台灣組合

Tiāⁿ聽人teh講, 善kap惡, khiáu kap gōng, súi kap bái lóng隔1條線niâ. 若án-ne, 幸福kap危機--leh?

暗時, 是kui家伙á chò-hóe ê時間. A-pa比手畫刀teh chhàu-tōaⁿ i做兵ê tāi-chì, 講hit-chūn i是jōa-á-nī-á勇敢phiau-phiat, 講到激動ê時, koh會gia̍h手行禮, a-pa目chiu--nih ê光hō͘ góa感動. Kāng 1 ê時chūn, góa mā看tio̍h i chéng頭á包ê紗布.

A-pa做khang-khòe tńg--來一定先洗身軀. Tú入門就看 i kui-sian人siān-tauh-tauh, koh kui身軀臭汗酸味, kô͘ kah thái-ko nōa-lô; 身軀洗了 i chiah開始有精神. 20冬來, góa bē記得a-pa做khang-khòe ê艱苦, kap為góan chiah-ê gín-á ê付出.

「Pâ--á, lí手nah會tio̍h傷?」「Ah, 無siáⁿ--lah, hō͘釘á chha̍k--tio̍h niâ.」「有注破傷風--ê無?」「免--lah, hiah hùi-khì beh chhòng-á?」1時, góa責備ka-tī, tng góa tī學校嫌教室無an冷氣ê時, a-pa soah tī 30 kúi度ê環境teh做khang-khòe.

「Pâ--á, koh過7~8冬góa kap a兄就會thàn-chîⁿ--a, lí就會sái好好á hioh-khùn--a.」「Hah hah, lín老pē chit-má mā無thàn-tio̍h siáⁿ-mih chîⁿ ā!」Góa驚1 ē話講bē出--來. A母接話講:「Lín pâ--á已經hông欠30 kúi萬工chîⁿ--a.」「Án-ne是án-chóaⁿ koh beh繼續做--leh?」 A-pa笑笑無應, 目chiu內ê光線ta̍uh-ta̍uh-à暗--落-來......

Góa ná像hông潑1桶冷水, 原來危機藏tī幸福後piah, 若m̄是koh有2 ê a姊teh食頭路, 厝--nih會變做siáⁿ款? Chhìn汗一直流過góa ê kha-chiah-phiaⁿ. 其他做工á人, in是m̄是oan-na有kāng款ê危機, koh無社會福利thang照顧? M̄-koh, 就算意識tio̍h chiah-ê, lán koh會sái án-chóaⁿ?

──《TGB通訊》第43期(2003/4)