Tek-hôa~2004.2.28
Góa ê朋友, 同學, góa ê sianpai koh有厝--nih ê人, ta̍k-ê to熱情走去參加228手牽手ê活動, 今á日ná像所有「愛台灣」--ê lóng出門--a.
Tī電視ê畫面--nih, tī群眾tâng齊hoah口號ê時, góa目屎kiōng beh liàn--落-來, chiok想beh kap éng過kāng款, hām群眾khiā tàu-tīn, chò-hóe呼hoah, chò-hóe怨嘆, chò-hóe激動, mā chò-hóe消tháu心內ê怨khùi.
M̄-koh góa選擇坐tī電視頭前, 心肝底真矛盾, mā lio̍h-á有孤單ê感覺, góa無選擇kap熱情ê台灣人khiā tàu-tīn!
Kāng 1 kang, góa mā tī電視看--tio̍h: tī台北市228公園, 馬英九用ROC台北市長ê身份kā受難者家屬道歉, 講hit-chūn政府確實『處理不當』; kāng 1 kang, tī臭頭á埔, 宋楚瑜目kîⁿ kâm目屎, 講228是歷史ê不幸, tī hit個『兵荒馬亂』ê時代, 為tio̍h台灣ê安全, che是無法tō͘避免ê悲劇.....
Góa kám有聽m̄-tio̍h? Góa kám是神經錯亂--a?
Lán tiām-tiām放棄歷史公道ê訴求, 歷史ê解說soah hō͘ China權力集團偷the̍h去合理化in ê壓迫, 歧視kap剝削--a! 統派the̍h「族群仇恨」ê罪名kā lán侮辱, 藍--ê the̍h歷史ê悲情kā lán洗腦, lán soah乖乖á接受頭人ê「苦勸」, kā「武器」tàn掉! Góa看tio̍h 228失敗ê經驗teh重演! Góa看tio̍h lán hām反擊ê立場to放棄--a!
政客學客頭人嘴角全波ê口號hoah煞了後, 320 ê選票統計煞了後, 群眾ê熱情chhun siáⁿ? 群眾ê期待koh ē變做siáⁿ? 繼續替3黨政客ê政治分贓背書niâ!
Lán接受無公義ê體制kap歷史是「合理--ê」(若是ē-tàng改名做台灣); lán接受投機nǹg-chhǹg ê價值是正常--ê (若是lán pun ē tio̍h肉iù-á); lán接受hông蹧躂是應該--ê (若是lán ê頭人ē-tàng繼續當選)......
Che tō是「台灣人出頭天」teh ǹg望--ê?
Taco~2004.2.29
本來góa mā有報名「228手牽手」ê活動, m̄-koh góa無法tō͘ koh說服ka-tī去為hit-kóa bē kiàn-siàu ê政客ê利益輸贏來出力!
Khah早, góa siōng愛tàu鬧熱, siōng愛行tī人群內底, m̄-koh cha-hng góa「背叛」身軀邊死忠, 愛台灣ê親chiâⁿ朋友, góa無kap in tàu-tīn去牽手, góa làu-phâu--a, 真無hông諒解.
Góa選擇ka-tī 1 ê人tī厝--nih siūⁿ-khì, 看電視, 雖bóng看tio̍h 1堆人kā in ê手牽--起-來, 有老歲á, 有gín-á-phí, chiok chē chiok chē人--ê, 真正chiok團結--ê, tī電視頭前góa soah為台灣人ê kó͘-chui kap可憐teh流目屎, 想bē到 lí mā kap góa kāng款!
Aih! 實在ē氣--死, góa iáu無法tō͘講出1-kóa道理, kan-taⁿ ē-tàng tī電視頭前流目屎, kek-khùi, koh hō͘厝--nih ê人kap朋友誤會, kháu! 比 lín koh khah慘!
Tōa-thâu-liân~2004.3.1
228 hit-kang góa tī電視看tio̍h民進黨ê手牽手活動kap連宋ê心連心活動, góa正港錯亂--去-a, 民進黨chit-pêng完全無beh講228, kan-taⁿ ē-hiáu hoah hit-kóa空虛ê口號, soah顛倒換國民黨teh講228, 換『宋楚瑜』teh講 in mā是228受難者, 換『馬英九』替政府kā台灣人會失禮......
Kám是hông thâi--ê teh慶祝 lán tau有死人? Iah是kâng thâi--ê teh哀悼thâi無夠chē人?
2月29 góa kāng款tī電視頭前看謝長廷kap『李敖』ê公投辨論, 結果『李敖』tú開始tō teh教示chiah-ê台派政客, i強調 i chit-ê外省人為台獨案hông關--過, 民進黨檯面上chiah-ê政客顛倒無人為台獨hông lia̍h--過 (美麗島事件m̄是台獨案).
I講:「Hoah beh台獨ê政黨chit-má執政--a, soah顛倒無beh台獨, 根本tō是sńg假--ê; beh kap中國談判, 無對等beh án-chóaⁿ談判?」I koh講:「公投題目內底無"對等" chit 2字, 若用中華民國ê身份去談, án-ne lán是in其中1省niâ, beh談siáⁿ? 若用台灣共和國ê身份去談, 根本to iáu-bōe有台灣共和國, beh有台灣共和國siōng好ê時機tō是chit-má辦公投, 陳水扁koh m̄敢!」「民進黨éng過teh批判李登輝, 講 i是出賣者, chit-má beh nah ē teh肯定李登輝?」「公投題目是beh kap "中共"談判, "中共"是黨m̄是中國政府neh....」
『李敖』出手tō kā台派政客ê死角講破--a, 1 ê外省á teh替lán教示民進黨, 台灣人soah teh肯定陳水扁kap李登輝, 正港是是非不分, kui-ê lóng錯亂--去-a, 台灣人ê目chiu m̄知tang時chiah看ē清楚? Ta̍k-ê kan-taⁿ ē-hiáu chhoh『李敖』chit-ê外省á講he a-sá-put-luh--ê, soah無人beh去想i講ê話ta̍k句to tu̍h kah民進黨應bē出--來, i講--ê kám m̄是事實? I講--ê kám m̄是lán m̄願去面對--ê? Ta̍k-ê kan-taⁿ teh爽手牽手活動替陳水扁ke giú jōa chē票.
228是台灣人ka-tī beh放hō͘去--ê, 無beh清算, 無beh追究, chit-má換China人teh解說228, 講in mā有死人, 講是台灣人先thâi外省á, 軍隊chiah ē開--入-來, 結果, 228變做是China人ê 228! 台灣人ka-tī放棄228 ê歷史解說權! Koh來少年人對228 ê認知tō是China支那人in chit套講法, in變做是受害者, hit-chūn ê屠殺者變做是維持正義kap和平, 台灣人soah變做是228 ê兇手...... che tō是陳水扁kap李登輝叫lán『擺脫悲情, 向前看, 不要向後看』, chiah ē kā歷史讓hō͘ China人teh解說!
N.C.U.~2004.3.4
228手牽手ê活動, góan tau kan-taⁿ góa無去, góan pa-pa到hit-kang iáu一直叫góa tàu-tīn去, m̄-koh góa tō是m̄去, góan pa-pa真無歡喜. Hit-kang e-po͘ góa kap Kek-iûⁿ走去228爆發ê所在──延平北路kap南京西路口，算是用ka-tī ê方式來追念228.
國民黨chit-pái講--ê無m̄-tioh, 民進黨是利用228 teh bú選舉造勢, 若無, 應當ài tī台北市ê公賣局(228 hō͘台灣人放火燒), 行政院(228 tī hia用機關chhèng phah台灣人), 總統府, 基隆港, 埔里(二七部隊), 台南市圓環, 嘉義水上機場, 高雄要塞, 高雄中學....同時辦追思活動chiah tio̍h. 手牽手了後，ta̍k-ê到底知iáⁿ 228對台灣人ê意義是siáⁿ--無? Hit-chūn中國人是án-chóaⁿ beh thâi台灣人? 台灣人為chóaⁿ樣beh反抗? 若kan-taⁿ知iáⁿ 228 ê時真chē中國人thâi台灣人, 其他--ê lóng m̄知, bú kah hiah大場有siáⁿ-mih意義?
Góa認為檯面上ê政黨lóng是「執政黨」, 國親新iah是民進黨台聯, lóng khàng起lih台灣人頭殼頂, kám m̄是? Lí講ê hegemony (文化霸權), góa想in lóng是!
最近去se̍h台北冊展, hiah-ê出版社掌握lán看chit-ê世界ê方式, lán kan-taⁿ ë-tàng透過in出ê冊了解chit-ê世界, 想--tio̍h tō ē驚. Koh, che 1~2冬góa看ê電影siōng無有100齣, kan-taⁿ 2齣是「國片」, soah是唯二góa看了想beh退票--ê, 比第三世界ê電影khah àu, 根本m̄知是teh演toh 1國ê故事.
台灣人án-chóaⁿ teh反抗--ê? 手牽手了後, tńg去kāng款chūn開電視, kāng款看統派媒體ê nōa節目, kāng款訂統派報社ê報紙, 看統派出版社ê雜誌kap冊, tō算民進黨koh再連任kúi-nā pái, tō算隨宣布改名做「台灣共和國」, to bē改變siáⁿ-mih! Lán慣勢人chhī ê mi̍h-kiāⁿ--a, lán koh無ka-tī ê mi̍h-kiāⁿ來hàu-ko͘, 是beh án-chóaⁿ起造ka-tī ê文化kap國家?
若相信權力kap命運掌握tī ka-tī手頭, nah tio̍h煩惱siáng ē tiâu? 愈來愈chē人相信陳水扁若無贏, 台灣tō慘--a, ta̍k-ê煩惱『泛藍』親中國, ë三通......, m̄-koh陳水扁m̄是kāng款ē án-ne做? 制憲? Beh制toh 1國ê憲? 制siáⁿ-mih憲? 清國ê時ài林爽文朱一貴反清復明, 日本人來ài祖國救, 中國人來ài民進黨kap李登輝來救, 世界有toh 1國是án-ne獨立--ê? Chit-pái手牽手講是學Baltic (波羅的海) 3國, 拜託, mài kā人侮辱好--無?
另外, góa為beh寫勞工運動ê論文, 讀chiâⁿ chē工運ê文獻, ta̍k篇to講台灣ê工運bú bē起--來, 是因為hiah-ê勞工團體是國民黨飼來控制--lán-ê, m̄-chiah無法tō͘形成自主ê工運. 台灣ê工運已經ùi基層nōa到全國--a, 靠既有ê體系發展是死路, 無論siáⁿ-mih社會運動, 一定ài chhōe-tio̍h新ê戰場, 開新ê陣地.
Gî-chēng~2004.3.12
228 hit-kang, góa mā走去苗栗參加手牽手ê活動. Tī現場, 看tio̍h台灣人對未來iáu是充滿希望, 無受tio̍h hiah-ê媒體kap政客ta̍k-kang『唱衰』台灣ê影響, 無án-ne來對台灣ê未來失望. 2:28 ê時, ta̍k-ê tàu-tīn kā手牽--起-來, hit-chūn, góa真正chiok感動--ê!
M̄-koh góa mā teh想, chit場活動ná像是為tio̍h選舉造勢辦--ê, 媒體iáu是kā chit場活動報導kah像teh『嘉年華會』, tī藍綠選舉決戰愈來愈óa近ê chit-chūn, beh講che kap選舉造勢無關係, 實在是siuⁿ hau-siâu--a.
M̄-koh若ē-sái借chit-ê機會加強社會教育, hō͘無了解iah是無機會知iáⁿ 228 ê大眾, tī chit-ê活動--nih koh khah了解228 ê意義, góa想ē koh khah功德圓滿.
Î-kun~2004.3.22
228 chit-kang, góa是tī九如路kap延吉街路口ê服務台tàu-saⁿ-kāng. Góa ùi e-chái-á 10點tō到位--a. 一直到活動結束, e-po͘ beh 3點chiah離開.
Tú開始kan-taⁿ kúi-ê人tī hia顧tàⁿ, 來往ê人無論是騎車經過iah是行--過lóng一直kā góan金金看. 其中有1位a伯, i騎o͘-tó͘-bái經過ê時kā góan講:「少年--ê lín bē-bái--o͘. 加油. 加油.」Góa聽了真歡喜. Che是góa第1 pái參與chit種活動.
Iáu-bōe到12點, tō陸陸續續有經過ê人來問講kúi點開始牽手. Mā有真chē人ē kā góan討旗á, 布條iah是帽á. Chit時, góa感覺tio̍h台灣人ê熱情kap對chit-ê活動ê重視. 有chiah chē人支持chit-ê活動. Iáu-bōe到12點半tō有人來報到--a. 愈接近2:28, 人tō愈chē. 主辦單位準備ê帽á, 布條kap旗á iáu-bōe到2點tō lóng pun了--a. Ta̍k-ê熱情ê台灣人, 面容lóng是歡喜, 期待--ê, 無悲傷, 無艱苦.
高雄中tàu實在真熱, m̄-koh lóng無人想beh離開. 2:28到, ta̍k-ê to tòe連長大聲hoah出「台灣Yes」「China No」「支持公投」. 每1 ê人手牽手, 心連心, ta̍k-ê khiā chò-hóe, 無論是toh ê人, 是客人, Hō-ló人iah是原住民, 全部lóng手牽手, ta̍k-ê lóng是愛護台灣chit-te土地ê人. 因為lán ê目標lóng kāng款, 「反飛彈」「愛和平」.
Chit-kang góa看tio̍h chiah chē愛台灣ê人, ta̍k-ê lóng用行動來證明愛台灣ê心, góa感覺真感動. 2004年以後換lán台灣人做主--a. 台灣是lán ê寶貝.
Bō͘-chin~2004.3.28
台灣ê「228事件」是20世紀世界3大政治屠殺之1, tī台灣人心內, 是1 ê iáu-bōe kian-phí ê孔嘴, mā是1段永遠bē-tàng bē記--得ê歷史. M̄-koh對góan chit輩受國民黨教育洗腦e一般少年人來講,「228事件」猶原是『模糊』--ê. Góa自細hàn tō bat聽sī大人講過「228」, m̄-koh正經ka-tī思考, chhōe「228」ê資料來看已經是大學以後--a.
Tú入來成大ê時, góa tō tiāⁿ-tiāⁿ聽學姊學長講, 學校ê『榕園』tō是「228」hit-chūn chhèng殺真chē台南人ê所在, 所以「陰氣」chiâⁿ重. 為tio̍h chit-ê原因, cha-po͘宿舍tō用chiok chē「人」字型起--起-來, thang增加『陽氣』. 講chit段歷史ê人lóng親像teh講恐怖ê鬼á故事kāng款, 勸人暗時siōng好mài經過『榕園』, 若不得已ài經過, 一定ài走khah緊--ê, 聽ê人mā lóng驚kah. Góa tú聽tio̍h chit-ê tāi-chì ê時, 心內chiok「Shock」--ê, 第1 kái hiah具體感受tio̍h身軀邊有1 ê所在tō是「228」ê歷史現場. 後--來ta̍k-kang上課經過『榕園』, góa lóng ē騎khah慢--leh, 斟酌kā看, chia tō是57冬前chē-chē台灣人, góa ê祖先hông thâi--死ê所在. M̄-koh, chit-má人kā當做是講「校園鬼故事」ê 1 ê題材, iáu koh有jōa chē少年人知iáⁿ i ê歷史意義?
今年ê 2月27, góa有機會參與「228記念座談會」ê活動, 透過1-kóa成大退休ê教授, in本身mā是228受難家屬iah是親身經歷過228 ê前輩, 聽in講「228 tī台南, tī成大 (hit-chūn是「工學院」)」ê經過kap in ê經驗, 其中王克紹醫師 (i是228受難者王育霖ê後生) kap chē-chē前輩lóng講:「228事件m̄是族群ê問題, 是統治者kap被統治者ê問題.」Chit種講法確實已經phah破KMT教育體制kā「228」簡化做「族群衝突」ê講法. M̄-koh, 若ùi歷史事實來看, ē-tàng講是China人惡意, 有意識--ê teh殘殺, 侮辱台灣人ê經過, hit種殘忍ê手法已經m̄是kan-taⁿ單純對付「被統治者」niâ, koh khah是對被統治ê台灣人充滿「恨」(kā台灣人當做hō͘日本人「奴化」ê種族)來糟蹋, 發洩. 座談會尾--á, chiah-ê前輩呼籲ta̍k-ê參加過tńg kang「228手牽手保護台灣」ê活動, in內底有--ê已經teh beh 90歲--a, 有--ê行動chiâⁿ無方便, m̄-koh in lóng beh去參加, koh請góan chiah-ê少年人mā lóng ài去.
228 hit-kang, 因為台南市已經有夠額ê人報名「牽手」, góa kap老師koh有kúi ê同學phah算beh chò-hóe去人khah chió ê善化支援, 老師駛車, góan騎o͘-tó͘-bái, beh出發ê時, góan kā粉紅á色, 青色ê「手護台灣」布條á縛tī車koh有o͘-tó͘-bái頂kôan, koh chhah旗á, 帽á頂kap手mā縛2~3條布條, tō 1路ǹg善化騎--去. Tī路--nih, góa看tio̍h chē-chē kap góan kāng款縛布條á, chhah旗á ê車, 有送gah-suh ê o͘-tó͘-bái, 載菜蔬ê發財á, koh有kha踏車, 沿路mā已經有真chē人khiā出來teh排隊準備--a, koh有遊覽車ùi góa面頭前駛--過, 內底lóng是a公a-má年歲ê老大人, in mā是beh去「牽手」--ê, 看tio̍h góan, chiok熱情--ê kā手chhun--出-來, 對góan比「chán」(1號) ê手勢. Kui-chōa「台1線」lóng是人, 1 ê接1 ê, ùi基隆到屏東, tī chhia-iāⁿ ê日頭ē-kha, hiah-nī chē台灣人準備beh chò-hóe kā手牽--起-來, 準備beh大聲hoah--出-來. Góa 1面騎, 沿路ê影像, 1幕1幕親像電影刻tī góa ê腦海, hō͘ góa感覺心chiok sêng teh beh燒--起-來, 縛--leh ê布條á kap旗á tī 2--月ê風中飛kah愈來愈kôan......
台灣人ê台灣意識kap國家認同tī「手護台灣」ê活動確實已經提高, 凸顯出來--a, chit-ê活動形成ê氣氛kap意義góa相信ē一直tī台灣人心內生thòaⁿ. M̄-koh mā因為án-ne, tī台灣人hoah「族群大團結」,「和諧」,「和平」ê口號ē-kha,「228」ê歷史真相 kap記tì choaⁿ-á失去ka-tī ê主體性, 造chiâⁿ「228」ê兇手政黨並無消失--去, in改名做「泛藍」, 本質猶原無變, 57冬後iáu koh tī lán ê社會繼續chhàng-chhiu, iáu koh想孔想phāng teh蹧躂lán台灣人, 若m̄是用歷史ê真相kap社會ê公理正義做肥底, lán tō無可能發展出真正--ê, 長遠ê「族群大團結」,「和諧」kap「和平」.
留言列表
