Hit時chūn, 我稅厝tòa tī學校khah過hia, 算是山kha, ǹg貓空ê路--nih, 禮拜時á暗暝, 上山落山ê自動車, o͘-tó͘-bái比平常時á加幾nā倍. Ka-chài, 我稅ê a-phà-toh(公寓) tī巷á內, 離大路有1-tè-á, chiah無hông吵gah bē khùn--chit.
Hit工我kāng款khùn bē落眠, 裘á moa--leh, beh出去lau-lau--ê.
外口無落雨, m̄-koh chiok kôaⁿ--ê, 我心肝頭teh想, 是án-chóaⁿ 3--月過1半--a, kôaⁿ--人koh iáu未離開台北城?
路燈有光--ê mā有無光--ê, 天星是lóng無地看--a, 巷á口老ang婆ê檳榔擔iáu未收擔, m̄知chiah暗koh有siáng會來買?
Kám-á店早就關--a, chhun 24點鐘--ê, m̄-koh內底chhōe無我beh ti̍h ê mi̍h.
我無承認台北是góan tau, 就親像hit-kóa外省á bē-giàn接受陳水扁當選kāng款, hiah-nī-á固執.
話講倒tńg--來, 木柵這hiah無sêng台北市, 除了拜6暗暝, ùi市區來--ê, phe車上貓空hit-kóa人, in ê車後táu載--ê, lóng是市內臭phú ê氣味. 1禮拜就kan-taⁿ hit工, 木柵會bak著「台北」ê là-sap-siùⁿ.
已經chiah-nī暗--a, 連路邊賣宵夜--ê都beh收擔--a. 我問 tng teh收擔ê hit擔賣鹽酥雞ê頭家, 雞排koh有--無? 若有, kā我chìⁿ 1 tè. I講:「Pháiⁿ-sè, 賣了--a.」Ah, 都chiah òaⁿ--a, 是án-chóaⁿ這kóa大學生koh tī外口hi-hi hoa-hoa, cha-po͘ cha-bó͘ lám來lám去? Bîn-á-chài免上課sioh?
我ka-tī kám m̄是大學生? 我ka-tī kám m̄是半暝tī外口lōa-lōa-sô?
我kā裘á moa--leh, se̍h原路tńg去a-phà-toh.
留言列表
