中華民國體制ta̍uh-ta̍uh-á teh「民主化」kap「本土化」, 獨裁戒嚴時代ta̍uh-ta̍uh-á ùi lán ê生活--nih消風--去, 台灣人hō͘外來政權thún踏ê記tì ta̍uh-ta̍uh-á變做過去, 歷史ê kha跡是暗影iah是經驗, mā ta̍uh-ta̍uh-á變做無意義--a?
228是án-chóaⁿ hông集體屠殺? 是án-chóaⁿ ē用白色恐怖, kā kui代少年人ê熱情kap性命hiat落墓á埔kap烏監牢? 是án-chóaⁿ有幾10冬ê特務統治kap禁母語ê滅族手段, kā lán「出頭天」ê ǹg望, 扭曲做投機, 妥協, 出賣, 投降ê集體心理?
是lán teh反抗! Kám m̄是? 是in beh kā lán ê反抗鎮壓--落-去, kám m̄是?
烏雲罩日ê時代過--去-a, lán用性命kap自由ê代價迫外來統治集團讓步--a, lán ē-tàng大聲kap權力者算歷史ê siàu--a, lán soah顛倒teh要求「平反」!
「228」「白色恐怖」「特務統治」「禁母語」......kám是『冤案』『錯案』『假案』? Lán kám m̄是正港有kā反抗? 是án-chóaⁿ lán soah teh要求平反? Lán面對外來政權ê鎮壓, lán kám m̄是teh反抗? 是án-chóaⁿ tio̍h平反?
法國軍隊chiâⁿ百冬ê鎮壓, 越南人kám bat要求平反? 英國政府對北美13洲ê剝削, 美國人kám有要求平反? 沙皇幾lō代ê殘酷統治, Russia (『俄羅斯』)人kám是要求平反? M̄是! In無投降, 無投機mā無妥協, in kap thún踏人民ê不義體制戰鬥! In beh ài--ê是歷史ê清算! In beh ài--ê是自由, 尊嚴kap tháu放!
Ah lán--leh? 14萬條人命, 超過100萬冬ê烏監牢, lán無beh kap統治體制算siàu, lán無beh結束ROC體制ê統治, lán soah要求平反, lán kan-taⁿ要求賠錢, lán án-ne tō滿足--a! Thâi人--ê (China集團) kāng款hiau-pai, kāng款teh決定lán ê運命, 投機妥協--ê (台灣人政客)叫lán tio̍h kā過去lóng放hō͘過--去, lán繼續hō͘舊體制ê「統治霸權」縛kah ân-ân-ân!
無jōa久chìn前, 李登輝公開講, môa年(ROC)總統選舉, 連宋若當選tō是外來政權『復辟』. 「本土派」ê sianpai趕緊chàn聲, koh刊報紙呼籲lán tio̍h tòe李登輝kha-chhng後來起造台灣國.
李登輝講--ê若有道理, án-ne連宋是『復辟』toh 1 ê『前朝』? 是2000年chìn前ê李登輝政權? Iah是1996年chìn前ê李登輝政權? 詹益樺自焚ê時, tī「台灣總督府」內底坐大位--ê是siáⁿ-mih人? 鄭南榕發動228公義運動kap新國家運動ê時, 李登輝teh chhòng siáⁿ? 台灣人用性命kap自由ê代價, tī街頭kap外來政權chhia拚ê時, 李登輝khiā tī toh 1-pêng? 歷史ê責任lóng ē-tàng kā放水流? Lán顛倒ài mo͘h過去hit-ê投機者/妥協者/出賣者ê大腿, kā當做是lán ê「救世主」?
2004年連宋若當選是外來政權, 2000年陳水扁用kāng款ê方式──政黨輪替當選, kám有「結束」外來政權? 陳水扁當選是中華民國體制內底ê「政黨輪替」, 中華民國根本iáu-bōe hō͘台灣人消滅, 外來統治根本iáu-bōe結束, lán ê死kap活猶原是China思想teh控制, kám m̄是?
Lán過去teh拚siáⁿ? Kám m̄是beh kā China體制péng hō͘倒? M̄-koh lán nah ē一直倒退lu, ùi「制憲建國」退到拜託hō͘ lán「公投決定前途」, koh退到kan-taⁿ ko͘-chiâⁿ beh kā中華民國改做台灣: 台獨運動ê sianpai發動正名『嘉年華』, hoah「正名無beh變更(ROC)主權」做口號, 呼召過去beh kā中華民國體制ián hō͘倒ê台灣人; ián bē倒, tō kui-khì來kā中華民國正名, tàu-tīn來kā外來體制「合法」, tàu-tīn來接受舊體制霸權繼續kā lán蹧躂.
Che tō是lán chit-ê時代siōng進步ê運動? Che tō是lán台灣人被統治ê智慧?
留言列表
