1995年底tòe kúi-ê運動sianpai創辦電台, tiāⁿ-tiāⁿ落線了後, ta̍k-ê坐tiàm電台廳--nih圓桌頂á邊, ùi半暝káng到天beh光, 聽sianpai談運動, 評論局勢iah是刻畫理想, ka-tī ê思考kap心境mā一直得tio̍h刺刻hām成長.
Chit-chūn想--來, 印象siōng深--ê是日本Ako (赤穗) 47武士hām明治維新ê時代精神, 聽sianpai講Tenchu Gumi (天誅組), Saigo Takamori (西鄉隆盛) Sakamoto Ryoma (坂本龍馬), Yoshida Shoin (吉田松陰)......chiah-ê日本武士「草莽崛起」, 走chhōe民族活路ê志氣.
11月初去1 chōa日本, 事先chhôan真chē資料, tī日本14工, JR ê「PASS」the̍h--leh, ùi Hokkaito (北海道) ê Hakodate (函館)到Kyushu (九州) ê Kumamoto (熊本), ùi Honshu (本州) ê Kyoto (京都)到Shikoku (四國) ê Kochi (高知), sì-kè走chhōe維新志士ê kha-jiah, 想beh體會in開國ê氣魄.
14工, 當然無夠thang了解日本, 極加是感受tio̍h外在sù-sī ê公共空間kap做人ê尊嚴. M̄-koh soah kap éng-chūn tī電台熟sāi ê Siông--哥hām良榮兄, tī千百里外ê日本, 談tio̍h台灣社會ê困境.
到日本ê頭1暗, 半暝chiah到Okayama Siông--哥in厝. Hit暝, i ná問台灣chit-má ê勢面變化, ná分享 i tī日本吸收--tio̍h ê經驗.
Siông--哥心內真giâu疑: 台灣有hiah chē人出去留學, 感受ē tio̍h進步國家現代化ê精神kap做人ê尊嚴, 是án-chóaⁿ無kā chiah--ê chah tńg台灣? 是án-chóaⁿ in m̄-tāⁿ ē-tàng忍受台灣hiah àu ê體制, 有--ê koh變做áu蠻體制ê 1部份?
Siông--哥講, 台灣人ká-ná看ē tio̍h目chiu前3尺niâ, 過去kui粒島kan-taⁿ 1種聲, chit-má講民主--a, soah變做另外1 ê極端, 為tio̍h選票kap利益, siáⁿ-mih lóng用hoe--ê, 愈gâu hoe--ê愈大尾; chit-má到底有國--無to hoe bē清--a, soah liam-mi「政黨輪替」, liam-mi koh「bē-tàng hō͘外來政權當選」; 日本人mā ē hoe, m̄-koh總--是ē用道理kap Logic來chhōe解決問題ê共識, mā有尊重kap容允無kāng意見對話ê空間; tī台灣, beh kā道理thoah hō͘明soah比「濁水tńg清」koh khah oh......
Bí-hông姊tī邊--á soah thuh講, 知iáⁿ是鐵枋koh ngē beh chàm? Kap台灣人講道理本底tō是無chhái力--ê, 台灣人kan-taⁿ信拳頭母kap權威niâ, 講kui-po͘久, lí講--ê i lóng同意, lō͘尾iáu是有講ná無講--leh; kā ka-tī beh做--ê緊做hō͘起--來khah實在.
Tī Sapporo (札幌)街á, kap良榮兄ná行ná káng. 問 i日本kap台灣差tī toh, i講日本社會封建ê階級性iáu tiâu真深, 社會khah有紀律, m̄-koh mā khah無活力; 台灣社會tò-péng, chiâⁿ有活力kap創造性, m̄-koh siáng to無teh信táu siáng.
去日本讀勞動法了後, 良榮兄愈比較chiah對ka-tī tī台灣工運kho͘-á ê經驗愈理解: 大部份人無vision無腹腸koh khah無手路, kan-taⁿ用嘴teh拚目chiu前ê輸贏niâ, nah有siáⁿ-mih目標iah是路線ê對話? 加計較加khi-mō͘-bái--ê, hō͘ ka-tī vision koh khah闊, 實力koh khah chāi khah要緊, lán ài準備--ê是未來ê戰場.
Tī日本kap in ê對話, hō͘ góa感觸真深. 台灣人無歷史感mā無世界觀, mā m̄-bat beh肯定反抗ê價值, 面對不義ê體制, 台灣人kan-taⁿ ē-hiáu kā Gandhi (甘地)「愛kap非暴力」ê口號hoah kah tàu大聲, 根本m̄知印度「不合作運動」徹底反體制ê精神: bòai承認英國殖民體制, bòai接受英國殖民教育, bòai參加英國殖民議會. Lán厝邊tau, 日本維新武士ê氣魄, 韓國獨立運動ê志氣, iah是越南民族解放者ê意志, lán lóng無chùn-būn--tio̍h, 歷史ê經驗對lán mā 1-sut-á to無價值, 台灣人kan-taⁿ認定贏--ê chiah是gâu人.
日本明治維新ê志士戰死了了, in kā千百冬ê封建體制phah破, 開創日本現代化ê基礎, 尾--á官僚kap政客奪取成果, mā阻擋日本「革命」ê kha步. Tī台灣, 中國體制iáu-bōe hō͘台灣人消滅, 舊體制ê霸權iáu teh控制lán ê思想, 反體制ê運動者開創ê戰場to iáu-bōe戰soah--leh, 政客官僚已經急teh搶位搶成果--a, 急beh用外來體制ê權威, 來鞏固in ê權位kap利益, lán mā sio-cheⁿ tòe tī chiah-ê政客官僚後piah, 緊beh替不義ê體制「正名」, 緊beh kā反抗不義ê kha-jiah消除了了, thang好chhōe-tio̍h投降ê理由.
離開日本chìn前, Siông--哥放1 tè Okinawa (琉球) ê歌hō͘ góan聽, chit條歌hō͘ góa ê感動到taⁿ iáu tiâu tī頭殼內: góan故鄉ê話語góa已經bē記了了--a, 故鄉ê歌詩góa已經bē-hiáu唱--a, m̄-koh chia tō是góa出世ê所在, góa看tio̍h chia ê雲chia ê海, góa心內tō是ē感動, che tō是góan Shimanchu ê寶, góa聽tio̍h chia ê話chia ê歌, tō是ē感動, 因為che是祖先ê話語, che是góan Shimanchu ê寶......
Okinawa離台灣無jōa hn̄g, 二次大戰美軍ê登陸戰, in為日本戰死, 戰後koh hō͘美軍基地tī hia thún, 日本koh kā in當做二等國民, in講ka-tī是Shimanchu (島人), 文化上無認同日本. 日本有1 ê歌手tī Okinawa受tio̍h感動, kā內心ê感受寫做chit條歌, 出名了後, 為beh追求koh khah大ê成就soah失敗落魄, lō͘尾看tio̍h南美洲ê人雖bóng聽無Okinawa ê話, soah為chit條歌teh siáu, Argentina (阿根廷)國家kha球隊koh用chit條歌做隊歌, i chiah hiông-hiông tì覺, ē-tàng hông感動--ê是siōng原初ê心念.
台灣--leh? Lán beh kā堅持ê信念tâi tiàm記tì ê深坎底, 接受體制霸權ê價值標準, 承認體制統治ê既定事實? Iah是猶原無beh向扭曲ê價值kap不義ê體制投降, 甘願tiām-tiām ku落來繼續tiām籽ku̍t塗, 繼續累積反抗ê khùi力kap志氣, 準備koh khah全面ê鬥爭?