台灣組合

Chit-chām-á TGB發生chiâⁿ chē tāi-chì, góa個人mā tú-tio̍h 1-kóa困境, o̍at頭看行--過-來ê過程, hō͘ góa愈相信若信任ka-tī, 危機tō是轉機.

TGB是siáⁿ-mih款團體? Lán beh經營siáⁿ-mih款ê氣氛kap討論空間? Lán beh起造siáⁿ-mih款ê價值?

Lán tiāⁿ講ài面對ka-tī, 挑戰ka-tī, lán mā tiāⁿ講ài phah破權威, 尊重人性, m̄-koh tī lán ka-tī ê團體--nih, lán soah chhiâng-chāi用一般社會ê價值觀(lán beh phah破ê價值觀) teh束縛ka-tī.

講beh挑戰ka-tī, soah顛倒m̄敢面對ka-tī ê問題; 講beh phah破權威, soah顛倒ǹg望"權威" hō͘ lán "標準答案"; 講beh創造人性空間, soah顛倒無teh Care別人, kan-taⁿ顧ka-tī.

Tō是án-ne, chiah ē造chiâⁿ互相愈chē誤會, ka-tī愈chē問題(koh m̄敢面對, soah愈艱苦), Group成員互相愈無信任.

M̄-koh若堅持TGB ê原則, 堅持lán信仰ê價值去處理, 危機hōan-sè tō是轉變ê機會.

Ngákî離開, 是開始 i kap TGB關係ê另外1 ê階段; 今á日kap Bō͘-chin開講, 是轉變TGB氣氛ê 1 ê機會; phah-phú-kng臨到, 是chìn前有烏暗暝.

成長tō是chiah-nī趣味, 性命tō是有chiah-nī chē Surprise, lán若ē-sái kā chit-kóa經驗當做成長ê hō-jiah, 不sam時提醒ka-tī, 鼓勵ka-tī, chiah-ê過程tō是lán teh走chhōe ê答案.

祝福TGB, mä祝福ta̍k-ê. Iukiuoasuh!

──《TGB通訊》第45期(2003/6)