台灣組合

魚á 跳水

Góa ùi 14樓行--落-來, 行到13樓就感覺樓梯tìn chiok chē mi̍h-kiāⁿ chiok pháiⁿ行--ê, 貧惰性giâ--起-來, 就行去beh坐電梯.

行到電梯門嘴, ji̍h落--去ê『按鈕』等電梯來, 13F-3有2個40外歲ê cha-po͘人開門出--來, khiā tī góa邊--á mā teh等電梯.

Góa想講, in kap góa tòa kāng-pêng, 可能mā有看tio̍h hit個giàn食魚á, ùi樓頂跳落來kā góa討魚á ê陳清水.

「Tú-á chin鬧熱--neh!」Hit 2個人聽tio̍h面sái-sái lóng無講話, góa想講koh lā看māi--leh:「暗頭á有人跳樓, lín kám知iáⁿ?」講--起-來, án-ne kā人問chin三八, m̄-koh hit-chūn mā無想hiah chē, kan-taⁿ beh知iáⁿ有人kap góa差不多衰--無.

穿教官衫hit個面chiok臭--ê, 另外hit個sêng公務員ê cha-po͘人講i有聽--tio̍h, koh講哀kah chiok大聲--ê, i mā去hō͘驚--tio̍h.

電梯到5樓, 1個少年媽媽chhōa 1個細漢gín-á入--來, hit個少年媽媽看--起-來bē超過30歲, 有少年cha-bó͘ ê青春美麗, koh有做媽媽ê成熟, hō͘人看kah心肝íⁿ-á ngiau--leh ngiau--leh.

Góa欣賞hit個少年媽媽猶bōe teh-giàn, hit個m̄-chiâⁿ gín-á就chhoah in母--á ê手:「Góa tú-á有去樓kha買豆油....」Chiok溫柔ê聲ùi少年媽媽ê嘴--nih講--出-來:「妹妹chiok gâu--ê, 媽媽買糖á hō͘--lí.」Góa聽kah kui身軀會so͘--去.

Hit個妹妹koh續--落:「Hit 2個a伯teh搬厝, in ê布袋á chiok好sńg--ê, chiok大kha, koh會tín動--o͘...」溫柔ê聲koh tī góa耳孔邊出現, m̄-koh góa已經無teh注意少年媽媽teh講siáⁿ--a.

「Tòa 13樓hit 2個人teh搬厝, 大布袋koh會tín動?」

電梯到1樓, 少年媽媽chhōa妹妹行出大樓, góa tòe in後壁出--去, 想beh tòe溫柔ê kha步, 行到管理室, 頭o̍at過看電梯, 電梯門關óa--來, 已經落去地下室--a, 心肝頭hiông-hiông想講害--a, 趕緊問看地下室kám有管理員, i講無, kan-taⁿ有電動門, 有『遙控』就會sái開門落--去.

平常時á góa lóng pō͘-lián, 騎o͘-tó͘-bái--ê連地下室tùi toh位落--去mā m̄知, 到taⁿ mā無時間koh siàu念少年媽媽--a.

Góa kā管理員借電話khà hō͘刑事--ê, kā in講hit 2個人chin奇怪, 刑事--ê講已經結案--a, 講是陳清水自殺. Góa隨kā chhò--落:「Lín娘--leh, 人死tī gún tau『陽台』, lín kā góa khah專心辦--leh!」

溫柔ê少年媽媽頭o̍at--過-來, 看góa是teh大聲siáⁿ, góa soah pháiⁿ勢pháiⁿ勢, 手giâ起來kā比--1-下表示失禮, i對góa笑--1-下, 就牽hit個妹妹行tùi大路去.

Góa繼續kap刑事--ê相嚷, 2 pêng比tàu大聲--ê:「Góa kā lí講, 有1個細漢gín-á看tio̍h in拖陳清水....」

「Hit個gín-á bat陳清水? Kap i有siáⁿ-mih關係?」

「Khàu-pē! He是lín ài去查--ê, góa是受害者neh, lí nah會siáⁿ-mih tāi-chì lóng問--góa? Án-ne刑事組長換góa做--lah!」

「無, lí去chhōe hit個gín-á來, án-ne góa就koh辦, 若無, 就是自殺結案.」

「Kán! Lín chia--ê死賊頭, 人死tī gún tau, góa會衰siâu 1世人neh, 暗時á i若來chhōe góa kā i報仇, góa就去lín派出所死hō͘ lín看....」

Kiāu猶bōe soah, hit個少年媽媽牽hit個妹妹入--來, góa緊走去kā tâu, 講有人ùi樓頂跳--落-來, 死tī gún tau『陽台』, in妹妹可能有看tio̍h té人ê大布袋. 少年媽媽gāng--去, 面--nih表情m̄知beh án-chóaⁿ, m̄-koh猶原chiok súi--ê.

Hit個妹妹giú in母--á ê手:「媽媽, tú-á hit 2個a伯搬厝, 布袋chiok大kha--ê, koh會ngiau-ngiau-soan--o͘!」少年媽媽溫柔ê聲:「Mài烏白講, 有影chiah thang講, 是siáⁿ-mih時chūn?」「買豆油tńg--來hit-chūn ā, in koh有kā góa ji̍h電梯kóng!」

──《TGB通訊》第14期(2000/11)