Sio-phah ê tāi-chì真緊tō hō͘老師知影--a, 學校決定beh thâi雞教猴, thang好維護學校ê風氣.
正旗來到學校, 身軀ê孔嘴iáu tī--leh, tiām-tiām坐tī教室內底, 想tio̍h kap爸爸ê對話, 目kho͘ soah紅--起-來.
「Lí目chiu án-chóaⁿ--a? Kám是無爽快? Góa ê手巾á是清氣--ê, ē-sái the̍h去chhit.」坐tī正旗邊--á ê cha-bó͘ gín-á叫做「黃淑貞」, i看tio̍h正旗teh艱苦, 續手sa手巾á hō͘ i.
正旗kā看--1-ē, kā手巾á接過手, 說謝了後tō koh tiām靜--起-來.
淑貞感覺正旗人真好, koh真gâu畫圖, m̄-koh最近m̄知是án-chóaⁿ, 下課lóng走去便所偷食薰, 上課ê時kui身軀lóng薰味, hō͘ i kiōng beh擋bē-tiâu.
「正旗, 放學kám beh來góan tau sńg? Góan爸爸媽媽今á日出--去, lán ē-sái偷食真chē物件--o͘h!」淑貞in厝是kám-á店, ta̍k-pái lóng真巴結請同學去in tau食sì-siù-á.
「O͘h! 好ā......」正旗kā淑貞看--1-ē, 心內真感激.
Chit-chūn, 沈能信ùi外口chông--入-來, 氣phut-phut講:「M̄好--a! A婆á beh kā王奇退學!」
「Siáⁿ-mih!」
秋天, 是菅芒開花ê季節, tī風中hàiⁿ--leh hàiⁿ--leh ê菅芒, hō͘人感覺悲傷.
Tī溪邊, 生kah kui-phiàn ê菅芒邊--á, 有1間土地公廟á, he是in社區ê信仰中心, 王奇in tiāⁿ-tiāⁿ tī chia聚會.
空氣中有振榮工業區排--出-來ê化學廢氣ê味. Chit-tīn國中生tiām-tiām坐tī土地公廟á ê石椅á頂, 石椅á冰冰涼涼, 正旗無sè-jī ka 1 ē冷sún.
「Soah--lah, ē-tàng án-chóaⁿ?」王奇喘1 ē大氣:「轉去其他學校mā bē-bái, siōng無, bē像lán chia管chiah嚴.」
王奇kám真正無要意? Koh有, 發生chit款tāi-chì, in父母ēán-chóaⁿ想? 正旗心內án-ne teh想, m̄-koh m̄敢講--出-來.
「其實, lán訓導á早tō看lán無順眼--a, chit-pái是趁機會報復, 像góa, ta̍k-pái to hō͘ i chàm kah siōng慘, lín看, 頂pái hō͘ i phah ê傷痕iáu tī--leh.」沈能信kā衫giú--起-來, 期中考國文考無好hông phah ê傷痕, 凝血ná 1條1條蟲tī i kha-chiah-phiaⁿ.
「是ā, i是beh表現hō͘校長看, thang好升級, 加薪水, kán! Piáu-kiáⁿ!」
「Sái lín niâ--leh, nah ē-sái hō͘ i chiah好過!」
「聽講in kiáⁿ讀中正國中, 平常時á真臭屁, mā真chē人看i bē爽, kui-khì--lah, lán chhōe 1工來kā khàm布袋.」
眾人愈講愈歡喜, 王奇hiông-hiông o̍at頭問正旗:「Án-chóaⁿ? Beh tàu-tīn去--無?」
正旗gāng--1-ē, 面á紅紅講:「Bē-sái, góa ài tńg--去-a, 若無, góan 父母ēkā góa罵.」
「Oeh! Lí......」有人想beh指責正旗, 王奇kā擋--落-來,「無要緊--lah, lí緊tńg--去, lán chiah koh聯絡.」
Kap眾人sio辭了後, 天色mā暗--a, 正旗ûn-ûn-á行tńg厝, 人影giú kah長長, ta̍uh-ta̍uh-á ǹg頭前徙tín動.
「Hái, 正旗, nah ē 1 ê人tńg厝?」黃淑貞ùi後壁走--來, 甜but-but kā問.
「O͘h! 無--lah, góa tú kap王奇in分開niâ.」正旗sió-khóa緊張.
「O͘h!」淑貞嘴唇翹tu-tu:「其實lán導--ê mā siuⁿ超過--a, góa感覺王奇做人bē-bái, kan-taⁿ是性地siuⁿ chhóng-pōng, lí講tio̍h--無?」淑貞ná講身軀ná hàiⁿ, 想beh得tio̍h正旗ê認同.
「Hmh.」正旗真歡喜kā淑貞講:「Tio̍h ā, lí mā án-ne想--o͘h? Góa mā án-ne認為! Lí看奇--á, 其實i有真chē趣味ê怪齣頭, a弟á數學真強, m̄-koh其他科是khah bái......」
「Tio̍h--lah!」淑貞kā冊包hàiⁿ--1-ē:「Lí m̄是放學beh來去góan tau?」
「好ā!」
黃淑貞in厝有2層樓, 1樓做店面, 2樓是khiā家, 地點真óa學校, 同學下課iah是放學lóng ē來chia買物件, 生理bē-bái. 今á日, 淑貞專工kā鐵門放--落-來, chhōa正旗去樓頂開講.
「Lín厝真好neh.」正旗看客廳ê魚箱á, 內底有chiok chē『熱帶魚』, 魚嘴邊--á koh一直puh波á, i看kah se̍h神.
「無--lah. Beh食餅--無? 真好食--o͘h! 店--nih真罕得進chit種餅.」淑貞坐去正旗邊--á, seh 1盒餅hō͘ i, 笑笑á問:「Oeh, 正旗, lí以後想beh做siáⁿ?」
淑貞愈óa愈近, 正旗感覺身軀sió-khóa燒燒, 頭殼額á mā teh流chhìn汗.
「O͘h......m̄知neh, m̄-bat想--過neh......」
正旗緊張kah m̄知beh án-chóaⁿ應, 2 lúi目chiu mā m̄敢看淑貞, kan-taⁿ敢kā偷看, soah無sè-jī看tio̍h淑貞ê胸坎.
Tng青春期ê淑貞身材bē-bái, 正旗想tio̍h學校「健康教育課」ê老師bat講--過, chit ê時chūn ê cha-bó͘ gín-á『性特徵』ē ta̍uh-ta̍uh-á明顯, 想--leh想--leh, 正旗soah歹勢kah面紅--起-來.
「Án-ne--o͘h.」淑貞kā頭毛póe--1-ē:「其實góa mā無想清楚, lí看, góa tī lán班ê功課mā m̄是chiâⁿ好, 看--來省立女中是考bē-tiâu--a, tio̍h-ài來去讀高職--a. 聽導--ê講, 考高職--ê無siáⁿ前途, 生活mā無像高中生hiah精采, góa想, góa chit世人ē過kah真普通......」
正旗聽tio̍h chiah-ê話, 真正經kā應:「Bē--lah, 考高職mā bē-bái ā!」I認為人ê價值無應該用成績kap讀ê學校來決定, m̄-koh soah m̄知beh án-chóaⁿ表達ka-tī ê意思. 話講soah, 直直相淑貞, 感覺i真古錐, 是án-chóaⁿ kāng班坐chò-hóe chiah久--a lóng m̄-bat發現?
了後, 2 ê人坐tī客廳看電視, 到9點外chiah sio辭.
留言列表