花蓮, 是台灣siōng長ê縣, 大理石ê故鄉. Hō-ló人, China人, 先住民, Hak-ngìn, 4 ê族群lóng無過半(góa看冊寫--ê, m̄知kám是真--ê). 面對--ê是太平洋, óa靠--ê是中央山脈. 5/17~20 TGB來到花蓮.
Chit-tàu來花蓮, gún拜訪Tiông-seng, Yawas kap Kavalan ê a-má.
聽過Tiông-seng ê tāi-chì. Góa感覺 i真有骨氣. 頭1 pái見面, i看--起-來有真chē心事. Tek-hôa teh hām i談ê時chūn, 一直kā i講lán TGB ê tāi-chì, 講tio̍h真chē外口團體lóng teh hām lán chih接. Góa聽ē出--來, Tek-hôa teh kā Tiông-seng鼓勵, 其實góa mā真想beh kā Tiông-seng講, koh有真chē少年人對改變chit-ê扭曲ê社會有熱情, 請 i一定ài保持希望. Gún hām Tiông-seng tī鯉魚潭「Say goodbye」, hit-kang雨落kah bē細chūn, Tiông-seng 1 ê人beh ùi鯉魚潭騎tńg去厝, m̄知是án-chóaⁿ, góa感覺 i ê背影真孤單.
續--來, 是去萬榮部落拜訪Truku ê Yawas. I ê面模á真特別, hām lán真無kâng. Hō͘ góa siōng「Shock」--ê是, i訴求--ê m̄是先住民ài自治, 是「獨立」! 有teh接觸運動ê先住民真正無kāng款. Góa mā有熟sāi kúi-ê都市ê先住民, in對宋楚瑜做省長ê時真懷念, tō親像電影〈黑潮--Malcolm X〉內底講--ê:『你就像一隻狗, 別人給你骨頭就樂得要死!』Góa想, Yawas無kä祖靈hō͘--in ê力量放bē記, i清楚知iáⁿ, ka-tī ùi toh位來.
第3 kang, gún 4 ê人騎真hn̄g ê路來到Kavalan a-má in tau. A-má真趣味, 食到70 kúi歲--a, m̄-koh i ê心koh有iáⁿ真少年, i koh ē-hiáu講Kavalan ê話, 日本話, 台語......thài厲害--a! 檯面上tiāⁿ-tiāⁿ有1-kóa豬腦, 用技術問題來否定母語教育, a-má ê存在, koh khah證明技術問題m̄是真正ê問題!
平埔族真『友善』, gún tú到a-má hia, i kap in hāu-seⁿ tō chiok熱情--ê, in無Care gún是siáⁿ-mih人, tō hām gún談kah真歡喜. 印象siōng深--ê, 是gún無主動講tio̍h政治ê tāi-chì, a-má ê hāu-seⁿ tō自動講--tio̍h-a. Tī hiah hn̄g ê後山花蓮, lóng有teh Care. A-má ê hāu-seⁿ以早teh走船, i講外口ê人聽tio̍h i是台灣來--ê, tō ē hoah「Good」; 若是ùi China來--ê tō是「Bad」. I koh講, 台灣hām中國絕對bē-sái統一. I對陳水扁有真chē ǹg望. Góa想, 陳水扁真正chiok kiàn-siàu--ê, 基層ê人lóng hiah thīn--i, koh beh做kah像chit-má án-ne.
Kavalan a-má hām lán「漢人」ê a-má看tāi-chì ê態度真無kâng. Kavalan a-má手--nih the̍h最近chiok流行ê『口罩』講:「掛che有siáⁿ-mih效, 醫生掛kui-kang iáu m̄是死--a!」M̄-koh, lán「漢人」ê a-má lóng ē講一定ài tì『口罩』, 一直hoan咐sī細ài sè-jī.
花蓮ê光景m̄是講siáⁿ-mih「真súi」tō ē-sái形容--ê. 花蓮, 是ē-tàng感動--人ê所在. Tī七星潭, 看--tio̍h-ê是『一望無際』ê太平洋. Góa 20歲生日ê時bat來到chia, 太平洋hō͘ góa準備20歲「tńg大人」ê勇氣.
1冬gōa過--去-a, koh 1 pái來到七星潭, góa tī心內問ka-tī: góa kám有對ka-tī ê人生負責? Góa kám有勇氣來面對未來?
Siōng尾kang, gún tòa tī民宿『鹽寮女窩』. Tī鹽寮chit-ê所在, 有真chē藝術家ùi外地來, 『鹽寮女窩』ê主人tō是其中1 ê. Góa想, chit-kóa藝術家ê生活mā真『愜意』, 親像『鹽寮女窩』ê女主人, i ta̍k-kang ē-sái聽tio̍h海ê聲, 欣賞『海平面』ê『日出日落』. M̄-koh ia̍h因為chiah-ê藝術家m̄是花蓮ê在地人, tòa tī hia無法tō͘感受tio̍h『人親土親』ê氣味, 感受bē tio̍h in kap花蓮chit-tè土地ê感情.
Ùi『鹽寮女窩』beh tńg去花蓮車頭ê路--nih, 有經過『久仰大名』ê海洋公園. 親目chiu看--tio̍h, 感覺親像1隻『巨大的怪獸』, 侵略花蓮chit-ê所在. Ta̍k-ê城市lóng有 i ka-tī ê性命, 花蓮ê性命是án-chóaⁿ ài hō͘ hiah-ê資本家kap投機者來控制?
Chit-pái花蓮行踏, góa siōng歡喜--ê, 是ē-tàng拜訪1-kóa tiāⁿ-tiāⁿ聽--tio̍h ê人: Tiông-seng, Yawas, koh有kó͘-chui ê Kavalan a-má. In chiah是kap ka-tī ê性命, kap花蓮chit-tè土地結合ê人. 看tio̍h in ê性命力, tī「後山」, chit-ê離「權力中心」hiah hn̄g ê所在, mā是有真chē人teh關心lán台灣chit-ê社會, mā是有人為tio̍h追求公平正義ê社會teh phah拚.
Góa--leh? Ē-tàng做siáⁿ? 答案ká-ná beh出現--a!
留言列表