Kám beh相信? Lán已經se̍k-sāi超過37冬--a, ē-tàng kap lí做國校, 國中, 高中ê同學, 有影是chiok大ê緣份kap福氣. Lí kap lín tau ê人, 是góa se̍k-sāi siōng-kài善良koh溫和ê家庭, lí chéng tio̍h lín a母, 有siōng-kài溫馴ê個性kap善良ê心. 多謝lí, 總--是聽góa一直講thi̍h bē soah. 多謝lí, 讀國中, 高中了後, koh ta̍k工來goán tau等--góa, 有tú時á góa khùn過頭, piān-nā聽tio̍h goán a母tī樓kha樓梯頭hoah 1聲:「A鳳, A如來--a!」Góa tō ná像hông電--tio̍h, sûi peh--起-來, kā制服chhēng好, kap lí chò-hóe騎腳踏車去學校, tō án-ne lán tàu-tīn騎6冬.
Ē記得國校一年ê時, 有1 pái lí買1條pûn泡泡--ê (tn̂g-ko形), lí chiâⁿ a-sá-lih借góa pûn, m̄-koh góa soah thiau-kang kā kui條lóng chek-chek--出-來, lí tī邊--á看kah lóng gāng--去, kiōng-beh哭--出-來, góa soah koh chiâⁿ iāng想beh替lí pûn 1粒chiok大粒ê泡泡, 出力pûn kah kui面lóng漲紅--去, 是講泡泡pûn kah 1半tō破--去, lí chiok siūⁿ-khì oat--leh tō走入教室, hit-tang-chūn góa知影ka-tī做m̄-tio̍h tāi-chì, soah m̄知beh án-chóaⁿ處理. 一直到放學行路隊, beh經過lín tau竹林後piah ê田岸路ê時, hn̄g-hn̄g tō看tio̍h lín a母kā teh哭ê lí抱tiâu--leh, teh等góa行--過-去, lín a母講:「Goán秀如身體無好, lí mài欺負goán秀如......」聽tio̍h lín a母khiā tī青lèng-lèng ê竹林腳, 隔1區結穗kah黃gìm-gìm ê田án-ne kā góa講, góa kā頭àⁿ kē-kē, lóng m̄敢taⁿ頭看lí kap lín a母, kan-taⁿ頭lê-lê顧leh緊行--過, hō͘ lín a母ê聲留tī kha-chiah後, thèng-hāu聲音jú來jú hn̄g, góa chiah緊走tńg厝. Sui-bóng lín a母teh罵--人kap phiàn gín-á ê聲sàu是kāng款輕koh溫柔, chi̍t-sut-á tō bē pháiⁿ, m̄-koh góa有影hō͘ i chhoah--tio̍h, 後--來góa m̄-bat koh欺負phēng góa khah細hàn--ê, 人生無行chhoa̍h--去, 無的確koh tio̍h感謝lín a母hit-tang-chūn溫柔對góa講ê話leh!
Sui-bóng有chit-pái ê事件, lán kui-ê國校期間iû-goân是黏chò-hóe, 原因是lí siuⁿ好欺負--a (àⁿ頭懺悔). Hit-chūn一二年讀半工, 放學了後, chia̍h飽tàu góa tō ē走去lín tau寫功課, ta̍k工準時去lín tau報到, lín a-má看tio̍h góa tō ē hoah:「A如, 玉鳳來chhōe lí--a!」Hit-chūn góa ta̍k工to tī lín tau出出入入, 自在koh歡喜, 親像無受約束ê野gín-á. Gín-á時ê記tì--nih, lóng是góa去lín tau chhōe lí sńg, lí ná像無來過goán tau. 奇怪, 像góa án-ne 1 ê有sió-khóa Asperger's syndromeê gín-á, nah ē kap 1 ê有sió-khóa Kanner's Syndromeê gín-á sńg ē起--來? Koh sńg kah不止á和樂, 一直sńg到chit-má, 徹底phah破『物以類聚』chit句話.
細hàn時chūn lí tiām靜koh sán, 身體無勇, m̄-koh lí soah chiok gâu畫塑膠ê冊thiap-á頂ê bàng-kah人物,『三隻小豬』,『小英的故事』,『龍龍與忠狗』,『小甜甜和安東尼』, 連紙ang-á lí to有法度ka-tī畫, chiah koh the̍h chit-kóa ka-tī畫ka-tī做ê紙ang-á sńg pān-kong-hóe-á. Lán mā chhiâng-chāi phak tī lín tau ê埕, khioh紅磚á khà--落-來ê磚á角, 2 ê gín-á-phí tō tī thô͘-kha畫--起-來. 有tang時á lán mā ē sńg bih-sio-chhōe, tī lín tau ê大竹圍, poa̍t-á樹, 蓮霧樹, kap hit口ē-sái sńg水chhèng ê水井走sio-jiok, lín tau ta̍k sì-kè lóng有lán做gín-á時chò-hóe sńg ê影jiah.
Hō͘人m̄甘--ê是, 今年2013年秋天, lí用Line kā góa講lín舊厝hō͘ 怪手thiah掉ê消息, lí koh講lí有khioh 1 tè舊厝ê厝瓦做記念. Góa應lí講: He是充滿lángín-á時記tì ê所在ah! Hiông-hiông感覺ka-tī gín-á時ê記tì mā hông thiah掉--去! 是án-chóaⁿ美好ê tāi-chì總--是bē久長? 庄腳ê老大人kám m̄是siōng惜情--ê? 舊厝無--去-a, 相信惜情ê lí心內一定mā chiâⁿ無奈ho͘ⁿh! Góa南部厝--nih ê相簿內底, iáu有1張lán大hàn了後tī lín tau poa̍t-á樹腳hip ê相片, góa ē好好á珍惜chit張有lín tau舊厝做背景ê相片.