A瑤是góa小學時ê班長, mā是hit-chūn偷偷á欣賞ê對象, i生做真kó͘-chui mā真古意, i bē chhòng-tī cha-bó͘ mā bē欺負同學, 真乖mā真gâu讀冊, 老師lóng真惜--i, 有kúi-ê cha-po͘同學ē食醋, 有時á ē kā欺負, m̄-koh, A瑤班長lóng ē忍--落-來, 無kap in計較.
Góa讀ê小學, ta̍k年lóng kan-taⁿ「忠、孝」2班niâ, 6 ê年級lóng總chiah 12班. Góan有1 ê傳統, tō是kāng姓讀kāng班, 親chiâⁿ ê gín-á lóng ē讀kāng班, góan chit班有kúi-ê大姓──蔡, 游, 吳, 鄭, 林, ta̍k-ê是親chiâⁿ, 對同學ê家庭背景lóng真了解.
Góan班ê麗琴是A瑤班長ê親chiâⁿ, koh tòa tī kāng 1 ê竹圍á內底, 3年á ê時, 有1 pái聽tio̍h麗琴講, A瑤班長無ma-ma, in a母tī i細hàn ê時tō死--去-a. Hit-chūn, góa tō開始同情班長ê遭遇, ta̍k年母親節做『康乃馨』ê時, góa tō感覺A瑤班長真可憐.
麗琴講, A瑤班長放學了後ài煮飯, hiâⁿ水, 洗衫, in a-pa teh飼豬, 無時間煮飯hō͘ i食, A瑤班長m̄-bat chah便當來學校, 中tàu hioh-khùn時間, i lóng行路tńg去食飯, 食飽chiah koh行路來上e-po͘ ê課. Góan chiah-ê同學無人去過班長in tau, 班長mā m̄-bat去其他同學厝--nih chhit-thô.
A瑤班長真tiām, 無愛講話, ta̍k-ê m̄-chiah lóng ē kā chhòng-tī, bú kah hō͘ i笑iah是hō͘ i siūⁿ-khì chiah beh放 i soah. 麗琴kap班長tòa siōng近, 同學tō kā in 2人「sak做堆」, 麗琴活跳koh愛講話, kap A瑤班長個性天差地--leh, 同學若kä chhòng-tī, i mā無人法tō͘, kan-taⁿ ē-tàng不時khah警覺--leh, kap A琴--á離khah hn̄g--leh, khah免hō͘同學講êng-á話.
印象siōng深--ê, 是A瑤班長無論好天iah是落雨, lóng穿1雙黃hia管, 另外koh chah 1領黃雨moa, 頭殼tì 1頂破破kam-á色ê學生帽á, hām體育課phah球, i mā kāng款穿hia管, 實在真心適.
小學畢業典禮, A瑤班長領tio̍h縣長獎, 鄉長獎kap村長獎, i領tio̍h真chē獎品tńg--去, hit-chūn góa領tio̍h品德獎, 獎品是1本相簿. 小學畢業了後, góan厝tòa tī庄尾, kap其他同學無讀kāng 1間國中, koh來tō無機會koh見tio̍h A瑤班長--a. Koh見著 i, 是14冬後ê同窗會.
其實góan chit班有辦過kúi-pái同窗會, m̄-koh góa lóng無參加, 一直到góa kā台北ê khang-khòe辭掉, tńg去故鄉chhōe頭路, hit年, Lán-lâng chiaⁿ月初3 ê同窗會, góa去參加, m̄-koh hit-pái A瑤班長無來.
食飯ê時, góa好玄問講:「班長nah ē無來?」坐隔壁ê麗琴講:「A瑤phòa病, 無法tō͘͘來參加.」A琴繼續講:「班長做兵ê時, tī兵營內底hō͘人欺負kah真thiám, i lóng無報告hō͘頂司知, 後--來精神tō失常失常, 兵iáu-bōe做soah, 部隊tō kā i送--tńg-來, 講 i tī部隊內底起siáu--a, kui工se̍h-se̍h唸, 無人知iáⁿ i teh講siáⁿ-mih.」
「Nah ē án-ne?」「班長一定是siuⁿ tiām--a, 人koh siuⁿ古意, tī部隊內底一定hông chau-that kah m̄是款!」其他做過兵ê cha-po͘同學lóng替A瑤teh不平. Ta̍k-ê心內lóng真怨嘆, 1 ê phah拚, 古意ê少年人, 人生ê前途tō án-ne hō͘無人性ê軍隊暴力害害--去.
食飽tàu, 其他同學提議講:「Lán來去看班長!」同學駛5~6台車tâng齊去班長in tau, 10外年無見面--a, chit-pái sio-tú, i變kah愈tiām, 看tio̍h過去ê同學, i kan-taⁿ tiām-tiām坐tī椅á頂, 眼神--nih有tām-po̍h-á驚惶hām不安. I變kah真sán真sán, 反應mā chiâⁿ慢, 其他同學hiông-hiông m̄知beh講siáⁿ, ta̍k-ê心頭酸酸, 過去ê模範生完全變做另外1 ê人.
行出班長in厝, 路途中經過hit-chūn ê校園, khòng闊ê運動埕--nih, góan親像koh看tio̍h細hàn ê時, A瑤班長穿hia管phah球ê形影.
Góa gia̍h頭看tùi hn̄g-hn̄g ê山邊, 看tùi開闊ê宜蘭平洋, 4 pêng tiām靜á tiām靜, tiām kah ná A瑤班長--leh.
留言列表
