久無去宜蘭, 心肝內直直掛念tio̍h chhōe時間去穀東俱樂部bak田塗, 望ah望, 望到米糠hām苦茶phoh lóng iā了--a, 稻á pò͘--a, 連去thiah荒--去ê製材廠ê sit頭mā做soah--a, iáu bē to͘-ha̍p. 總算, tī松--哥kap眾穀東teh kap phē-á(稗草) chhia-po̍ah-péng, iáu-bōe戰chi̍t-ē輸贏chìn前, góan mā chhōe tio̍h làng-phāng去tàu出kha出手兼出chhùi. (去穀東俱樂部tàu-saⁿ-kāng ê朋友, kiám-chhái siōng期待choh-sit了thang chia̍h 1 tǹg粗飽. A-ḿ講人chē好chia̍h-mi̍h; 特別是勞動了, 飯菜ê滋味koh khah phang.)
Chi̍t-ē到位, Ilian chiàng tō chông出來路中ng teh kā góan ia̍t手, koh āng聲tùi內底hoah講:「In到位--a.」In chi̍t-tīn人chhím chia̍h飽tàu teh khai-káng, kúi-nā-ê穀東看--起-來chái-khí已經kap phē-á chhia-piàⁿ--過-a.
Ē-tàu Bí-hông chhōa góan去戰場. Tī岸邊tō看tio̍h hiah-ê草á teh對góan hǹg-hǹg笑. Bí-hông ho̍at-lo̍h khang-khòe了, 連beh記念結婚5週年ê Sonnie hām Sunny mā chhùi齒根kā--leh, ta̍k-ê chò-hóe liâu--落田. Chi̍t-ē àⁿ--落-去, 有經驗ê S sûi tō發現chiah-ê敵人m̄是phē-á. Ka-chài! 用手sió khau--chi̍t-ē tō起--來. 是講kui區田lóng是chit款叫bē出名ê草á, kiōng-beh乞食趕廟公ah過teh thèng-hāu出穗ê稻á.
穀東俱樂部頂3冬tī下湖á山ê水田租約到期, chit冬開始, 換租tī管理員khiā-ke sì-kho͘-ûi-á, án-ne來, Siông--哥beh巡田水mā khah利便. Bái tō bái tī chiah-ê田chìn前lóng休耕, 田性khah野, 草á籽mā chhàng khah chē, 結果有iáⁿ chit季ùi pò͘秧á到taⁿ, lóng teh kap phē-á chhiah-po̍ah-péng, Siông--哥講hōan-sè tio̍h戰到收割了chiah有thang hioh喘. 是講che mā m̄是全然bái, hioh-khùn--過ê土地, 養分khah飽, koh不時有動物á鳥á kap蟲thōa來chhit-thô做siū, 莫怪chit 6甲稻á雖bóng有草á teh sio-cheⁿ肥分, iáu是生kah青lèng-lèng.
稻á大欉--a, àⁿ落去khau草加減ē teh tio̍h稻á. O̍at頭看góan khau--過ê所在, 稻á mā phak kui-phiàn, m̄-koh chit-chūn mā顧bē-tio̍h hiah chē--a, kan-taⁿ ǹg望in ē koh khiā--起-來. Chit-chūn, 傳來tàu khioh草ê Ilian chiàng ê歌聲, 心情sûi輕鬆chiok chē.
解決草á了後, ta̍k-ê tī邊--á ê溝á洗kha手, chit-chūn chiah開始感覺kha手kap ām-á-kún koh chiūⁿ koh thiàⁿ, chi̍t-ē看, kui-phiàn紅kòng-kòng, 有o͘-bui-á kā--ê, mā有hō͘稻á koah--tio̍h-ê. Chit-má chiah知iáⁿ稻á利劍劍, ē koah--人!
尾暗á koh去另外1區戰phē-á, 一直到天色暗--落-來, phē-á稻á pun bē清楚ê時, 總算等tio̍h Bí-hông hoah收兵.
Eng暗身軀洗了, chim-chiok看kha手, 1 sûn過1 sûn, 連ām-kún to有, bē-su是hō͘刀á片liô--過ê款, 有ê koh hō͘稻á koah kah流血. 藥á boah了, kui雙kha kui雙手hiam-kì-kì, 燒hàⁿ-hàⁿ, 原來che tō是hō͘稻á koah--tio̍h ê滋味. Koh來, piān-nā chia̍h飯ê時, góa lóng清楚記tit chit款滋味.
Kah若khau草hiah kāu工koh thiám頭, chōaⁿ藥á siáⁿ款? Góa想tio̍h Sunny tī bolg ê留話:「我想再回答青松那天問我的問題. 經過兩天跟稗草艱苦的熬戰, 青松問我是否改變了對除草劑的看法? 沒有! 我並沒有改變. 因為, 我清楚記得第一次發現鳥巢的那份驚喜, 巢裡靜靜地躺著四顆白色點綴著紅點的鳥蛋, 每個人經過那邊都小心翼翼的. 接下來, 我們不斷看見成對出現的瓢蟲(他們正在做愛做的事咧), 看見稻葉上掛著蜻蜓早已褪去的殼, 後來更發現雙翼近乎透明的美麗蜻蜓們在交尾. 哇! 我們的田有這麼多生命! 再苦, 也要做下去啊! 然而, 說要比做容易太多, 出一張嘴總是比較快. 真正堅心守護著我們的田的人, 還是青松. 該說感謝的是我們這些穀東. 還有, 一路跟大家相挺作伴練笑話的美虹, 妳真的也是辛苦了.」
留言列表