系林彥廷, 劉秋南, 美教系吳青樺, 自然系廖益祥, 林家鋒, 鄉土所簡明捷. 台語文社成立到taⁿ, 社員人數一直維持tī 8 ê到10 thóng ê, chit學期社員人數ē增加到16 ê, kap國校á teh-beh開始有鄉土語言課程有chiâⁿ大ê關係. Chit學期iû-gôan tī學期初先安排羅馬字教學. 2禮拜排1工做台灣史讀冊會, 讀楊碧川ê《簡明台灣史》; 台灣文學讀冊會kāng款是2禮拜1 pái, 讀呂赫若ê《牛車》. 10/12是社團歌唱會. 10/21-22, kap哈客社, 查某社, 慈濟反社, 慈濟女社, 政大台文社, 台北大學青年社, 清大台研社, tī花蓮鯉魚潭舉辦聯合迎新, 邀請林長昇kap陳德樺分享in ê運動經驗. 10/26邀請簡明捷(小泰山)講古「台灣廟會」. 11/2邀請chhím the̍h tio̍h米國Hawaii大學語言學博士, tńg來tī東華大學英美語文系教冊ê李勤岸演講「從台語文學看語言政策」. 12/14 kap慈濟反社合辦邀請楊碧川演講台灣史. Ùi 2000年開始, 社團換請楊允言做指導老師, i koh義務替社團設網站, 社團mā借chit ê機會, kā khah早ê社團資料péng-péng收收--leh整理好勢.
尾期
2001年頂半年, 社長林彥廷, 社員有社教系陳淑金, 王寶漣, 杜佳燕(副社長), 蕭幼丹, 語教系曾筱婷, 初教系林珮華, 美教系吳青樺. Chit學期主要ê活動有舉辦台文寫作比賽, che是社團指導老師楊允言為tio̍h beh鼓勵社員用台文寫作建議舉辦--ê, koh ka-tī提供比賽獎金, sui-bóng kan-taⁿ社團ê人報名參加, m̄-koh確實hō͘社員有bē-bái ê台文寫作經驗. 另外1項是花蓮社運工作者採訪計畫, lō͘尾採訪tio̍h環保聯盟花蓮分會會長鍾寶珠, koh有Kavalan a-má朱阿比, 採訪記錄尾手Tōa-thâu-liân整理刊tī《TGB通訊》第32期〈看著海翁〉kap第56期〈Kavalan a-má〉. 7/5-9參與籌備辦理「TGB第5屆全國高中生台語生活營」(新竹基督長老教會聖經學院).
頂1學期sui-bóng招tio̍h bē-chió社員, m̄-koh khah phah-sńg--ê是hit-chūn無利用國校á鄉土語言課程chit ê「誘因」做招生策略來kho͘人, 致使人留無tiâu. Koh, 核心社員lóng 4年á--a, tio̍h準備畢業實習ê tāi-chì, 無thang á繼續hōaⁿ社團. 接社長位ê林彥廷, kiám-chhái是khah欠經營社團ê經驗, ta̍k禮拜ê社團活動時間tiāⁿ-tiāⁿ pàng空城, tī學期尾通知講無人thang á接社長, tō pàng hō͘倒社--a.
花師ê學生大部份是ùi中南部來--ê, 照講台語使用無問題, m̄-koh實際上ta̍k-ê iáu是kòan-sì用華語溝通, mā因為ta̍k-ê加減lóng有台語基本ê聽講能力, koh-khah bē重視母語ê推sak, 無母語意識. Koh, 花師學生參與社團ê比例相對khah kē, 其中服務性社團(像康輔社, 山服社)是khah chē人參加--ê, 學藝性社團(台語文社屬tī chit類) beh招生tō khah oh, m̄-chiah台語文社主要ê核心成員一直維持tī 5-6 ê hia.
Sui-bóng花師台語文社ê歷史無kúi冬, 社員人數mā一直無chē, m̄-koh góan mā是用心計較想齣頭teh kho͘人, ta̍k不時to sio招chia̍h飯, 烘肉, chhit-thô, 洗溫泉, 普通時á tō利用BBS phah-lā涼, 練羅馬字, 若無tō是tī社團辦公室khai-káng phò-tāu, 聽老歌看電影. Chit-chūn kā看, 花師台語文社ê校外聯繫phēng校內經營ê成績khah好, kap花蓮在地ê社團koh有台北ê社團lóng有保持bē-bái ê合作機會. 確實, 台語文社beh tī保守ê師院校園推sak有khah oh, koh再講, 90年代lāu-jia̍t滾滾ê社會運動氣氛tī chit-chūn mā已經退燒--a, 若beh有khah好ê校園經營, kiám-chhái tio̍h koh-khah敏感觀察大環境ê變化, koh-khah幼路運用相關議題設計活動.
話尾
Tī接tio̍h施俊州兄ê邀稿chìn前, 花師台語文社iáu無1份完整ê歷史記錄. Sui-bóng 2000年ê時, bat整理社團資料準備上網, 總--是無完整, góa mā一直到chit-chūn, chiah發現ka-tī手頭ê資料無chiâu. 無ka-tī寫歷史, 掌握解說權, 是花師台語文社siōng大ê欠點. Chit篇花師台語文社簡史, 算是òaⁿ來ê補記.
[編按] Chit篇文原發表tī《海翁台語文教學季刊》第10期(2010.12)
留言列表
