Ta̍k-ê 好, ná 款房間 ná 聽音樂, Hip Hop--ê, Rock--ê, Jazz--ê, R&B--ê, 聽 kah 有 kóa siān. Hiông-hiông 看 tio̍h 2 冬前 TGB tī TNT主持「Phah-phú 光」ê CD, 來聽看 māi, éng-chūn 到底是 lóng teh chòaⁿ siáⁿ?
O͘-pe̍h kéng--1-tè, sa--tio̍h-ê 是 2003 lán ê 新年特別節目, 5 點鐘對體制 kap 領袖崇拜 ê 大批判, mā tú 好 chit chūn teh 過年, kāng 款是立委選了, 聽--來特別有感觸, 事實證明, lán ê 思想武器無問題, 真正確, 2 冬前點--tio̍h ê 問題, 到 kah chit chūn 矛盾 jú 來 jú 明顯, DPP ê 墮落, lán 台灣人 m̄ 知目標是 siáⁿê 情形 mā jú 來 jú 嚴重.
M̄-koh góa soah chi̍t-sut-á to 無失志, 至少證明過去 lán 想--ê 無 m̄-tio̍h, 川伯--á hiah-ê sianpai kā lán 點醒--ê mā 無 m̄-tio̍h. Góa 想 tio̍h hit chām-á TGB ê 成員 ùi 淡水, 木柵趕去做節目, chit ê 過程有真 chē 討論, 做節目 chìn 前 ê 設計, koh 有落節目了後 ê 反省 hām 再討論, 雖 bóng chiok thiám, soah 因為認真投入, 已經看做性命 ê 1 部份--a, ka-tī mā tī chit ê 過程--nih 得 tio̍h bē-chió mi̍h-kiāⁿ.
Koh ē 記得中 ng lán bat 有爭論, bat oan-ke, mā bat 失志, 有 ta̍k-ê khi-mo͘-chih lóng bē tú 好 ê 衝突, mā 有 ī 到一半 siān--ê, 總--是 chit 種「team work」ê 感覺, hō͘ góa 感覺真有值; koh 想起 khah 早前 ê TVNET, lán tī hia tú--tio̍h-ê, koh 是另外 chit 種層面 ê 挑戰, mā bat 1 kái koh 1 kái 討論, 1 kái koh 1 kái ùi 暗時 bú 到天光, hit tang-chūn mā ē 想無 ka-tī 是 teh 無 êng siáⁿ, 總--是無形中一直 teh 大 hàn.
有 kóa 朋友chit-má hōan-sè 無 teh 聯絡--a, iah 是 tī 無 kāng 領域 teh 無 êng, 過去真正感謝 ta̍k-ê chò-hóe hit 段日子 ê 參與 hām 容忍, hō͘ góa 成長 chiok chē chiok chē.