「Lí tńg--來-a? Î......今á日學校chiah早放學--o͘h?」媽媽tng tī灶腳煮菜, 看tio̍h正旗tńg--來, 真親切teh kā問.
「Hmh!」正旗chhìn-chhái編1 ê理由:「今á日無上輔導課, 所以khah早tńg--來.」講soah, 隨走入去房間, kā門關--leh.
「O͘h! Lín 爸爸今á日暗時beh tńg--來, lí ē-sái kā頂pái學校畫圖得獎ê作品the̍h hō͘ i看, i一定ē真歡喜.」
正旗心內驚1 tiô. 爸爸ùi i國校á 4年開始, tō因為khang-khòe ê關係, tiāⁿ tī花蓮做海岸ê工程, 隔1月日chiah tńg來3~4工á, 以早i若tńg--來, 父á-kiáⁿ lóng有講有笑, 自從去讀國中了後, 開始kap王奇hit-kóa朋友tàu-tīn, 成績mā ná來ná bái, tiāⁿ-tiāⁿ koh ē出狀況, 平常時á媽媽koh管i be-tiâu, 所以ta̍k-pái爸爸tńg來lóng ē chhōe i算siàu, m̄-chiah父á-kiáⁿ ê關係變kah真無好, 見面m̄是hông罵tō是hông phah.
正旗感覺爸爸無愛--i.
因為ē驚, 正旗一直tiàm tī房間內底無出--來. 暗頓食飽, 留tī學校『晚自習』ê姊姊mā tńg--來-a. 正旗發現姊姊面色真奇怪, koh ē kā媽媽khiú去邊á講細聲話, i心內想講「慘--a」, beh piak-khang--a, chit-pái穩死--ê, choaⁿ-á koh走入去房間bih.
10點左右, 爸爸tńg--來-a, kā媽媽 thn̄g--過ê菜食食--leh, 了後, kā正旗叫來廳--nih.
正旗in厝是3樓ê公寓, 厝內傢俱真簡單, 客廳中央khǹg神明kap祖先牌位, koh有1台tú買無jōa久ê電視, 粉白ê壁頂, 姊姊kap ka-tī國校á hām國中ê獎狀貼kah kui-phiàn, iáu-bōe kap王奇in tàu-tīn chhit-thô進前, 正旗ê成績一直bē-bái.
烏kah ē發光ê皮膚, 愈hông感受tio̍h爸爸嚴肅ê眼神, 長期tī日頭ē-kha做khang-khòe, 爸爸ê皮膚曝kah koh烏koh金.
「Lí講, e-po͘ lí走去toh?」
正旗頭àⁿ-àⁿ:「無.」I偷看邊á ê姊姊, 姊姊ná無tāi-chì--leh, tī另外1間房間內底teh看冊, 準備高中聯考.
「Siáⁿ-mih無? Lí e-po͘ kám有tī學校?」媽媽ê聲lio̍h-á chhoah-chhoah.
「Lí是án-chóaⁿ beh偷走學? Lí講, lí kám有kap人冤家sio-phah?」爸爸嚴厲ê聲, hō͘正旗驚kah m̄敢應.
「來! 衫褪落來hō͘媽媽看.」媽媽伸手beh kā正旗ê liú-á tháu--開, 正旗liòng--1-ē, iáu是hông看tio̍h胸坎ê凝血.
「Ah! Nah ē án-ne? 到底發生siáⁿ-mih tāi-chì?」媽媽真m̄甘teh相正旗ê傷, 目kho͘ ta̍uh-ta̍uh-á tâm--起-來.
「Lí到底是án-chóaⁿ beh kap人sio-phah? 死gín-á, lí kioh是m̄講話tō ē-sái準soah是--無?」爸爸koh 1 pái真受氣kā逼問.
「一定是kap王奇學做歹, chit ê gín-á以早to bē án-ne--leh......」媽媽一直認為正旗是乖gín-á.
「Oeh! Lí nah lóng m̄講話?」爸爸愈受氣--a, 正旗知影爸爸血壓kôan, mā m̄敢惹i受氣, m̄-koh爸爸án-ne kā逼, soah hō͘ i愈緊張.
「是m̄是hit ê王奇?」爸爸面se̍h向媽媽:「In tau電話幾番? Góa khà電話kā in父母講.」
正旗chi̍t聽tio̍h爸爸beh khà電話去王奇in tau, kui-ê人跳--起-來, hoah講:「Lí想beh chhòng siáⁿ? Lí mài ta̍k-pái tńg--來to想beh kā góa罵!」I想beh用chit步來轉移爸爸ê注意.
「Lí講siáⁿ-mih? 做m̄-tio̍h tāi-chì koh講chit種話!」爸爸kui-ê面脹紅--起-來, 雙手拳頭母tēⁿ kah ân-ân-ân.
「Tō是án-ne, ta̍k-pái tńg來to beh kā góa罵, 平常時á koh無teh kā góa關心.」正旗感覺真委屈, 別人ê 爸爸ta̍k工lóng ē tńg厝, ka-tī ê 爸爸soah 1月日chiah tńg來2~3工, 厝--nih kan-taⁿ有媽媽 kap姊姊2 ê cha-bó͘, 真chē i有趣味--ê, 媽媽kap姊姊lóng無siáⁿ趣味. I tiāⁿ-tiāⁿ感覺kap王奇in講黃色笑話, 看A片加khah有意思, m̄-koh父母soah認為王奇是不tat不chhit ê chhit-thô gín-á.
「Lí講siáⁿ-mih? Góa無法度tńg--來, mā是為tio̍h食頭路飼lín, 若無, lín beh án-chóaⁿ有飯thang食?」爸爸正經受氣--a, i想講, ta̍k工tī花蓮siàn海風, 曝日頭, 做粗重ê khang-khòe, lóng是為tio̍h chit ê家, ta̍k-pái koh tio̍h hō͘ hiah-ê外省腔ê主管刁, i lóng忍--落-來無愛計較, tō是為tio̍h beh thàn he tām-po̍h-á薪水來維持in chit ê家庭, chit-má in kiáⁿ竟然tng i ê面講chit種話.
「Thàn siáⁿ-mih錢? Góa連零用錢to無, 人......」正旗感覺ka-tī講kah有kóa超過, m̄-koh話to已經講出嘴--a.
爸爸心內1 chūn絞疼, 是ah, tī chit ê時代, 做工á 1月日thàn--tio̍h ê錢極加thang維持厝--nih ê開銷niâ, 厝--nih hit台彩色電視, koh是gín-á看tio̍h別人tau有, 一再kā哀求, i chiah kā烏白電視換掉, 為tio̍h買chit台彩色電視, i嘴齒根咬--leh, 加加班kúi-nā禮拜, chiah有thang買--ê, nah koh有siáⁿ-mih錢thang hō͘ gín-á做零用錢?
「Lí chit ê gín-á, góa看, 無hō͘ lí chi̍t-kóa教示bē-sái--得!」爸爸續手sa 1枝衫keng-á tō tùi正旗身軀sut--落-去, 正旗感覺皮膚疼kah beh li̍h--開-a, 目屎隨liàn--出-來, koh ná sì-kè閃爸爸手--nih ê衫keng-á.
「Ah, mài án-ne--lah! 正旗, 緊kā爸爸會失禮!」媽媽目屎ná滴ná beh阻擋lia̍h狂ê爸爸, 姊姊mā走出來苦勸:「爸, mài án-ne--lah! 爸!」M̄-koh爸爸手--nih ê衫keng-á iáu是一直tùi正旗身軀sut--落-去.
正旗擋bē-tiâu--a, 走入去房間內, kā門鎖--起-來, 爸爸出力lòng kúi-ē-á門, lòng bē開, 攻擊chiah停--落-來.
Chit暝, 正旗聽tio̍h父母tī in房間--nih講真久ê話, ka-tī目屎流--leh流--leh chiah睏--去.
留言列表
