差不多tī góa國校á 3~4年ê時chūn, góan a伯早起去走健(慢跑), Khú-loh tō tòe tī a伯後壁一直到厝, 趕mā趕bē走, tō án-ne, Khú-loh tō tòa--落-來, m̄知影i是án-chóaⁿ想--ê?
I chin自然tō變做厝--nih生活ê 1部份, góan若是去上課, chhit-thô, 買mi̍h-kiāⁿ, piān若出門, i tō tòe tiâu-tiâu.
I tú來 hit-chūn, 若tòe góan出--去, góa lóng會煩惱i chhōe無路tńg--來, ah是驚i tòe siuⁿ久會無力, 路--nih koh無水thang lim......
會記--ê有 1 pái i倒tih khùn, góa無細膩踏tio̍h i ê尾溜á, i kan-taⁿ gia̍h頭起--來, kā góa看看--ê, 無像厝--nih ê弟尾--á若kā踏--tio̍h, soah hō͘ i咬--neh!
Che kám會sái算是i對góa有信任? 因為除了góan a伯, góa kap i上好!
尾--á, góa大學 1年á ê時, 有1 pái放假tńg--去, soah無看tio̍h Khú-loh, 問a母chiah知影i死--a, m̄-koh góa soah無悲傷ê情緒, góa teh想kóng, i tī另外 1個世界, 猶原會過kah chiok好--ê.
這篇beh寫hō͘ góa上好ê朋友~Khú--loh.
留言列表