台灣組合

Ui-chì lí hó:

黃媽媽bat thê-khí Ui-chì piáu-ta̍t ê lêng-le̍k chin-pō͘ chin kín, chin sêng-se̍k--a. Góa kā黃媽媽kóng: "Ui-chì sī thian-châi-hêng--ê", koh lâi tō khòaⁿ i án-chóaⁿ ūn-iōng chit-ê thian-hūn.

〈Mô͘-lī-cho̍k ê kò͘-sū〉

Lāu thâu-ba̍k ê sin-pū seng-sán soah kòe-sin--khì, siang-seⁿ-á lâm-eng bông, lú-eng o̍ah. Lāu-lâng òan-chheh nah ē m̄-sī cha-po͘ gín-á o̍ah--lo̍h-lâi, hō͘ in sit-khì 1 ê tong-jiân ê kè-sêng-jîn (kū thôan-thóng, kū su-ûi).

Lāu-lâng ê hāu-seⁿ siong-sim sit-khì sim-ài ê khan-chhiú (che ē-tàng sī jīn-hô ê gôan-in), pàng-khui gôan-té ê khang-khòe, lī-khui chhù--nih khì kàu gōa-kok seng-o̍ah. Chit-ê sî-chūn, khòaⁿ chit-ki Mô͘-lī-cho̍k, ná-chhiūⁿ khai-sí kiâⁿ hiòng o͘-àm, chhōe bô chhut-lō͘.

It-ti̍t kàu Siáu-phài (cha-bó͘ gín-á ê miâ, siàu-liân, sin hi-bāng ê ì-hâm) 8~9 hòe ê sî-chūn, i ho͘-hoah chó͘-lêng (hái-ang), thàu-kòe kap chó͘-lêng ê tùi-ōe (khiâ hái-ang, hōan-sè ài hù-chhut sèⁿ-miā), kā in ê cho̍k-jîn chhōe-tio̍h chhut-lō͘, kiâⁿ hiòng kong-bêng.

〈Chó͘-lêng ê ho͘-hoah〉

2 go̍eh chhe 4 góa tú-hó ū 1 ê ki-iân, khì kàu Po͘-lí pài-hóng Lōa Kòan-it bo̍k-su, chhím chē--lo̍h i tō kóng: "800 nî chêng ê cha-po͘-chó͘ ta̍h-ji̍p Phêⁿ-ô͘ ê Háu-mn̂g, tō sè-giân bô beh koh siūⁿ gôan-hiong, bô beh koh chò hit-pêng ê lâng."

Góa siūⁿ Kòan-it bo̍k-su í-keng iōng sèⁿ-miā-la̍t hoah-chhéⁿ chó͘-lêng--a, nā án-ne, siáng sī khiâ hái-ang ê gín-á (hôe-èng chó͘-lêng ê lâng)? Sī Lí Teng-hui? Sī Tân Chúi-píⁿ? Iah-sī Ui-chì, Tek-hôa......

〈Thian-hūn kap ha̍k-si̍p〉

Siáu-phài iōng in ê cho̍k-gí ián-káng, liām koa-iâu, tī kāng-iân ê gín-á--nih, lóng sī thâu-kiò--ê, sǹg sī chin ū thian-hūn, m̄-koh, i ê a-kong kū-cha̍at i chiâⁿ-chò sin ê thâu-ba̍k.

Siáu-phài bô hòng-khì, siūⁿ chīn pān-hoat phah-piàⁿ ha̍k-si̍p chiâⁿ-chò thâu-lâng ê ki-gē (bih-chúi, iōng kùn-á ê chiàn-kî......); bóe--á koh the̍h-chhut kàu-gia̍h ê ióng-khì, ho͘-hoah chó͘-lêng, hôe-èng chó͘-lêng ê ì-chì. Chit-ki Mô͘-lī-cho̍k tō án-ne khiā--khí-lâi, kiâⁿ--chhut-khì. (chhù-bī--ê sī in lāu-pē mā tńg-lâi ôan-sêng i èng-kai ôan-sêng ê khang-khòe.)

〈Kiat-lūn〉

Ū 1 kù ōe án-ne kóng: "Beh lí-kái chhú-lí bîn-cho̍k būn-tê, tio̍h-ài ū kai-kip hun-sek ê hong-hoat, kap ûi-bu̍t piān-chèng ê hong-hoat-lūn sè-kài-koan." Che kiám-chhái tō-sī Samurai ê to, ūn-tōng-chiá ê bú-khì, ùi chia khì lí-kái kap ha̍k-si̍p, sìn-sim tō bē lī-ka chhut-cháu--a.

Chò-peng êng-êng, góa ke-kiám o͘-pe̍h-siá, lí ke-kiám o͘-pe̍h-siūⁿ, chài-hōe.

2004.2.13 thàu-chá

──《TGB通訊》第54期(2004/3)