有jōa久m̄敢探看ka-tī ê心境--a? 有jōa久無靜心kap ka-tī對話--a? Tiâu tī台北a-cha ê環境, tiâu tī ak-chak ê日常事工hām iù-chat ê討論, 1 kang過1 kang, 頭殼愈來愈tūn, 心境mā愈來愈bē清, mā愈無勇氣挑戰TGB現此時beh突破ê khám-chām.
7月初TGB台語生活營tī埔里5 kang, soah 1 khún頭hō͘ ka-tī kúi-lō車刺刻.
1998年初tòe Tsou (鄒) ê Voyu去in部落Saviki, chah--tńg-來-ê, 是心肝底滿滿ê刺刻kap giau疑: góa是siáng? Taokas, Hō-ló kap台灣人ê認同beh án-chóaⁿ chhiâu? Ka-tī到底是用siáⁿ款心態teh看待族群問題? 多族群共存ê mê-kak是siáⁿ? 族群平等beh án-chóaⁿ落實做具體ê態度kap行動? 多族群ê主體史觀hām族群互動koh tio̍h án-chóaⁿ形成? 各族群ê生存鬥爭, hō͘統治者利用來互相thún踏sio thâi, chit段歷史koh tio̍h án-chóaⁿ面對?
尾--á讀文權兄ê《海洋國家論》, 冊內底強調ê海洋性格, 一直tī頭殼內kún-ká. Chit-kái tī埔里, 賴牧師話句--nih, 真深刻teh反省族群sio-tak ê歷史經驗, hām起造平埔母文化史觀ê用心, hō͘ góa khǹg tī心肝底ê反省, 重頭chhiau出來思考: 若m̄願反省lán在地各族群互相thún踏ê過去, lán beh án-chóaⁿ起國? Lán kui-ê社會一直teh沉底, 若無文化kap價值認知ê徹底反省, beh án-chóaⁿ出頭天? 無chiah-ê反省, kan-taⁿ kui心teh sio-cheⁿ正名hām公投, kui心beh搶做體制頭人, beh án-chóaⁿ脫漢? Beh án-chóaⁿ起造海洋性格ê國家? Beh án-chóaⁿ chiâⁿ做一流ê民族?
Hit 5 kang, 賴牧師mā熱phut-phut引góan sì-kè去看, tī Shapiz Batu ê工作室, i用平順ê口氣, kā góan講 i本chiâⁿ是Thao (邵族)唯一ê乞食, án-chóaⁿ tī沉底了後koh重頭khiā起; tī Auran, góan看tio̍h外來者kúi百冬ê同化, 無才tiāu消滅Pazeh ê命脈; tī Kahabu, 隆川兄大聲kā góan講 i tō是四庄番; tī Taⁿ-bí-kheⁿ, góan看tio̍h 921地動了後, in組織社區自主ê意識kap力量, kā pha-hng--去ê庄頭, 變做kiáⁿ孫ē-tàng重頭khiā起ê田園.
去過真chē「社區整體營造」ê所在, lóng無好印象, beh出發去Taⁿ-bí-kheⁿ ê時, 心內iáu是無siáⁿ期待, soah tī hia看tio̍h無kâng ê世界. Tī in hia ê lám-á地, kā góan chhōa路ê官--先-生, 用「孤島」kap「通路」ê概念, ùi生態環境講到Taⁿ-bí-kheⁿ重頭生ê道理, ùi 4-kha-á ê世界講到人ê社會, 性命ê kha-jiah hō͘ i用簡單ê話句, tō kā lán社會kap運動ê mê-kak點破.
Hit-kang中tàu kap「新故鄉」ê蔡小姐開講, i主動講tio̍h Taⁿ-bí-kheⁿ ê困境: 政府補助ê資源有限, 新里長koh消極teh抵制社區共同ê決定. Taⁿ-bí-kheⁿ ê未來mā tio̍h面對「孤島」ê危機, 行政官僚kap環保專家若無beh尊重chit-ê社區ê生存自主權, 民間社會若無beh吸收chit-ê社區重頭生ê經驗kap智慧, Taⁿ-bí-kheⁿ終其尾iáu是ē chhōe無通路, tī hia ta-lian--去.
Lán beh起造新社會, mā kāng款tio̍h面對「孤島」ê危機, kám m̄是? 台語文運動若猶原beh chiú tī教育kap學術ê技術問題--nih gô; 政治運動若kan-taⁿ是teh搶位搶議題; 環保運動若iáu tiâu tī數字ê分析kap比較; 勞工運動若無beh反省勞動群眾ê語言權hām文字權; 婦女運動若koh hāⁿ bē出中產知識份子ê kho͘-á; 原住民運動若kāng款是teh討資源......nah有才tiāu phah開通路? Nah有才tiāu chhōe-tio̍h活水?
7月初5中tàu離開埔里, 趕去台中參加TGB同窗會, 路--nih, chit 5 kang ê體會iáu一直tī頭殼內teh ká.
同窗會是台語學生10冬來ê成員聚會, 有Sêng-ûi, Chū-kèng, Loonng, Ha̍k-ian, Kiàn-hông, Siok-hūi, Sò͘-hūi, Chìn-kiông, Chì-úi, Chùn-ngó͘ hām TGB現此時ê幹部, 一直teh引chhōa台語學生ê川伯--á kap A-hüi mā專工來tàu鬧熱. Kui-tīn朋友sio-tú, 酒ná lim氣氛ná燒lo̍h, 老--ê kā少年--ê鼓舞, 少年--ê kā老--ê請教, Sêng-ûi兄koh特別khà電話去日本hō͘ Chheng-siông phīⁿ-phang, 電話--nih Chheng-siông兄ná像比góan khah歡喜, koh sio約môa年koh再招聚會, i百面ē趕--來.
食飯ê時, 看tio̍h Tōa-thâu-liân hām Ui-chì óa去Chū-kèng兄hia談chiâⁿ久; Tōa-thâu mā hām Chìn-kiông兄講kah嘴笑目笑; Loonng歡喜kah大嘴l„-sai-sai; Chiau-hông kap Lí-iòng sio-cheⁿ kā川伯--á敬酒; Bō͘-chin問講川伯--á nah ē bē老; Ha̍k-ian kap Siok-hūi ná食飯開講, koh tio̍h ná注意in hit-ê sì-kè pha-pha走ê hāu-seⁿ『小民民』. 實在是時間siuⁿ短, 無法tō͘隨ē-á隨ē講tio̍h話, góan同窗會àn-sǹg ùi今年開始ta̍k冬kā辦--落, 期待môa年chiah koh好好á來kā講hō͘ soah-phah.
Tńg台北ê路--nih, góa ê頭殼iáu是一直teh se̍h, 想講有sianpai開路引chhōa, TGB chit-má chiah-ê少年輩chiah有機會選擇行tùi chit條路來, 台語學生10冬--a, chit-kái聚會算是kā通路phah--開, hō͘無kâng ê性命tī chia交插, 互相刺刻mā互相鼓舞, ǹg望ē-tàng ta̍uh-ta̍uh-á chiâⁿ做社會變革ê活水!
◎第7屆台語生活營(2003/7/1-5)專刊
留言列表
