2000年民進黨陳水扁當選ROC總統, pun-tio̍h外來體制ê「行政權」了後, góa kap chi̍t-kóa頂下iân ê運動參與者, 見面tiāⁿ teh互相提醒:「運動」tio̍h án-chóaⁿ脫離民進黨ê暗影? Tio̍h kap政治頭人切--開? Tio̍h án-chóaⁿ tī既有ê基礎繼續sak進前?
4冬過--去-a, chiah-ê對話無改變運動ê步調. 4冬來lán靠勢頭人ê地位kap資源, 無beh逼頭人繼續ǹg前, 無beh tī既有ê基礎sak koh khah長遠ê目標, 繼續正面瓦解體制霸權ê戰爭, 顛倒hō͘頭人kā進步ê社會力kōaⁿ去替政客背書, 替政客ê權力資源鬥爭進行政治動員, tòe政客kha-chhng後去承認體制, 承認既有ê現實!
「台灣人出頭天」ê信念, m̄是beh追求 1 ê號做「台灣國」ê China體制, mā m̄是beh追求 1 ê不義原在ê台灣人政權! Lán beh追求--ê猶原是「對外對抗中華人民共和國, 對內消滅中華民國」; 「起國」tō是tī人民運動--nih, 繼續加強人民ê精神武裝, 繼續深化人民ê思想力量, tī kap體制霸權ê鬥爭--nih, 形成新ê價值體系, 新ê社會互動關係, tī辯證ê過程, 產生革命性ê先鋒者, 組織進步群眾ê主體力量, 對抗/瓦解統治者ê文化霸權(hegemony), 起造新ê體制, 新ê國家, 新ê民族!
M̄-koh tī現實ê鬥爭--nih, lán kám有認真teh檢驗lán ê kha步? Lán kám正經teh保惜既有ê基礎? Lán lóng安慰ka-tī:「已經比過去khah進步--a!」事實顛倒是lán一直讓一直吞jún, 一直容允投機妥協, mā繼續容允信念一直phah折, 「無魚蝦mā好」變做lán放棄抵抗ê借口, tiām-tiām-á看「台灣」hō͘「中華民國」食--去, 「2 ê中國」kā歷史ê公義替代--去, mā tiām-tiām-á看外來史觀chiâⁿ做lán ê價值認知, 華語漢字霸權chiâⁿ做台灣ê既有事實!
無m̄-tiõh! Kap過去「藍色恐怖」ê時代sio比phēng, chit-má外來體制ê「行政權」la̍k tī台灣人政客手頭, che確實是時代ê進步.
M̄-koh台灣人做總統kám tō結束「外來體制」--a? Che極加是kap舊勢力鬥爭累積ê成果, m̄-koh lán iáu-bōe結束外來體制--leh, 李登輝kap陳水扁是「中華民國總統」, 統治lán--ê iáu是「中華民國」, 控制lán ê頭殼--ê iáu是華語漢字霸權, chiâⁿ做lán頭人--ê iáu是ROC體制價值成就ê權威者!
Lán無結束「外來政權」, 陳水扁是外來體制──中華民國ê總統; 民進黨是kap外來集團「政黨輪替」, m̄是消滅「外來政權」! 若無, kám有外來政權kap本土政權teh「政黨輪替」--ê? 若已經是lán ê國家--a, 外來者kám koh有thang hiau-pai? 舊勢力kám koh有「權利」hoah聲? 外來政權kám ē-tàng用「選舉」來「復辟」? Hām發言權tō無, nah有thang koh hō͘ in teh iau飽吵? 結束舊時代舊體制, 界線真明確(che是thong世界ê標準): 歷史審判, 外來政黨解散, 資產沒收, 壓迫者懺悔道歉, 舊價值清洗......
Lán無beh談清算, 無beh討歷史ê公義, 無beh計較舊勢力iáu koh teh教示台灣人, mā無beh質疑台派政客kap學客iáu是用舊價值ê權威kap信仰teh sńg-tn̄g人民運動!
台灣史m̄是禁忌--a, m̄-koh lán無計較是án-chóaⁿ歷史ê解說是有選擇--ê: 堅心主張階級tháu放kap民族獨立ê台灣共產黨ùi lán ê歷史消失--a, kan-taⁿ teh肯定beh同化ê自治派/議會派讀冊人; 228堅持反抗ê性命無--去--a, kan-taⁿ teh siàu念投降ê處理委員會精英; kúi 10冬來反抗者ê信念無人beh談--a, kan-taⁿ teh o-ló妥協投機ê民主派/反對派!
228 ê歷史審判m̄-bat開始, lán tō接受政客ê pe̍h-chha̍t, 228變做是「族群衝突」「文化差異」, m̄是「民族屠殺」, 228 kap藍色恐怖造chiâⁿ ê社會集體心理扭曲m̄免治療/反省/重建, óa附外來壓迫者ê投機者m̄免phìⁿ-siùⁿ, lán直接向in ê權威投降!
台灣人支持ê政治集團替代外來政黨hōaⁿ ROC行政權, 4冬來, 無取消民族差別ê政策, 無改變剝削人民ê資源分配, 無瓦解kā lán洗腦ê China文化霸權, 反核四, 取消軍公教優待, 結束財團特權, 瓦解地方派系壟斷, 挑戰華語漢字霸權, 改造媒體......., toh 1項in m̄是向強勢者屈服, 向特權者投降, 向優勢階級妥協, m̄-koh lán容允in選擇反背人民!
台派政客4冬來無beh清算舊勢力, 無beh進行瓦解中華民國ê鬥爭, 顛倒koh壓制台灣人追討公義, 到選舉beh ti̍h選票--a, chiah趕緊呼hoah來「228手護台灣」, lán無beh要求政客交帶, 顛倒趕緊sio招來執行中華民國前後任大總督ê意志, thang好「避免外來政權復辟」, soah無beh問「中民華國chit-ê外來體制kám是正名tō khanchio--a?」
政客giâ「公投」ê旗á來動員群眾做 in搶權力kap資源ê bakuh, hó͘-lān講che tō是「直接民主」, ta̍k-ê tō緊tàu鬧熱, tī政客kho͘--出-來ê牆圍á內, thiòng kah kioh是che是「統獨ê決戰」, m̄願thuh破: 公投主題nah m̄是「tī對等ê前提下, chiah beh hām中國協商」!
Lán lóng無beh kā目chiu thiⁿⁿ金, 無beh檢討kám是teh保惜既有ê運動成果, kám是tī反抗ê基礎ǹg前chhui-sak, lán mā m̄願檢討lán kám是teh反背信念, kám是teh偏離目標, lán甘願tòe tī政客kha-chhng後, 甘願替政客ê投機背書, m̄知iáⁿ thīn政客學客「正名」「公投」「催生新憲」ê政治àu步, tō是teh鞏固舊體制, tö是teh合理化不義ê體制, tō是teh替統治ê文化霸權chhōe生存ê出路!
Lán已經kā反抗ê信念放棄--a, lán已經kā反抗ê前提tàn-hìⁿ-sak--a! Lán m̄是teh堅持價值認知ê重建, m̄是teh追討歷史kap社會ê正義, mā m̄是teh追求自由尊嚴ê新社會新體制!
Tī歷史kap公義ê鬥爭--nih, lán sió-khóa讓1步, tō是teh放棄ka-tī ê信念kap武器! Lán sió-khóa容允頭人政客sńg-tn̄g ê手路, lán tō隨chhun被動員ê「義務」; lán bòai批判民族壓迫ê語言文化滅族政策, 台派頭人政客隨tō繼續執行外來體制幾百冬「以台制台」ê分化步數; lán無beh破明反抗ê意義, 228 ê「民族壓迫」tō隨hō͘統治霸權áu做是「文化差異」kap「族群情結」; lán接收「大和解」, áu蠻ê壓迫集團隨sa「族群仇恨」ê罪名來kā lán侮辱; lán無beh堅持「復仇ê正義」, óa附外來體制ê投機者kap特權者, tō隨kā lán ê思想武器沒收, 隨peh起lih lán頭殼頂, kā lán ê人頭kōaⁿ去換利益kap權位, koh ē-tàng變做人民ê「救世主」!
妥協tō是準備投降, 妥協tō是鼓勵投機反背, 妥協tō是放棄思想武裝, 妥協tō是teh扭曲公義kap尊嚴ê信念!
壓迫者iáu-bōe向台灣人懺悔, 外來體制侵占ê資產iáu-bōe沒收, 外來壓迫ê歷史iáu-bōe清算, 歷史ê是非kap公義mā lóng iáu-bōe實現, m̄-koh台灣人「無魚蝦mā好」ê心態, 已經hō͘ lán tī歷史ê潮流--nih承認既有ê現實, kā追求公義kap尊嚴ê反抗意志tàn入去歷史ê pùn-sò場--nih, mā ta̍uh-ta̍uh-á kā集體ê出路挖掉!
無beh放棄追求公義ê信念, tō bē-tàng向外來體制妥協, ài繼續消滅中華民國; beh消滅中華民國, tio̍h-ài先kap chiah-ê投機政客學客畫清界線; beh kap投機妥協切--開, lán tio̍h-ài先問ka-tī, kā前提hut hō͘明: 到底lán是teh瓦解中華民國, iah是teh鞏固壓迫ê統治霸權?
留言列表
