「Góan chia是Kaboasoa, m̄是『吉貝耍』!」「Tú-chiah是學者ê觀點, chit-má góa來強調góan在地ê觀點!」
9月底, TGB走去台南Tong-san(東山) ê Kaboasoa, 參加Siraya部落體驗營. 營隊第1節課ê講師beh koh趕tńg台北開會, 時間koh chhun半點鐘, 換營隊負責人段--ê來chhōa ta̍k-ê討論, góan本chiâⁿ kiōng beh tuh-ku--去, 聽tio̍h段--ê án-ne chhiàng, 目chiu隨金--起-來.
「Siáⁿ-mih是『公界』? Góa聽無. "Kong-kài"? Che是lín講--ê, góan是叫做"Khuboa"!」簡單1句話, 表達--ê是明確ê意識.
「Kaboasoa tō是lín講ê pan-chi.」段--ê講in部落以早sì-kè lóng是pan-chi, hn̄g-hn̄g看--來tō知iáⁿ chia是Kaboasoa部落. 尾--á驚hông笑講是番, 樹á hō͘ in ka-tī chhò kah chhun無kúi欉--a.
段--ê kā góan講, i自細hàn去學校讀冊tō hông笑是「番」, m̄-koh i一直到16歲chiah知iáⁿ ka-tī是Siraya; in厝--nih lóng講段--家祖先tī中國是武秀才, hō͘官府派來台灣......「M̄-koh che是統派觀點, 聽聽--leh準soah. Góa是台獨--ê, góa認為góan kap中國無關係, góan本底tō是番!」
「Góan kui世人hông笑是番, chit-má beh做番, 政府soah m̄承認góan是番!」以早若tī Kaboasoa部落講tio̍h「番」, 穩hō͘ in chàm--出-去, chit-má in beh正名, 政府soah一直m̄接受, 認為「平埔」to漢化--a, 是án-chóaⁿ hiah hùi-khì beh變做「原住民」.
「Góan是Kaboasoa, m̄是平埔族! Góan是siáⁿ-mih人, m̄免別人來kā góan界定!」段--ê特別強調講in是Kaboasoa, 是Siraya,「平埔族」chit-ê名對in無意義. I koh強調, Siraya運動m̄是beh爭取考試加分, mā m̄是beh討利益, in是為tio̍h尊嚴, 為tio̍h beh追求自我ê認同.
「Siraya運動m̄是beh tò-tńg去古早ê生活, góan是beh走chhōe自我認同, kap góan tī chit-ê社會beh重頭khiā起ê基礎!」雖bóng學術界iah是一般人lóng加減ē嫌Siraya漢化kah無sêng平埔--a, m̄-koh段--ê認為文化tō是in ê生活, 世界teh進步, kám講Siraya tio̍h-ài tńg去到古早ê生活模式? Siraya有權利決定ka-tī ê生活/文化, Hō-ló人iah是Hak-ngìn ê生活/文化kám m̄是tòe時代teh改變, 是án-chóaⁿ soah用ka-tī ê價值觀, teh怪罪原住民各族群hông同化是m̄-tio̍h--ê-leh? Ta̍k-ê族群ê生活/文化beh án-chóaⁿ改變, 決定權是ka-tī, che chiah是尊重文化自主性ê態度!
段--ê koh強調: 文化ê自主權ài尊重, m̄-koh造chiâⁿ文化改變ê結構性原因bē-tàng chhìn-chhái tō放水流, 若無, lán tō無才tiāu了解歷史ê經驗kap教示, mā無可能chhōe-tio̍h重頭khiā起ê基礎!
「是m̄是番, kap血統無關係, che是主觀認同ê問題!」段--ê認為若hām ka-tī是siáng to m̄知, beh án-chóaⁿ有尊嚴? 台灣社會若無beh知iáⁿ ka-tī到底是siáng mā無要緊, i beh ùi in ka-tī開始做, i想beh改變--ê m̄是外口人mā m̄是學者, koh khah m̄是部落內底ê老人, i beh hē khùi力--ê是in部落ê少年輩, i講, 少年輩是社會未來ê ǹg望, i beh強調--ê m̄是chit-má mā m̄是過去, 重要--ê是未來!
留言列表
