台灣組合

今年是日本kap中國慶祝建交40週年記念.

關係越南hām菲律賓海域ê無人島主權爭議, 中國有1套既定ê模式: 先派漁民tī hiah-ê島嶼附近lia̍h魚, 製造侵入海域ê爭議, chiah koh叫漁民peh起lih無人島作業, koh來派出軍隊「保護漁民」. Chit款橫柴giâ入灶ê模式到taⁿ lóng iáu真順利.

Chit pái中國針對釣魚台ê目的是siáⁿ? 想beh ti̍h釣魚台iah是想beh開戰?

中國ê「民意」chhiâng-chāi受共產黨內部ê權力鬥爭來利用, m̄-koh怨恨日本chit口怨氣真oh控制, chi̍t-ē無sè-jī tō ē燒過頭來傷tio̍h中國ka-tī. 中國內部hó-gia̍h-sàn jú差jú大kap社會ê經濟壓力威脅tio̍h共產黨政權生存ê時, 共產黨tō ē kā民怨轉ǹg日本, che一直是真有效koh方便ê做法. 換1句話來講, 若討bē tio̍h釣魚台, 共產黨真有可能ē開戰. 面對有核子武器ê中國, 經過戰後60外冬和平洗腦教育ê日本, 根本tō無法度應付, chhah tī中ng ê美國kám有講和做中人ê能力?

今á日(9/18)中國派1,000隻漁船駛ǹg Senkaku列島, mā是照chit款模式teh進行. 中國本底tō長期訓練真chē所謂「海上民兵」ê漁民, kap台灣ê漁民無kâng, chiah-ê中國漁民lóng受過武器訓練. 除去chiah-ê真正lia̍h漁過日子ê漁民, mā可能有自稱漁民ê海軍陸戰隊員chham-lām tī內底, 登陸釣魚台, 甚至tī當地停留m̄走(竹島模式), 用具體行動來搶佔島嶼.

新聞報導:『台中市擬在東勢區規劃客家多功能文化園區, 並打造客家意含的圓樓.』花蓮縣beh起『土樓』, 台中市mā beh起『圓樓』, ah苗栗縣已經有1 ê『客家大院』--a; 客委會一直khai大chîⁿ beh tī台灣copy m-bat tī台灣出現--過ê中國客家建築, 到底是siáⁿ-mih意思? 連結中國, koh強調是原鄉建築代表, tō是beh用各種方式hō͘台灣人ē記tit m̄知kúi百代chìn前ê祖先是ùi中國來--ê? 若án-ne kám beh先起1 ê『猩猩館』, 提醒ka-tī koh-khah早chìn前ê祖先是ùi猴演化來--ê.

客委會ê chîⁿ有影chiok chē, 補助地方修建客家建築kap文物, lóng比文建會(文化部)補助koh-khah chē chîⁿ, 活動kha̍p-bē-tio̍h tō是kúi-nā千萬ê大拜拜, 結果chiok chē soah是假--ê, 編--出-來ê假文化. 像早期行銷--出-來ê新竹北埔『擂茶』, 在地1 ê賣『擂茶』ê súi頭家娘講, 其實北埔ê客人早期根本tō無『擂茶』chit款mi̍h-kiāⁿ, i bat問過在地ê老大人, in lóng m̄知有『擂茶』. 『擂茶』是為tio̍h觀光, hō͘地方有商品thang賣, 透過專家學者kap客委會規劃--出-來ê假ê客家飲食, 根本tō是烏白編--出-來ê假飲食文化.

Taⁿ beh koh開始烏白編客家ê傳統建築, siáⁿ-mih『土樓』,『圓樓』? Che是台灣m̄-bat存在ê客家建築, 台灣kap中國ê地理環境無kâng, 厝lóng是就地取材建築, koh配合當地ê自然環境, 無kāng款ê地理環境有kāng款ê建築. 台灣ê客委會到底了解jōa chē客家文化? Bú到chit-má ta̍k-ê對客家ê印象kan-taⁿ是桐花, 粿, 花布, 義民廟......, 李喬寒夜內底客家移民開墾奮鬥ê精神lóng無--去-a, kan-taⁿ ē-hiáu搬中國ê mi̍h-kiāⁿ ngē teh tī台灣客家族群面頂.

據報載：「台中市擬在東勢區規劃客家多功能文化園區，並打造客家意含的圓樓。」花蓮縣要蓋土樓，台中市也要蓋圓樓，而苗栗縣已經有個客家大院；客委會一直花大錢要在台灣複製不曾在台灣出現的中國客家建築，到底是什麼意思？連結中國，還原鄉建築代表咧，不管怎麼就是要使用各種方式讓台灣人記得不知幾百代以前的不知名祖先是來自中國嗎？那要不要先蓋個猩猩館，提醒自己更早更早以前的祖先是從猿猴演化來的。

Tī 2000年1月初1 ê自由時報看tio̍h 1篇報導: 陳水扁為tio̍h beh爭取外省選民認同, 講當選(ROC)總統了後, beh推動〈反歧視法〉.

台灣ê族群問題確實bōe-tàng無重視, m̄-koh政客為tio̍h選票, soah thiau-kang kā問題bú kah hoe--去, in會tàng大聲hoah族群和諧ê口號, m̄-koh被扭曲ê台灣社會, bōe án-ne就來化解族群之間ê矛盾kap壓迫.

陳水扁講: Beh落實無kāng族群公民ê平等工作權kap受教育權; 陳水扁koh強調: 大多數外省子弟因為離鄉背井, 並無享受tio̍h特權, 真chōe人ê社會條件往往比本省人koh khah bái, m̄-koh in ùi無到有, tī有限當中開創無限ê可能......

就親像過去teh替國民黨政權chhit kha-chhng ê政客kap學者kāng款, 陳水扁mā teh騙--人, thiau-kang無看tio̍h體制宰制ê事實, kā族群問題sak hō͘族群情結. M̄-koh, 問題kám有影是án-ne?

中華民國體制tī政策面明顯teh照顧少數外省族群, 這是無法tō͘否認--ê, 像過去ê雙重匯率kap公務員考試ê省籍配額, koh像chit-má ê眷村改建條例.

2000年3月18, 台灣歷史大轉變, 500萬張選票, hō͘民進黨ê陳水扁當選中華民國第10任總統, 統治台灣ê國民黨政權第1 pái失去「執政權」, 50年來, ut-chut ê台灣人總算tháu 1口氣.

國民黨落台--a, m̄-koh中華民國體制ê統治基礎顛倒koh khah鞏固, 台灣人面對ê壓迫kap危機mā無án-ne來解除.

台灣tī政治上kap China ná像愈離愈hn̄g, m̄-koh ùi各組候選人ê政策宣示, kap台灣企業家ê影響力來看, 開放三通kap中資已經是無法tō͘阻擋ê趨勢, China領導者koh明確強調「1個中國」ê前提kap原則bōe-tàng改變, án-ne落--來, 台灣就beh開始具體感受tio̍h China「促談」「促統」ê壓力--a.

選舉過程中, 各組候選人為tio̍h爭取資本家支持, 拚性命teh hoah安定kap發展, 工運團體四界走chông, soah 1點á都無得tio̍h任何重視, 勞動階層ê生活處境kap勞動條件, 看--來, 是免ǹg望會有siáⁿ-mih改善--lo͘h.

台灣島內ê China勢力m̄甘願失去政權, 選輸顛倒koh khah hiau-pai, 扭曲ê族群關係會koh khah扭曲, 壓迫者變身做改革者, 本底ài清ê歷史siàu m̄-tāⁿ bōe清, 台灣人soah tio̍h koh khah吞忍.

Hō-ló沙文主義? 主流價值一直用這個口號teh kā台灣社會洗腦, 政客kap智識分子mā thiau-kang án-ne teh抹黑社會力, 堅持講母語soah變作是有罪--ê, 問題是: 壓迫kám無--去-a? 無公正ê歷史kám清算--a?

「思想洗腦」是統治者上重要ê步數, m̄管是日本iah是中華民國統治台灣, beh消除台灣人ê反抗意識, lóng ùi消滅語言開始, 強制推sak「國語政策」. Án-ne看--來, 台灣人ê反抗運動, 使用母語來hām統治者做區別kap對抗, 是真正當mā真正常--ê.

M̄-koh, 1996年ROC總統選舉了後, 民進黨新世代公開清算台獨, 「Hō-ló沙文主義」正式變作進步反抗ê社會力ê罪名, 強調講母語soah hông講是Fascism (法西斯) 心態, 統治集團kap智識階層一再呼籲台灣人ài「包容」, ài放棄「悲情」.

Siáⁿ-mih是「Hō-ló沙文主義」? Hō-ló人kám有影壓迫tio̍h其他族群--a? 製造壓迫--ê是「體制」, m̄是Hō-ló族群!

被壓迫者beh kā權利提--tńg-來有siáⁿ-mih罪? 要求公義kám有m̄-tio̍h? Tī政治經濟文化社會頂頭, 語文ê使用, 運作ê Logic, 資源ê分配kap既有ê價值觀, toh 1項m̄是「華語霸權」teh控制? 教育kap媒體kám m̄是猶原是「華語優勢」? Hō-ló人ê意識型態kap語文使用kám佔「統治地位」--a? Hō-ló人kám péng身--a? Kám bat用「體制暴力」來「制裁」過其他族群--a?

4黨政客, 官僚, 學客kap財團, 媒體大聯合, 配合China國北京政權, poaⁿ 1齣àu戲teh蹧躂台灣人.

舊統治階層失去「執政權」, ùi「520」開始, 就一直chhē孔chhē縫, 拆明--ê, in tū-lān hō͘台灣人出頭, 這kóa China白人kap烏人管家ê心態就是án-ne!

「八掌溪事件」「宣佈bòai起核四」「罷免案」「總督府ê lām-sám-tāi」, toh 1項m̄是這phâng舊勢力集團teh畫烏漆白, 媒體kan-taⁿ驚無tāi-chì, 配合in teh修理台灣人政客?

China人真奸巧, 像罷免案, Sòng-chhū-ī (宋楚瑜)集團先放聲, 新黨á tàu贊聲, koh來就tiām-tiām「khiā高山看馬á相鬥」.

Lian-chán (連戰)這個奴才集團, tè人kha-chhng後ia̍t大旗ia̍t kah爽--去, koh hiau-pai kah大聲hiu: 台灣社會chōe-chōe問題, kap in國民黨lóng無牽連, 責任是新政府ài擔!

12月25 koh beh到--a, chiok chē機關團體phah出『聖誕節』ê名號辦 1-kóa活動, 有 1個單位koh按算beh創『造雪機』, 按時間落雪來製造X`mas ê氣氛, 實在m̄知beh笑iah beh哭!

台灣是有幾個所在會落雪? 若beh過1個外來ê節日, mā ài hō͘在地ê人知iáⁿ, 是án-chóaⁿ beh過這個節日, m̄-thang kho̍k-kho̍k-á tòe時行, tòe生理人leh起siáu, 連米國鬼節(萬聖節)都tòe-leh過.

Tī chia講che, m̄是講外來ê mi̍h-kiāⁿ lóng無好, lán lóng mài接受, 是beh ài ta̍k-ê ùi chia思考kóng, 平平接受外來文化, 是án-chóaⁿ日本人有才調kā米國來ê枋á (滑板), pìⁿ-chiâⁿ日本stailuh (stayl) ê枋á文化, ah lán kan-taⁿ會曉kui盤捧--去, bē曉煎煎炒炒--ê, 加料變作1-chhut新菜?

時代行到chia, chiok chē人lóng teh講台灣ài加入「國際社會」, 真少人有想著kóng, chit-má ê國際社會是米國leh管--ê, kám講kap世界行做伙, 就ài「hō͘中國接受, hō͘米國歡喜」?

Lán beh行ka-tī ê路, 就m̄免óa siáng食穿, 親像第三世界bē-giàn西瓜óa大pêng, 用ka-tī ê主體形成組織.

E-po͘, góa tī街á路se̍h ê時, 聽著叮叮噹噹ê Jingal Bells, o̍at頭看著1欉1欉紅--ê綠ê聖誕樹á, 面頂koh有閃閃sih-sih ê彩色電火球á, 若無, 就是銀--ê金ê Star.

Góa hiông-hiông chhoah 1 tiô, che ká-ná是米國New York市區ê X'mas暗暝, ah是tī英國London街頭? Khàu-pē, lóng m̄是, che是台灣ê Taipei City! Kám講ta̍k-ê人lóng變基督徒--a? 若無, nah lóng leh過X'mas?

Lán m̄是基督徒, 過X'mas就無hiah重要. Án-ne講--來, thài有hiah chē人teh siáu這個節日--leh? Kám是電視內底hit-kóa『特賣』『促銷』有ê無ê, 做kah熱phiat-phiat? Kám是冊局, 『飾品店』內底, lóng是chiok「Kawaii」ê『耶誕卡, 娃娃, 吊飾』? Kám是各機關, 學校, 團體舉辦ê X'mas活動, hō͘ lí心ngiau-ngiau? Kám是tī 12--月ê寒--人, 無買 1欉聖誕樹á來厝--nih tàu鬧熱, 就無夠溫暖? Kám是tī X'mas暝, 無kap Lover去食「X'mas大餐」就無Romantic? Kám是冬尾鐘聲響ê hit暝, 若無hi-hi-hoa-hoa ê Party, 就是sông-phiah-phiah, 無夠Fashion?

Góa感覺, lán teh hèng過X'mas, 其實是用錢買--來-ê, m̄-koh che實際上, 是生理人beh趁lán ê錢所設ê局, hō͘ lán kho̍k-kho̍k-á開錢, kioh-sī會tàng買著X'mas kāng款.

莫泊桑bat tī i ê小說內底寫: 12點ê X'mas暗暝, gún做伙行去教堂, 冷風1陣1陣, 街á路暗bong-bong無半個人, gún趕緊行入去內面, ta̍k-ê lóng跪tī塗kha, 雙手ná chhoah ná祈禱, 雖然風透天寒, m̄-koh ta̍k-ê tī X'mas ê歌聲內底, 真心teh祈禱.

聖誕節本底是宗教性ê節日, 是基督徒beh記念耶穌, 感謝上帝kā i ê後生賜hō͘眾生ê節日.

耶穌kám真正是12月25生--ê? 聖經無kā lán講. 聖經內底有chiâⁿ chē故事kap耶穌出世有關係, m̄-koh, kui本聖經lóng無講耶穌ê生日是toh 1工, mā無規定ài慶祝.

有 1-kóa教派無tih過聖誕節, 甚至拒絕過聖誕節, 像「耶和華見證人」, in認為聖誕節是「聖經內底無講--著, ùi異教借--來」ê節日.

論真講, 聖誕節確實是基督教ùi in講ê「異教」借--來-ê. 根據歷史學者ê研究, 12月25 本底是羅馬帝國皇帝定ê「太陽神祭典」. 基督教本底tī羅馬是hông壓迫--ê, 尾手變作合法, 甚至是唯一合法ê宗教.

基督教是2000冬前chiah有--ê, tī接觸基督教chìn前, ta̍k-ê民族lóng有ka-tī ê傳統宗教. Hit-chūn, 宗教kap生活是kap做伙--ê.

21世紀, tng是開展新時代ê kha-ta̍h, lán kám已經準備好勢beh來面對--a?

20世紀上尾1年, 統治台灣50外冬ê China人, 暫時kā China民國ê行政權niū--出-來, 真chōe人soah kioh-sī台灣人就「出頭天」--a.

100年來反體制ê力量, 壓過反動勢力, mā kā台灣人ê政治力keng入去總督府; chit-má, in m̄-tāⁿ「反形」--a, 連人民創造歷史ê權利, in都beh搶--去!

舊政客kap新官僚對「核四案」hām「漢語拼音案」就現出這種扮勢.

Phah拚100年, kan-taⁿ是換1 tīn台灣人政客來thún-ta̍h, án-ne kám有值?

Mài tī我面頭前流目屎

我無hit款心chiâⁿ

目屎會tàng洗清歷史

Bē-tàng消tháu

心肝頭ê血跡

──節錄自Tân Bêng-jîn《E-po͘ ê 228公園》

21世紀ê頭1個228 liam-mi beh到--a, 最近ta̍k-ê lóng chiok關心228到底有放假--無. Ùi解嚴到taⁿ, 談論228已經m̄是1種禁忌, 老一輩台灣人心內ê歷史記tì, 經過半世紀chiah得著tháu-pàng; 少年輩mā因為好玄, 開始teh「研究」228.

過去ê禁忌，soah pìⁿ-chiâⁿ chit-má ê時行. 時行m̄是m̄好, 但是m̄是這lō時行法--ê, 因為lán看--著, ta̍k-ê無關心歷史kám有清算, kan-taⁿ想beh放假, hit-kóa tī 228犧牲ê前輩若知影, 一定會氣kah耳á chhèng煙, ùi土kha peh--出-來, kā lán kiāu kah牙so͘--去.

過去國民黨kā政權la̍k tiâu tiâu, tī hit個實施高壓戒嚴統治ê時代, lán欽佩施明德先生kap其他反對運動ê頭人敢衝敢拚, 想beh ián倒不公不義ê中華民國體制, in付出ê代價是hông關hông thâi hông刑, lán對in lóng真尊重, mā真肯定.

M̄-koh, 過去有行tī時代頭前ê勇氣kap智慧, 無代表1世人lóng會tàng堅持, 坐監是為著個人理想, 是歡喜甘願--ê, nah會sái變做個人ê政治資本? Góan替台灣人感覺m̄值--ê是, 這kóa éng過chhōa lán衝體制ê頭人, 到taⁿ顛倒比lán ge-siâu ê體制koh khah反動, koh khah保守!

施--先-生 6冬前主張ê『大和解』, 根本就lia̍h無台灣社會ê重點. 台灣人kap ah山á ê衝突, 是以階級kap省籍做資源分配ê國家體制製造--出-來-ê, 是錯誤政策造成ê結果, m̄是問題發生ê原因!

1949年中華民國tī中國戰輸共產黨, làu-phâu來台灣, chi̍t來到地, 無熟無sāi, 為beh tiàm chia khiā起, hō͘ i ê統治有正當性, 長久以來就用剝削勞動者ê步數, 來飼這kóa ah山á, 想beh kā in giú khah óa--leh, 對上起頭ê水電半價, sī細ê教育補助, iah koh有時機bái bái, soah tāi先『週休二日』, 照常調月給...實在想lóng無, 是án-chóaⁿ平平kut力做, in就báu khah chē?

國家是beh照顧所有國民--ê, in mā講lán kap in是kāng 1國--ê, kāng 1國nah會差chiah chē? Chiah-ê軍公教加báu chiah chē, lán mā m̄是講in lóng有罪, beh叫in吐吐出--來, kan-taⁿ是ǹg望lán teh反抗這個àu體制ê時chūn, in會tàng kap大多數台灣人khiā鬥陣, tī精神上kā lán支持. 無beh tàu-saⁿ-kāng就煞--a, in顛倒hām中華民國愈行愈bä, koh kā lán chàm 1 kha!

10月初10又koh到--lo͘h, 自細hàn到大hàn, 自幼稚園讀到大學, 這工ta̍k冬lóng有放假, 講是中華民國ê『國慶日』, 就是90冬前革命成功ê日子.

既然是『國慶日』, chiâⁿ做這個國家ê國民, 應該ài歡歡喜喜過這個節, nah會tī台灣民間看bē tio̍h慶祝ê氣氛?

有人講, 因為台灣m̄是中華民國. 開羅宣言, 舊金山合約chham國際法理論lóng會tàng做「台灣主權未定論」ê證據. M̄-koh這種講法有chiok chē爭議; koh再講, 無論過去án-chóaⁿ, 現此時統治台灣ê國家就是中華民國. 所以台文社想beh tùi khah實際ê角度去探討這個「國家認同」ê問題.

若準講, 國家統治ê正當性是因為i beh照顧人民(就親像R.O.C. ê課本教--ê), 是án-chóaⁿ當大家leh承受高學費ê痛苦ê時, soah kan-taⁿ軍公教ê gín-á讀冊有補助, 甚至補kah倒賺? 是án-chóaⁿ lán ê sī大人望健保望kah gāng面--去ê時, 全台灣就已經有10 thóng間『榮民醫院』, hō͘老芋á看病連掛號費lóng免納? 是án-chóaⁿ台灣ê百姓, 拚死拚活拚無1間厝, soah有人靠1個『眷村改建條例』, siáⁿ-mih lóng免做就有1間厝thang khiā?

若準講che是lán ê國家, 是án-chóaⁿ i會the̍h多數人納ê稅金去照顧chió數人? 若準講R.O.C. ê課本講白賊, 國家m̄是beh照顧人民, 若án-ne莫怪有人無認同這個國家!

前1-chām-á A-bî招我上i ê電台節目, 分享1-kóa cha-bó͘人ê想法, chiok久無chham人án-ne討論cha-bó͘人ê議題--a, éng-kòe tī社團, 我hām Ahong會sái講che講thàu暝, 出業了後, chit款機會顛倒khah chió.

Kap A-bî做夥討論ê 3篇文章是「走chhōe信仰, thiàⁿ kap分享」(A惠), 「Ka-tī ê房間」(嘉芬)kap「藝術品」(劉雅琪), chit 3篇文章kā cha-bó͘人tī社會ê地位, tī家庭ê角色, kap hō͘外界束縛ê價值觀寫kah chiok活跳, tī chia, mā想著用cha-bó͘人ê形體tī社會生存ê ka-tī.

M̄知ùi siáⁿ-mih時chūn開始, chit ê世界開始pun cha-po͘ cha-bó͘? Mā m̄知ùi siáⁿ-mih時chūn開始, cha-po͘ cha-bó͘無kāng款ê標準hông訂gah chiah-nī清楚, chiah-nī嚴格, 連食飯, 放屎, 講話ê聲sàu mā hông訂死死? Tī時cha-bó͘人tī chit ê社會hông看soe-siâu? Bē-sái有想法, bē-sái妝了bái, bē-sái主動追求ka-tī ê權利hām幸福, bē-sái做ka-tī ê主人, siáⁿ-mih tāi lóng ài照沙文ê價值觀kiâⁿ, tī chit種無尊重人性ê社會規範內底, m̄-tāⁿ cha-bó͘人hông扭曲, 連cha-po͘--ê mā hō͘ chit種game rules bú gah m̄-chiâⁿ人--去.

Chit-chām-á siōng時kiâⁿ ê話題就是『璩美鳳偷拍案』, ùi tāi-chì piak-khang到案件審問, ta̍k-ê lóng teh討論『璩美鳳』個人ê行為, 媒體lóng teh報『偷拍光碟』iáu有siáⁿ-mih版本, 男主角是siáng, koh有jōa chē有頭有面--ê kāng款有『情色風暴』......chit款氣氛m̄-tāⁿ ka-chài ka-tī m̄是『偷拍案』ê主角, ká-ná koh有看好戲ê味.

Chit件tāi-chì piak-khang, 是社會問題, m̄是單純ê個人事件. 當然, tī chia個人ài負責任, chit-ê變態ê社會, m̄-tāⁿ縛死cha-bó͘人ê頭殼, koh tēⁿ死cha-bó͘人ê身體, ùi éng-kòe ê『貞節牌坊』, 『三從四德』, 到現代ê『美麗新女人』, cha-bó͘人對ka-tī ê頭殼kap身體lóng m̄-bat有自主ê權利, 永遠m̄是獨立ê個體, kan-taⁿ因為i是「cha-bó͘人」.

電腦彩券大賣, 人民teh siáu發財, bē輸éng過teh ī「Tá Chia Ló」, ta̍k-ê都siàu想1聲就變做好額人.

電腦彩券這種siáu法, lán m̄免用「道德」ê口氣kā phìⁿ-siùⁿ, sàn-chhiah 人siⁿ本就會想beh變好額, 日子免koh hiah kan苦過. Kan-taⁿ是講, lán若論真kā看, ta̍k-ê siáu kah ná gōng giàn頭, hō͘政府這ê做tong-kóng--ê騙m̄知.

這kóa新政府ê舊官僚功夫siuⁿ bái, m̄-tāⁿ無法tō͘改善lán ê經濟, koh tio̍h-ài phāiⁿ舊政府ê nōa賬, 政府無錢, 就用「電腦彩券」這ê步數來lián人民ê錢.

當初時發行「電腦彩券」, 講是beh khêng錢來做「社會福利」; 若照in公佈--ê來看, chiah-ê收入, 獎金佔60% (tio̍h獎--ê ài koh khioh稅金), 13.25%是管理kap銷路ê費用, chhun ê 26.75% beh做社會福利kap公益, 這內底5% beh the̍h去補「健保」了--去ê錢, 45%做「國民年金」ê準備金, 50%分hō͘地方政府運用.

Tī歐洲hiah-ê khah進步ê國家, 「社會福利」這條開銷, 大部份是政府ùi資本家hia khioh稅金來--ê.

Chit kúi禮拜因為928教師beh遊行ê tāi-chì, 媒體, 網路kúi工吵kah pìn-piàng叫, 有--ê支持, 有--ê反對, lóng有in ê看法kap論點. 借chit-ê機會hō͘ ta̍k-ê針對928事件去思考做討論, tī民主社會是真sù常koh有意義ê tāi-chì, tī chia, góa mā beh tàn kúi-ê想法kap ta̍k-ê bóng話.

Tī chiah chē贊成ah是反對ê聲--nih, 有1 ê現象是: 反對團體ê聲明往往會hō͘支持團體抹烏講有政治陰謀, teh sái-lōng教師kap勞工團結ê機會, 有--ê koh hông講是反動ê右派, ah是直接做人身攻擊. Chit-ê現象證明台灣社會iáu無批評ê文化, 若有人提出無kāng款ê觀點, 就sûi hō͘人tì帽á, 批kah連人格都無, 根本無法tō͘針對事件本身做討論, koh khah免講對話--a. Lán ài創造批評ê文化, 批評m̄是beh破害, 顛倒是提供無kāng角度切入ê觀點, hō͘討論koh khah闊面; 有批評chiah有才tiāu對話, 有對話chiah有才tiāu採取行動.

Tī lán chit-tè土地, 母語消失危機, 環境破害, 勞動條件惡化, 經濟崩盤......chiah-ê問題愈來愈嚴重, ROC ê統治術mā愈來愈iù路, lán ài koh khah téng-chin, koh khah團結來面對.

教師hoah工作保障變chió ê時, 政府sûi an-tah講會補還--in, che是穩固統治集團ê手路, 若無教師做思想洗腦ê khang-khòe, ROC就親像1 chiah椅á減1枝腳khiā bē chāi kāng款. Chìn前財團吵beh食糖á, ROC就sûi開放三通, chit-má教師mā吵beh有糖á食, ROC就sûi tah胸khám kòa保證會hō͘ in滿意ê回應, m̄-koh是án-chóaⁿ農民勞工對生活條件kap勞動環境hoah出不滿ê聲音ê時, 顛倒hông bok kah半死, koh hông講是街頭暴民? 公平tī toh位? 正義tī toh位? 壓迫lán ê統治者iáu koh踏tī lán頭殼頂--leh.

今á日教師體認tio̍h權利受損害, beh行出來抗爭, chit點值得肯定kap鼓勵, m̄-koh beh提醒--ê是, tī訴求chìn前, 教師ài先看清楚ka-tī ê定位, mā ài先批判ka-tī長久以來享受ê特權, koh有替統治者進行思想控制ê角色. 雖bóng che m̄是教師自願ah是有自覺ê行動, 總--是造chiâⁿ國家機器有法tō͘繼續壓迫台灣人ê步數, chit-ê mê-kak ài看hō͘清, m̄-thang kan-taⁿ守tī自身利益出發, 想beh有食koh有lia̍h, ài khah闊面對kui-ê結構hām教育體制鬥爭.

928老師beh上街頭, giâ--ê是勞動者「團結」kap「尊嚴」ê旗á. Góan真歡喜看tio̍h老師總算了解, tī「頭家薪勞」ê勞動體制內底, in是hông chhiàⁿ ê勞動者; 勞動者需要「團結」kap「尊嚴」, 老師mā總算理解--a. 歷史kā lán講kah真明: 權利bē ùi天頂lak--落-來, 勞動者tio̍h-ài「團結」chiah會有「尊嚴」.

M̄-koh, lán斟酌kā看, 老師chit-pái團結chò-hóe beh爭取in ê尊嚴ê時, soah發現chiah-ê老師對tāi-chì有kóa誤解; chiah-ê老師若正港beh tī 928 hit工, 誠懇khiā tī全體人民kap國家機器面頭前, 展現勞動者ê骨氣kap尊嚴, tio̍h-ài kā誤解降到上低, hō͘ ta̍k-ê聽清楚老師到底beh爭取siáⁿ-mih.

老師總算了解ka-tī mā是勞動者, mā願意為著勞動者集體ê利益來奮鬥. 勞動者beh團結, 是因為tī勞動體制內底, 個別工人無才tiāu kap有錢有勢koh掌握意識型態國家機器ê資本家對抗, chiah tio̍h透過「集體」ê團結, 來確保「個人」ê利益.

M̄-koh tī台灣, 老師ê頭家是中華民國政府, chit-ê政府為tio̍h種種考慮, kā老師(當然mā包含軍公人員) hām台灣社會隔--開, hō͘老師比民間社會khah好ê待遇kap補助. 也就是講, 個別ê老師是受tio̍h政權優待--ê. Chit款優待為tio̍h siáⁿ? 確保統治ê基礎, 保持意識型態灌輸機器順利運作! 台灣社會內底, 真chē優秀m̄-koh家境bái ê少年人大量投入師範體系, 就會tàng koh khah理解chit-ê事實. 是án-chóaⁿ hit-chūn ê老師bē認為ài組工會? 因為無自發性ê組織, 老師ê個人權益就得tio̍h保障--a; 頭家(政府)已經hō͘老師個人相對ê優待--a. 因為chit款權力關係, 老師享受--tio̍h-ê, 比一般勞動者koh khah好, mā chiâⁿ盡力teh執行灌輸意識型態ê khang-khòe.

Chit-má, 老師雖bóng理解ka-tī是勞動者--a, m̄-koh iáu無理解長久來受政權優待ê歷史事實, 甚至koh誤解尊嚴真正ê精神: 管家若beh得tio̍h正港ê尊嚴, m̄是趕緊要求in ê頭家『扣多少補多少』, in tio̍h-ài hām人民khiā tàu-tīn, 批判權力者為tio̍h鞏固不義體制ê一切手段, chit款尊嚴chiah是廣大勞動者ê尊嚴, chit款團結chiah是促進社會進步ê團結.

Tú聽tio̍h做老師--ê因為ka-tī ê權利beh行街頭抗爭, góa 1時soah gāng--去, m̄知比一般人khah好過ê in是koh beh爭siáⁿ?

Tī台灣, 若照3角形ê經濟結構來看, 軍公教階層是踏tī大多數人民ê頭殼頂, 享受統治者賞賜特權ê管理階層, m̄-tāⁿ靠台灣人ê稅金teh飼--in, koh替統治者用無形ê思想統治台灣人. Tī歷史ê水chhiâng--nih, in大多數是替ROC統治台灣奴隸ê管家, m̄-bat kap台灣人khiā chò-hóe--過.

Chit-má, ROC財政hō͘ in ka-tī bú kah kiōng beh破產, the̍h台灣人ê錢補bē lī, 就想beh ùi管家ê lak-tē-á jîm--tām-po̍h, soah hō͘ chiah-ê做老師--ê tiô--起-來.

西方進步國家ê社會改革力量, 是靠有自覺ê知識分子引chhōa人民大眾, 長期kap國家機器鬥爭來--ê, chit-ê基礎是吸收進步思想ê知識分子, 透過教育hō͘人民有思想武器, kui-ê過程內底, 教育體制是重要koh有力ê工具.

M̄-koh tī台灣, 教育體制hō͘ lán--ê顛倒是保守koh封建ê價值觀, 教lán tio̍h乖乖á認份做奴隸, m̄-thang想孔想縫beh péng beh反. M̄-tāⁿ思想教育受控制, 連教育預算hām資源mā受剝削, 一直hông Cancel, 台灣人kan-taⁿ lān-pha tēⁿ--leh忍--lòai, 若無, 就是ka-tī想phiat步chhōe出路.

Chit-chām-á, 陳水扁政府準備kā老師khioh稅金，為著beh安tah老師反彈ê情緒, mā緊koh放風聲: 『扣多少補多少, 實質所得不減少』, chit-ê議題hō͘ kui-ê社會鬧熱kún-kún, 全國教師會對陳水扁政府ê態度mā無滿意, beh tī 9月28行街頭, 遊行ê主訴求是beh爭取「教師組織工會」ê權利, 同時強調in m̄是為著『抗稅』ah是『爭權』, 是beh『聯合全台灣勞動者階層，反對對勞動階層的分化及鬥爭，要求政府以對待企業主的態度對待人民。』

教育體系一向保守koh封閉, chit-má老師beh行--出-來, 上街頭來kap社會對話, che當然是值得期待--ê, m̄-koh góan iáu是有1-kóa顧慮kap提醒:

1. 中華民國體制一向teh蹧躂人民大眾, kā剝削--來ê chiah-ê資源the̍h去服務chió數人, 過去, chit-tīn chió數人主要是「國民黨權力集團」, mā thòaⁿ到政客, 財團kap軍公教特權, che是bē-tàng否認ê事實; 教師階層ê工作保障, 好過其他勞動大眾幾nā倍, 無業績壓力, 薪水bē減, bē失業, 福利好, 錢khiām銀行利sûn kôan, gín-á讀冊有補助, 「勞動環境」穩定, 老師是「國家」chhiàⁿ--ê, 是勞動大眾ê稅金teh飼--ê, 就經濟面來講, in享受--tio̍h ê國家照顧kap物質基礎, 確實比勞動大眾穩固太chē--leh.

2. Chit-ê體制對無kāng階級ê態度差別chiâⁿ大, soah koh有châi-tiāu hiah穩固, 軍公教是重要ê共犯; 教育體系負責「意識洗腦」, hō͘人民群眾接受chit-ê體制價值觀ê束縛, kā人民群眾追求公平ê意志消tháu--去, 教師階層就是chit-ê「任務」ê執行者!

3. 單純就教育來講, 教師階層án-chóaⁿ看待ka-tī kap社會ê互動關係? 做老師--ê kám m̄是teh叫gín-á接受現狀? Tī學校, 除去智識, gín-á kám m̄是連人格都ài hō͘老師chit-ê權威來「審查」? 違背人性ê教育品質, 無符合社會現實ê教學內容, 無chiâu-chn̂g ê教學環境, 保障優勢者ê升學制度......chiah-ê lóng是tio̍h量早來改革ê問題, ah大多數老師teh chhòng siáⁿ? M̄-tāⁿ繼續teh「執行任務」, in hōan-sè koh是改革ê阻礙!

M̄知ta̍k-ê kám有hām góa kāng款ê困擾, 報紙掀--開, kāng 1項tāi-chì去採訪1-kóa學者專家, ta̍k-ê ê看法soah lóng無siâng. 若是別國ê tāi-chì會tàng bóng kā當做小說看, kiám-chhái真趣味koh真刺刻, m̄-koh若是hām lán有關係, 發生tī台灣--ê, 無siáⁿ-mih想法ká-ná講無siáⁿ會過. Beh判斷beh主張ê時, chit-chūn ta̍k-ê beh問--ê是: taⁿ, siáⁿ-mih人講--ê是真相?

Chēng到taⁿ看真chē有關228 ê冊, 一直teh想講到底toh 1本寫--ê是真--ê, 到最近chiah知, 會tàng講lóng是真--ê, 若ùi無kāng立場來看, 會得tio̍h無kâng ê結果, 就親像ùi飛lêng機頂頭看淡水河, hām tī pò͘岸邊看淡水河, kāng 1條溪水, 看--tio̍h-ê soah chiám然無kâng. 問題就是beh ùi toh看? Beh khiā tī siáⁿ立場看?

Góa頭1 kái看tio̍h有關228 ê mi̍h-kiāⁿ, 是tām高中ê課本, 量約á寫8 chōa, 大概交帶發生siáⁿ-mih tāi-chì niâ, 無講tio̍h為chóaⁿ樣會發生, 對現此時ê台灣社會有siáⁿ影響? 課本m̄敢有任何評論.

Koh續--落-來是高中歷史老師ê補充, i有講tio̍h 228發生ê背景因素: 台灣hām China分開50冬--a, 2 pêng ê文化kap歷史記tì無kâng, 陳儀koh實行公賣制度等等暴政, chiah會發生tāi-chì, góa尾後chiah知iáⁿ che是人teh講ê「台派教授」ê看法.

Koh來是看戴國煇ê冊, i是統派, 認為台灣人是China人, 228雖bóng講國民黨ài負siāng大ê責任, m̄-koh lán bē-tàng因為án-ne來放棄中華民國, 台灣獨立chit-ê政治主張是少數受難家屬情緒性ê表現. Chit-ê事件教示lán tio̍h思考民主政治ê重要性, lán kāng款ài為tio̍h中華民族長久以來受帝國主義壓迫ê情形做反省kap思考, 繼續phah拚.