Iáu teh讀冊ê時, 對日本ê印象tō是學校教--ê, 是『死日本鬼子』, 是侵門踏戶欺負中國人, 造chiâⁿ南京大屠殺ê軍事帝國, hit-chūn góa真認同課本內底講--ê:『愛用國貨, 拒用日貨』. M̄-koh piān若Lán-lâng過年前, 厝內teh大拚掃e時, a-má tō hiau i做gín-á時, 讀公學校ê相片出--來, kā góan講教--in ê先生雖bóng chiok嚴格, m̄-koh對in jōa好tú jōa好, kúi 10冬前in kāng班--ê koh bat招日本先生辦同窗會; koh有, éng過暗時tn̄g-tio̍h失電, góan ta̍k-ê圍tī a-má邊--á聽 i講故事, i若心花開, koh ē唱 i細hàn學ê日本歌hō͘ góan聽. Góa chhiâng-chāi teh想, 是án-chóaⁿ hiah-nī惡質ê日本, hō͘ góan a-má hiah-nī súi ê記tì?
大學時代讀台灣史了後, chiah了解日本kap台灣ê關係. 台灣hō͘日本統治50冬, 留--落-來-ê是完整ê硬體設備kap現代化ê思想; 國民黨làu-phâu來台灣, siáⁿ-mih to無chah, kan-taⁿ靠hit套大China思想tō食台灣人夠夠, 50冬, 台灣隨koh退tńg去人食人ê原始狀態. 2 ê統治頭家lóng有tn̄g--tio̍h ê a-má, sio比phēng, 感觸免講mā不止á深.
雖bóng了解chit-ê事實, 是講女權意識對góa ê影響, góa iáu是chiâⁿ鐵齒認定日本是大男性沙文國家, 無半tè-á ē hông o-ló--chit, góa對日本ê印象猶原無好到toeh去. 一直到kah Ui-chì去日本chōe Siông--哥, tńg來講kah嘴角全波, góa kap Tek-hôa chiah開始計劃去日本1 chōa, koh來sianpai Ûi--á mā走--去, hō͘ góan有koh khah大ê動力去執行chit-ê計劃.
無踏--出-去, m̄知iáⁿ世界有jōa大. 去到50冬前ê殖民母國, 感受--tio̍h-ê是tī台灣m̄-bat有ê經驗.
Chhím到日本Okayama (岡山)車頭, góan tō kā Siông--哥ê電話番pháng無--去, tī hia地頭生疏, 話語koh bē通, 正經是「beh哭無目屎」, 唯一解救ê方法tō是khà電話tńg去台灣厝--nih問, m̄-koh góan koh m̄知iáⁿ台灣ê國際番號, tī車頭問--人問無, 尾--á走去車頭對面ê Lawson kám-á店問頭家, i soah急kah bē-su是 i ka-tī ê tāi-chì, 替góan khà電話問朋友, koh替góan khà tńg台灣, tī hia bú點外鐘久chiah聯絡tio̍h Siông--哥. Che是góan頭1 ê經驗.
Beh去日本chìn前, góan先tī台灣買2禮拜ê Japan Rail Pass, 去到日本tō ē-sái坐免驚--ê, góan靠勢有chit張Pass, tō lòng到Hokkaido (北海道)去. Lán lóng知iáⁿ日本生kah長lò-lò, ùi Okayama坐到Hokkaido ài 1工tah-tah, góan上車tō khùn, 若tī台灣, chiâⁿ chē人lóng驚ê khùn過頭, m̄-koh tī日本, 無論是火車iah是公車, 長途iah好, 短途iah好, 時間lóng lia̍h kah準準準, tang時出發, kúi點到位lóng bē增差--tio̍h. In ê公車頂kôan koh ē-sái hō͘人換銀角á, lóng免煩惱出門無chah lân-san-á, chhím頭á góan iáu無慣勢用日本chîⁿ, kiàn-pái落車beh lok-chîⁿ lóng kha手慢鈍, mā bē hō͘運匠chhiⁿ. Tī台灣坐車是折磨, tī日本顛倒是1種享受, che是góan第2 ê經驗.
日本錢khah細koh物質比台灣kôan ê關係, ē-tàng免khai--ê góan lóng省--落-來, 用行--ê ē到--ê góan tō用步lián--ê, tī hia 2禮拜久, kan-taⁿ行路tō超過tī台灣kui月日ê運動量. 14工行--落-來, 雖bóng chiâⁿ thiám頭, m̄-koh góan soah顛倒有時間ta̍uh-ta̍uh-á享受日本四季變化明顯ê光景, 消化sio連續ê Surprise.
In ê路邊看無人chhah車, 聽Siông--哥講chiah知iáⁿ tī日本若beh買車, tio̍h-ài先有車位chiah ē得thang買, 大部份ê店面mā lóng有設車位hō͘人客chhah車, chit點台灣tō輸人thiám-thiám. In ê公園mā無像台灣tio̍h-ài tī kui-phiàn大樓--nih ngē chiⁿ出1-sut-á空間, koh tio̍h ùi別jiah買樹á來栽, tī日本góan看--tio̍h ê公園是hiah-nī-á大koh自然, 像Nara (奈良)公園góan tō se̍h kui工去--a, koh有góan坐車經過ê Onuma (大沼)公園, 光景bē-su是原始林--ê; ta̍k條溪á mā lóng清khì kah,「親水公園」tio̍h-ài像日本án-ne m̄-chiah有iáⁿ, 自然koh無kē-lō͘ ê人工味. Siông--哥kā góan講其實20冬前ê日本, 比現此時ê台灣koh khah lah-sap, 排去塗kha ê屎尿koh ē sìm出來tī路--nih, 到kah 20冬前國會通過kui-kōaⁿ ê公害法條了, kui-ê下水道系統(生lim--ê kap一般用水) chiah完成, chiah有góan chit-chōa看--tio̍h ê日本, 20冬ê時間tō ē-sái做kah án-ne, mā是chiok驚--人. Chiah-ê是tī台灣無tè chhōe ê經驗.
聽Siông--哥講日本ê地方主義不止á強, 斟酌去看, 有iáⁿ是án-ne. Tī日本, 在地siōng出名ê土產tō kan-taⁿ hit所在chiah買有, 無像台灣, 淡水ê魚酥去到屏東mā有. 2禮拜ê時間, 無論去到toh位, ta̍k-jiah lóng有chhāi碑siàu念in hit庄頭某mih人出世, 結婚, 死--去ê所在, 對日本人來講, 無論別ê所在出siáⁿ-mih gâu人, tō算世界出名--ê mā kāng款, ka-tī庄頭ê gâu人chiah是寶, 是in榮光ham自信ê源頭. 像Morioka (盛岡) ê 作家Isikawa Takuboku (石川啄木), tī toh 1欉樹kha讀冊寫詩, tī toh 1條路散步, ta̍k位lóng有i行踏--過ê記念; 明治維新ê武士Sakamoto Ryoma (坂本龍馬)出世ê所在Katsurahama (桂浜), 滿sì-kè to是Ryoma ê銅像kap記念品.
翻頭看台灣, 歷史bat出現siáⁿ-mih人物to無人知--a, koh khah免講地方有siáⁿ-mih gâu人, 歷史建築物ē-tàng消滅--ê tō消滅, 台灣人根本tō無歷史感, 莫怪有1 ê朋友teh講, lán應該ài kā éng過ê教科書留--落-來, 無, 後pái台灣人hōan-sè bē記得國民黨ê教育是án-chóaⁿ teh kā lán洗腦; 免講後日á ē án-chóaⁿ, chit-má hōan-sè tō有人m̄知iáⁿ台灣一直到kah 1978年koh bē-sái出國觀光, 公務人員考試mā有省籍配額; 民進黨chit-má hoah『捍衛中華民國』hoah kah大細聲, lán soah bē記得過去thīn民進黨是beh消滅中華民國--ê.
Tī日本2禮拜, 正港hông當做是「人」teh尊重, 頭1 pái知iáⁿ做「人」是siáⁿ-mih款滋味.
1917年越南ê Ho Chi Minh (胡志明)第1 pái踏入去殖民母國----法國ê土地, i tī hia走chhōe結合越南被壓迫ê農民kap工人chò-hóe對抗法國ê方法; 台灣tī日本時代, chē-chē留學生走去日本, 吸收日本現代化精神, kä革命思想chah tńg來台灣, 了後有台灣共產黨領導運動. Taⁿ已經21世紀--a, 台灣猶原iáu-bōe脫離外來體制ê統治,「進入體制反體制」kāng款是社會主流價值, 出去世界各國留學--ê mā chē kah ná貓毛, 台灣kap中華民國soah愈來愈bā, beh kā chit-ê外來頭家改名做ka-tī ê國家?
Ho Chi Minh講:「越南人若beh 1世人食中國人ê屎, 不如暫時phīⁿ法國人ê屁.」Siông--哥in老母bat聽in sī大人hit輩án-ne講:「甘願做日本ê二等國民, mā無愛做國民黨ê一等國民.」Chit-má換所謂台灣人政府民進黨執政, 實際上是民進黨kap國民黨teh分「中華民國」chit-tè大餅, lán台灣人kám有骨氣講:「台灣人bē-giàn koh做中華民國ê被殖民者!」
留言列表
