I是A英學生時代上意愛ê cha-po͘ gín-á.
Hit時chūn, 2個人lóng chiâⁿ pì-sù, 無kā心事講--出-來, 出業了後, koh tih無閒sit頭, 慢慢á就無聯絡--a.
總--是, i ê形影lóng一直khǹg tī A英心肝底, 孤 1個人ê時, A英tiāⁿ-tio̍h會想tio̍h過去tī學校發生ê趣味tāi, kap 2個人相意愛ê tap-tap滴滴.
想bē到講, hit-kang tńg去厝--nih ê街á路頂, soah去tú-tio̍h久年無見面ê i, 少女時代ê心事 1時湧--出-來, kā A英ê心肝舞kah ngiau-ngiau-ngiau.
「Chiok久無看--ê-a, lí chit-má tī toh位tih作sit?」
「Kāng款koh留tī學校tih教跆拳道.」
「Ah lí chit-má跆拳道練kah án-chóaⁿ? Kám koh有tih比賽?」
「Aih...無--a-lah! 想beh比mā無thang比, 身體愈來愈bái--a, 學校這份khang-khòe mā kan-taⁿ thàn kóa 錢渡日子niâ.」
「Nah會án-ne? Ka-tī ê身體ài顧hō͘好--lah!」
「Lí nah有閒tńg--來? 出業了後就lóng m̄-bat看--過-lí-a, lí chit-má tī toh位?」
「Góa koh tī花蓮讀研究所, 這禮拜是beh tńg來chhōe kóa資料--ê, góa留che資料hō͘--lí, ài kap góa聯絡--o͘, chit-chōa góa會留到禮拜, 拜6 lí kám有閒? Lán chhōe 1個所在講--1下, 真正chiok久無看--a.」
「好--lah, 若無, chiah koh用電話聯絡, góa猶原tòa tī厝--nih.」
A英kā電話番留hō͘--i了後, 2個人就相辭--a.
A英無想tio̍h會koh相tú頭, 這聲無tiuⁿ-tû去hō͘ tú--tio̍h, A英想講bē-sái放棄這pái機會, ài kā這條朋友線koh牽--起-來.
其實, A英mā m̄知影koh來beh án-chóaⁿ chhiâu-chhek這段關係, 因為i tī花蓮mā有 1個穩定tih交往ê cha-po͘朋友, m̄-koh心肝頭hit個無形ê力量soah bë-sái無chhap.
就án-ne, A英ka-tī雖bóng mā無確定, mā是kap i約tī隔壁庄ê剉冰店相tú.
E-po͘ 2:30, 2個人來到剉冰店, 叫 2碗剉冰. hit當時á, 同窗ê情影khoaⁿ-khoaⁿ-á浮t„ 2個老朋友ê頭殼內, 話題mā lóng是khah早學校,老師,同學ê tāi-chì.
「Lí身體是án-chóaⁿ愈來愈bái?」A英kā問.
「Khah早練跆拳道ê運動傷害, 無療養好勢, chit-má 1-kóa症頭lóng puh--出-來-a.」
「Lí kám有去做檢查?」
「無--lah, 橫直a̍h bē死--a.」
「Bē-sái án-ne講--lah, 總--是去檢查--1下, 若有siáⁿ問題, mā會sái量早治療--a.」
A英tih想, i bòai去檢查, kám是驚檢查出siáⁿ-mih大症頭? Bē-sái--ê, 一定ài叫i去檢查, án-ne A英chiah會安心.
「若無, án-ne--lah, 看lí後禮拜toh 1-kang有閒, góa kap lí鬥陣去.」
「Lí m̄是bîn-á-chài就beh tńg去花蓮--a? Beh án-chóaⁿ陪góa去?」
「花蓮hia無siáⁿ-mih要緊ê tāi-chì, 會sái khah慢tńg--去-ê, góa chit-má就kan-taⁿ創論文niâ.」
A英kap i chhiâu好, 後禮拜3 e-po͘ i無課, A英beh陪i去病院檢查.
這幾kang, in 2個tiāⁿ-tiāⁿ相約見面, 若無, 就是講電話. A英tih想, i對A英kám猶原koh有感情? 應該是án-ne無m̄-tio̍h, 這幾kang i lóng會主動約A英出--去, 開講ê氣氛mā lóng chiâⁿ好, ùi chia就看會出--來.
這chūn ê A英, 就若像初kái戀愛ê cha-bó͘ gín-á, 心肝pho̍k-pho̍k跳, ta̍k-kang lóng感覺chin快樂, 已經bē記ê花蓮hit個cha-po͘朋友--a.
到拜3中晝, A英去學校chhōe i做伙食飯, soah看tio̍h i頭殼額á有 2 chōa血jiah, i講che算是舊症頭, 像i ê身軀lóng傷痕kap烏青, 頭殼額á ê血可能是jiàu破--ê, i mā m̄知是án-chóaⁿ.
I kā衫á褲phián--開hō͘ A英看, kui身軀lóng 1 jiah 1 jiah, A英想講運動傷害kám會án-ne? 想tio̍h i kui身軀lóng傷, A英 1時m̄甘soah哭--出-來, i kā A英攬--leh, kā A英安慰講無要緊.
看A英tih哭, i kā A英ê頭phô͘--起-來, 金金á相A英ê目chiu, 輕聲細說講「Góa愛--lí!」I第1 pái對A英講「Góa愛--lí!」, 第 1 pái對A英表達心意, 少年時代相意愛ê伴, 竟然經過幾nā年chiah kā ka-tī ê感情講--出-來.
去病院檢查ê過tńg-kang, A英去in厝chhōe--i, soah看tio̍h in tau chin chē人, chiok鬧熱--ê, ná tih辦喜事--leh. In tau thian--nih有chiâⁿ 10 tha̍h喜餅, 桌頂koh有幾nā種帖á, 可能是beh選看khah順眼--ê.
A英愈看愈ngiau疑, 問i講「Lí訂婚--a?」I面á白sún-sún, ká-ná gāng--去-leh, chhih-chhih-chhuh-chhuh, m̄知beh án-chóaⁿ應, 尾--á, chiah puh 1句「Góa m̄知...góa bòai訂婚!」
In 2個行--出-去, i講訂婚ê對象是隔壁庄kāng學校ê cha-bó͘老師.
留tī庄--nih ê生活就是án-ne, chhōe 1個人結婚, 1世人就án-ne過--落-去, 無siáⁿ大變化.一直到A英出現, i chiah發覺bē-sái koh騙ka-tī, i beh走chhōe ka-tī ê理想, beh過ka-tī真正想beh ài ê生活, i beh回應ka-tī ê感情.
A英聽到chia, chìn前ê想法koh khah堅定, 目chiu金金kā相, 問i講:「Lí kám beh tòe góa去花蓮? Góa koh chhun半年就出業--a, 到時lán chiah看beh過siáⁿ-mih款生活!」
I kā A英攬--leh, 講:「好! Lán做伙去花蓮走chhōe lán ê未來!」
過tńg-kang, i取消kap cha-bó͘老師ê婚約, 補送禮物去對方厝--nih會失禮. A英hām i kap厝--nih chhiâu bē好勢, 2 pêng sī大人lóng chin bē-tàng諒解.
尾--á, cha-po͘--ê in a母放軟心, kā in tàu掩護, in 2個人就án-ne來離開in ê故鄉--a.
留言列表