講tio̍h台語, ta̍k-ê lóng有ka-kī ê 1套, in會kā lí講siáⁿ-mih字ài án-chóaⁿ寫, 台語有幾聲, 台語有jōa súi.
M̄-koh若講tio̍h堅持講台語, 來kā台語文運動鬥出力, in tō會chin緊改嘴講:"語言kan-taⁿ是1種工具".
無m̄-tio̍h, 語言是 1種工具, m̄-koh ài看lí beh提chit種工具做siáⁿ-mih代誌?
Góa做工tú-tio̍h 1 ê韓國人, i是Sumsung (三星)公司派來台灣起發電廠ê監工. Góa kā講, 學台語會使kap台灣工人講khah清楚, i用Chi-na話講:『你們台灣的工作那麼小, 大陸(China國)的工作那麼大, 我學國語(China話)就好了, 學台語做什麼.』
Góa kā i講góa m̄是China人, i soah講China人chin好--a. Góa koh強調góa m̄是China人, i koh問góa是m̄是原住民, góa講m̄是, i koh問góa是án-chóaⁿ m̄是China人, góa講m̄是tō m̄是, kám koh ài siáⁿ-mih理由. I tō比góa ê頭, chin siūⁿ-khì講:『你們年輕人只要錢, 台灣和大陸就跟南韓和北韓一樣, 你們錢多就不要大陸, 血統最重要!』
Góa hiông-hiông gāng--去, m̄知影beh講siáⁿ. Che tō是in對台灣ê了解, góa mā無想beh koh講siáⁿ, tō緊tńg去做工.
原本感覺chin tū-lān,"Kán! Lín chia--ê死韓國á, 來賺台灣人ê錢, koh看台灣人chiah無, 無了解台灣kap China國ê問題, koh beh叫台灣去hō͘ China國統."
尾--á, 想講, 像in看血統hiah-nī重ê民族, kám會kā in韓國話當作工具來用? 台語kap China話對i來講lóng是外國話, lóng是in賺錢ê工具.
台語是siáⁿ? 台語是góa ê母語, tī gún母--á腹tó͘內tō teh聽ê話, mā是góa第1種學會曉ê話, 是góa熟識mi̍h-kiāⁿ kap世界ê話, 是góa beh kā想--ê講--出-來ê話.
台語mā是góa上好用ê ke-si. 用台語, góa上會使清楚siáⁿ-mih mi̍h-kiāⁿ是siáⁿ-mih, 用台語, góa會使sûi知影別人講--ê是siáⁿ-mih; 台語是góa kap chit-ê世界連做伙上好用ê ke-si.
In講--ê-leh? 台語是siáⁿ-mih工具? In講是溝通ê工具, in無用台語想代誌, in無用台語熟識世界.
Beh用台語kap siáⁿ人溝通? In會講: "Góa kap gún a公 a-má講話lóng講台語." Kap朋友, kap pē母, kap社會, kap gín-á--leh?
有人khiā tī選舉台á頂會講台語, 落台á kha tō bē koh講, 台語是kap選票溝通ê工具?
In koh會講, bē曉台語tō無法tō͘做生理, 做生理tō是beh賺錢, in講台語是beh賺錢, 台語是賺錢ê工具?
台語tī台灣有chiah chē人用, teh思考, teh講話, teh看世界, in用台語kā人講in ê愛, soah hō͘ 1-kóa無認同chit-ê語言ê人當作外國話, in講"台語是1種工具", koh講chit-ê工具"無好用; 無市場; gín-á無beh講; 無法tō͘ kap China話競爭?"
Kám有影是án-ne?
Chin清楚, "台語是1種工具", 這句話mā是1 ê工具, 是1-kóa bē見笑ê台灣人, 為tio̍h beh kā bē曉講母語chit-ê原罪當作無看--tio̍h ê工具!
China人mā kā語言當作工具, 是in beh kā台灣ê語言, 文化, 族群問題hoe kah無人sa有ê工具, mā是支持in「共通語」鬼á古ê工具.
Chē-chē台灣人soah hō͘ China人pián--去, 相信講, 文學, 藝術, 音樂, 流行, hām世界溝通, lóng ài用「共通語」chiah有法tō͘, 造chiâⁿ台灣人無法tō͘用ka-kī ê母語去做chia ê代誌, 靈魂kap人無法tō͘做伙.
若照in講--ê, chit種症頭應該號做『精神分裂』. Chiok chē人lóng得tio̍h chit-ê症頭, mā m̄知影beh án-chóaⁿ, kan-taⁿ會使tè tī「共通語----China話」後piah, koh khah jiok都jiok bē tio̍h.
其實, 台灣無需要共通語, 台灣原本tō有 "chiok chē語言鬥陣生活" ê環境. Góa講Hō-ló話, Hak-ngìn(客家人)聽有, in講Hak-fa góa mā聽有; 原住民各族群mā是án-ne.
Góa tī花蓮bat tn̄g-tio̍h 1 ê Pang-chah (Amis--ê lóng講ka-kī是Pang-chah, tō是 "人" ê意思) a-má, i會曉講 6種話, m̄-tāⁿ會曉2~3個詞, kap人講話, 開講mā lóng chin順, 有i ka-kī族ê Pangchah話, 有Hō-ló話, 有Hak-fa,有Truku (有人講是『東賽德克』, 外國人類學者kā當作Tayal--ê), koh有日本話, China話 6種.
Chit款--ê, chit-má有幾ê人有才調? Tī台灣, chit種--ê是無法tō͘ hông肯定--ê!
I會曉chiah-nī chē種話, kan-taⁿ 2種是hông教育--出-來-ê, chhun-ê lóng是tī台灣社會本底tō有ê語言環境內底, chin自然tō學會曉--e.
Koh再講, hit 2種hông教--出-來ê語言, lóng是外來統治者殖民政策規定ê『國語』, m̄是台灣本土ê語言.
語言是 1種工具? 台灣ê語言kám真正khah pháiⁿ用? 全台灣ê人, 為tio̍h 1世人tú bē tio̍h 10 pái ê外國人teh打拚學外國話, kā ka-kī ê母語藏tī箱á底, 有心beh提來用ê人kā péng--出-來, soah hō͘ in l̀è-lè叫, 講teh製造問題, teh製造『社會矛盾』!
是siáⁿ人khah『矛盾』, 應該是chin清楚chiah tio̍h!
留言列表
