台灣組合

E-po͘, khiā tī財經學院, tùi真理ê大門看--過, 微微ê風吹--來, 大學生teh開講, gín-á teh chhit-thô, koh有粉鳥tī塗kha行. Chiah-nī súi ê光景, hō͘ góa暫時bōe記1 kóa煩惱.

來chia做工作人員第2工--a, 雖bóng真thiám, m̄-koh, 有1 tīn關心台語文ê sianpai kap少年人, tī chia teh認真學習phah-piàⁿ, ta̍k-ê lóng tàu-tīn用台語teh溝通, 真自然ê感覺.

Tng teh享受美好ê氣氛hām空間ê時chūn, 目chiu前發生1 chān交通事故, 2 ê人為tio̍h真細節ê tāi-chì講bōe好勢, 汽車sió-khóa khê--tio̍h就siáng lóng bòai讓siáng, m̄知teh固執siáⁿ?

講母語是真自然ê tāi-chì, m̄-bat看過母語koh需要人chiah辛苦teh chhui-sak--ê. 是án-chóaⁿ像講台語chiah重要ê tāi-chì, 堅持ê人無夠chōe?

E-po͘ ê日頭真溫柔, ǹg望chit種tiⁿ-tiⁿ ê感覺, 會化解所有ê問題.

頭 1 kái參加有關台語ê研習營, 真歡喜mā真緊張. 會緊張是因為góa ê台語講kah真bē liàn-tńg, 做為工作人員ê góa, 感覺真pháiⁿ-sè, mā真驚kap學員講話會變成「鴨á聽雷」. 歡喜ê原因是, góa ê台語總算有機會進步--a!

經過kui工ê感受, 加減有tām-po̍h-á進步, 3不5時用台語kap人講話, 可能有tang時á會講m̄-tio̍h, m̄-koh其他ê工作人員聽--tio̍h mā會kā góa糾正, hō͘ góa深深體會tio̍h台語tio̍h-ài ùi生活中學起, 相信只要góa加講加聽, góa ê台語會有真大ê進步.

希望hit工離góa無hn̄g.

──《TGB通訊》第24期(2001/9)

◎第7屆世界台語文化營(2001/8/17-19)專刊

Chiâⁿ做chit pái世界台語文化營ê協辦單位, tùi góan tú改名ê「台灣文化社」來講, 是1 pái重新出發ê好機會. 真感謝「李江卻台語文教基金會」hō͘ góan機會, 來為台語文ê推sak出tām-po̍h-á力.

第2工ê活動, tī khang-khòe上做kah khah順sī, 雖bóng有sió-khóa狀況, m̄-koh ta̍k-ê lóng chiok真心teh出力, 相信ta̍k-ê應該bē責備--lah.

Tī前2工ê活動中間, 有1項hō͘ góa上感心--ê, tī lán「Tea Time」ê時chūn, 有聽tio̍h講師teh kā學員講:「Mài kā講師當作神.」I ê意思是鼓勵in mài欣羨作家, kut力寫, lín ka-kī mā會kap in相siâng.

最後, ǹg望ta̍k-ê tī寫作當時, m̄-thang bē記得ài kā chhui-sak hō͘ ta̍k-ê, iáu有, m̄-thang hō͘文化孤單, ài hō͘ lán ê語言kap文化kāng步.

──《TGB通訊》第24期(2001/9)

◎第7屆世界台語文化營(2001/8/17-19)專刊

出日頭ê e-po͘時á

Góa坐tī教室內底 聽

4 ê台文作家分享in ê tap-tap-tih-tih

Tī sio-lo̍h ê話--nih

Góa ká-ná Touch--tio̍h in 1路行--來ê目屎kap笑聲

Kiám-chhái有人teh想lín ê路m̄是tī chia

M̄-koh in chhiâng-chāi行kah koh khah精采

用性命唱出ê歌聲

是水chhiâng tī山壁ê kha-jiah

屬tī母語ê世界

7月初, 去新竹參加台語生活營, hit幾工感觸上深刻--ê是: 用台語思考台灣這tè土地, 是1件真好ê tāi-chì. Koh再講, 感覺hit 5工就是台語ê世界, ná親像teh大力suh清涼ê空氣, hiah-nī自由, hiah-nī快樂.

我kap A-lûn hit幾工講台語講kah真有夠khùi neh.

Tī生活營上好sńg ê tāi-chì, 就是kap A-lûn約束好, tī新竹hit幾工khà電話hō͘朋友ê時, lóng ai kap in講台語, 結果, in竟然mā lóng用台語kap gún開講. In bat講ka-tī台語講bē好勢, 根本就是騙--人-ê, hōan勢koh會笑我講台語ná親像gín-á.

用母語交談, 自然會產生1種親切感, 感覺jōa-nī-á自然--le.

今年熱--人beh參加ê營隊特別chē, 其中1場是tī高雄辦ê世界台語文化營, A仁bat講--過:「Lán做台語文--ê, chit款營隊無論是m̄是ka-tī辦--ê, lán算是主人, 就算有tāi-chì, mā ài參加.」 1-kóa老主人ta̍k冬lóng ùi海外piàⁿ--tńg-來, góan chiah-ê少年主人當然bē-sái làu-khùi.

Chit kúi冬, TGB學生台灣語文促進會lóng有tī台文營做工作人員tàu-saⁿ-kāng, chit屆khah無kâng--ê, 是有1節課góan ài分組去教羅馬字. 7/10到高雄ê時, chiah知iáⁿ互相ê聯絡têng-tâⁿ--去, chit-má無法tō͘分組, 變做TGB ài tī台á頂教, 慘--a, chit-siaⁿ kap góan chìn前收--tio̍h ê Information hām準備chiám然無kâng. 暗時ta̍k-ê討論ê結果, 是Bō͘-chin, Chiau-hông, Ui-chì koh有góa 4 ê人上台講, ta̍k-ê負責無kāng款ê內容, 教ê部份是góa處理, tú開始, góa chiok無法tō͘接受--ê, 人是「kiàn-siàu tńg siūⁿ-khì」, góa m̄知kám是「緊張tńg bē爽」? M̄-koh ta̍k-ê án-ne決定--a, 就ài照phín照行.

雖bóng國校á ê時chūn, tiāⁿ-tiāⁿ有上台演講ê經驗, m̄-koh he lóng是國校á ê tāi-chì--a, 離chit-má是chiok hn̄g chiok hn̄g--a, koh再講, 若想tio̍h ài khiā tī台á頂, 對hiah-nī chē人講話, chhoah就chhoah--死-a; chit 2冬, tī TGB內底, chit款訓練hām機會有khah chē, 總--是對象lóng kan-taⁿ 10~20 ê nā-tiāⁿ, chit-kái是百外人ê場, 內底koh有chiok chē sianpai, góan代表--ê koh是kui-ê TGB, 若是thut-chhê, TGB ê名聲就栽tī góan手頭--a, góa koh是hit種gâu烏白想ê人, m̄知到時會出siáⁿ-mih狀況, soah愈想愈緊張, ta̍k-ê lóng hō͘ chit種氣氛tah-tiâu--leh.

Góa招Bō͘-chin kap góa chò-hóe處理教羅馬字chit部份, góa講台語, i講Hakfa, soah hō͘ i愈來愈緊張, góa看i án-ne, ka-tī放輕鬆kā an-tah, êⁿ, ka-tī soah bē緊張--a; 尾手, 坐tī台á頂ê時chūn, mā m̄知是緊張過頭, ah是真正bē緊張, 就大pān大pān坐tòa hia, 目chiu koh對台á kha sàu--leh sàu--leh, 看tio̍h素枝á姨, Tek-hôa, Taco, A仁, 提銘兄, 蕭老師lóng tī台á kha注神teh看--góan, 心肝頭就koh-khah在--a.

點半鐘ê時間ká-ná 1-ē-á就過--a, hioh睏ê時, góan ta̍k-ê lóng走去音控室後piah hia喘大氣, thâu-tú-á m̄-tāⁿ台á頂ê人緊張, 坐tī台á kha ê in ká-ná mā chiâⁿ替góan緊張, góan 4 ê開始hoah講, 講kah無夠khùi, chiok想beh koh講--1-場-a......

2002年ê熱--人是特別--ê, 對góa來講, 是人生另外1 ê khám-chām. Tī chit-ê熱--人, góa決定beh選擇ka-tī人生ê路, 過程內底, oan-na有tiuⁿ-tû, 不安, koh ài面對kap厝--nih ê戰爭, m̄-koh青松兄講--過ê 1句話, hō͘我chiok大ê力量, i講:「今á日góa若接受lín替góa安排ê人生, 有1工góa後悔--a, ah是失敗--a, siáng beh替góa負責?」

對TGB來講, 今年熱--人mā是特別--ê, chit屆台語生活營招生情形無理想, 尾--á轉變做TGB幹部訓練, tī 4工3暝ê營隊內底, ta̍k-ê人針對無kāng主題去思考, 討論, 借chit-ê機會, chhiâu-chhek TGB內部對台灣社會ê共識, mā chim-chiok檢討TGB ê定位kap方向.

Chit屆營隊討論氣氛iáu算sio-lo̍h, 印象上深--ê, 是góa kap Bō͘-chin chò-hóe主持ê「台灣Cha-bó͘」chit節課, tú開始, ta̍k-ê先看góan準備ê『絕代寵妓』(影片), teh看ê時, 就看tio̍h有ê人tìm頭, hàiⁿ頭, 有ê人bî-bî-á偷笑, tiām-tiām-á做筆記--ê mā有, hit-chūn góa心內就teh想講, 等--leh討論ê時一定會chiâⁿ刺激, 尾--á有影是án-ne.

Tú開始ê時, ta̍k-ê無意識就變做cha-po͘--ê坐1 pêng, cha-bó͘--ê坐1 pêng, bē-su beh對chhiàng--leh, 頭á討論ê時, ta̍k-ê對1-kóa觀點iáu有共識, 尾--á講著生活中tiāⁿ tú-tio̍h ê檳榔西施, E-mail頂kôan teh流傳ê Sexy Picture, ta̍k-ê就tiô--起-來-a, cha-po͘--ê感覺in是純欣賞, 無牽涉tio̍h意識形態ah是身體侵犯ê問題, m̄免kā看kah siuⁿ嚴重, m̄-koh cha-bó͘--ê認為chit時chūn cha-bó͘人ê身體是hông當做chhit-thô-mi̍h teh買賣hoah價--ê, koh再講, lán teh講反父權, 反壓迫, 反......, kám m̄是就是kā chiah-ê理念hē tī生活中實踐, nah會嘴講--ê是1種標準, 做--ê koh是另外1種標準? Ta̍k-ê愈講愈大聲, koh tǹg桌á sio-jiáng, 連England踢kha球ê Beckham mā hông拖--落-來, 過程有影chiâⁿ緊張刺激, 尾手Bō͘-chin, Taco, Sûn-sèng, Ui-chì in 4 ê人lóng koh主動chhōe對方繼續hit-kóa議題, hit種為ka-tī ê理念hām想法辯護ê氣氛, chit-má想--起-來不止á心適, enjoy.

Tī chia, góa看著1-kóa平常時á khah無機會講ka-tī想法ê朋友, tī chit kúi工, 提供chiâⁿ chē bē-bái ê看法, góa mā看tio̍h ka-tī愈來愈敢為理念kap別人大細聲, chit冬--nih, TGB ta̍k-ê人有影lóng成長bē chió, ta̍k-ê愈khiā愈在.

大學ta̍k冬hioh熱kap hioh-kôaⁿ, góa lóng真愛參加營隊. 1方面是想beh ke學習1-kóa有趣味ê課程, 順續mā借機會sì-kè去看看--leh, 想beh tī大學期間kā台灣se̍h thàu-thàu......

Ta̍k-kái營隊, góa lóng tiām-tiām-á坐tī台á kha, 用崇拜ê眼神看台á頂大kha ê講師, thián--開ê白色簿á紙內底, lóng是認真記錄in講ê話. Hit-chūn, 可能án-chóaⁿ想都想bē到有1工góa mā會有機會tī台á頂講話.

今年ê「世界台語文化營」tī高雄舉辦, TGB ê成員是工作人員, 所以TGB tī新竹ê『幹訓』tú過無2工, góan就tī透風落雨ê風颱天, 1路ùi淡水駛暝車來到高雄. 高雄ê日頭kāng款真熱情, 生活ê步調mā無北部hiah沉重, 是tām-po̍h-á迷人ê城市; góa用真輕鬆ê心情準備beh開始營隊ê生活.

想bē到, tú到高雄ê第1工暗時, Tek-hôa就kā ta̍k-ê「宣佈」: 本來TGB負責ê「羅馬字教學」, 因為場地空間無法tō͘分組ê關係, 所以góan有1節課ê時間ài上台講話. 討論ê結果, Tōa-thâu-liân, Ui-chì, Chiau-hông kap góa lóng ài上台. Ui-chì是主持人, 第1部份Chiau-hông先紹介「TGB學生台灣語文促進會」; 續--落-來Ui-chì講「是án-chóaⁿ beh寫台文」; Tōa-thâu-liân教「羅馬字」, góa用Hak-fa做補充; siōng尾--á góa ài分享「寫台文ê經驗」, chit部份其他人mä會tàng chò-hóe分享.

自知iáⁿ chit項「任務」了後, góa原本輕鬆出日頭ê心情, 1時soah烏陰--起-來. 想tio̍h beh tī hiah-nī chē大人(內底koh chiâⁿ chē老師) 面頭前講話, koh ài坐tī hiah-nī kôan ê台á頂hiah久ê時間; koh再講, che是宣傳TGB ê好機會, 若是góa講kah làu-khùi就害--a, 真正愈想就愈驚......自細hàn, góa就chiâⁿ gâu緊張, ta̍k-kái老師點名ài講話, góa就驚kah phi̍h-phi̍h-chhoah, 膽是比niáu鼠á koh khah細. 大學tiāⁿ-tiāⁿ tú-tio̍h ài「口頭報告」ê課程, 不得已一定ài講話ê時chūn, 上台chìn前góa就會開始胃疼, 緊張到chiâⁿ無lō͘用ê程度.

Tī燒熱ê 7月初, góa坐tī無冷氣ê車--nih, 1路ùi淡水來到新竹. Kāng款是流kōaⁿ, lim茶, hoah熱ê天氣, kāng款是tī有十八尖山ê新竹; 2 kái參與「全國高中生台語生活營」, 今年ùi生活營轉做幹部訓練ê 3瞑4工, 對góa來講, soah特別無käng款.

Chit-kái因為kap Tōa-thâu-liân有1節「台灣查某」ê課, beh tī營隊期間kap ta̍k-ê討論, 是góa第1 kái hām人chò-hóe主持課程, 感覺是緊張koh期待. Góan事先就kéng好beh欣賞ê影片『絕代寵妓』(影片), 想beh透過chit-tè影片, 引chhōa ta̍k-ê討論有關cha-bó͘人ê 1-kóa議題, 包括cha-bó͘人ê身體, 婚姻, 社會地位......等等.

『絕代寵妓』是1齣真值得探討ê電影, m̄-tāⁿ án-ne, 內底koh有真chē「精采」ê『片段』; góan teh看ê時, 有ê人tiām-tiām-á看, 有ê人是bî-bî-á笑, koh笑kah真曖昧, 觀察ta̍k-ê人看影片ê表情實在真心適.

欣賞影片了後ê討論mā不止á刺激, 有真chē chín前tī生活中m̄-bat講--過, m̄-bat問--過ê議題lóng tī chit-chūn提出來討論, 親像「Cha-po͘人對『網路清涼圖片』ê想法是siáⁿ?」「Cha-po͘人看tio̍h "檳榔西施" ê反應kap cha-bó͘人有siáⁿ-mih無kâng?」 Che內底koh反映jōa chē兩性之間無kâng ê價值觀? Chiah-ê問題m̄-tāⁿ引起ta̍k-ê熱烈ê討論, mā hō͘ góan互相了解對方ê心理; 針對現此時普遍ê社會現象, cha-po͘人kap cha-bó͘人無kâng ê觀點tī toeh? 是siáⁿ? Góa感覺是真好ê『兩性溝通』課程.

Tī幹部訓練ê課程內底, ta̍k節課lóng是1種學習, m̄管是聽課iah是互相討論, lóng會得tio̍h 1-kóa無kâng ê想法; 甚至是改變chìn前ka-tī ùi既有主流價值觀接收ê粗淺概念; Yawas ê課「台灣島ê原漢情結」就hō͘ góa深深感受chit點.

有jōa久m̄敢探看ka-tī ê心境--a? 有jōa久無靜心kap ka-tī對話--a? Tiâu tī台北a-cha ê環境, tiâu tī ak-chak ê日常事工hām iù-chat ê討論, 1 kang過1 kang, 頭殼愈來愈tūn, 心境mā愈來愈bē清, mā愈無勇氣挑戰TGB現此時beh突破ê khám-chām.

7月初TGB台語生活營tī埔里5 kang, soah 1 khún頭hō͘ ka-tī kúi-lō車刺刻.

1998年初tòe Tsou (鄒) ê Voyu去in部落Saviki, chah--tńg-來-ê, 是心肝底滿滿ê刺刻kap giau疑: góa是siáng? Taokas, Hō-ló kap台灣人ê認同beh án-chóaⁿ chhiâu? Ka-tī到底是用siáⁿ款心態teh看待族群問題? 多族群共存ê mê-kak是siáⁿ? 族群平等beh án-chóaⁿ落實做具體ê態度kap行動? 多族群ê主體史觀hām族群互動koh tio̍h án-chóaⁿ形成? 各族群ê生存鬥爭, hō͘統治者利用來互相thún踏sio thâi, chit段歷史koh tio̍h án-chóaⁿ面對?

尾--á讀文權兄ê《海洋國家論》, 冊內底強調ê海洋性格, 一直tī頭殼內kún-ká. Chit-kái tī埔里, 賴牧師話句--nih, 真深刻teh反省族群sio-tak ê歷史經驗, hām起造平埔母文化史觀ê用心, hō͘ góa khǹg tī心肝底ê反省, 重頭chhiau出來思考: 若m̄願反省lán在地各族群互相thún踏ê過去, lán beh án-chóaⁿ起國? Lán kui-ê社會一直teh沉底, 若無文化kap價值認知ê徹底反省, beh án-chóaⁿ出頭天? 無chiah-ê反省, kan-taⁿ kui心teh sio-cheⁿ正名hām公投, kui心beh搶做體制頭人, beh án-chóaⁿ脫漢? Beh án-chóaⁿ起造海洋性格ê國家? Beh án-chóaⁿ chiâⁿ做一流ê民族?

Hit 5 kang, 賴牧師mā熱phut-phut引góan sì-kè去看, tī Shapiz Batu ê工作室, i用平順ê口氣, kā góan講 i本chiâⁿ是Thao (邵族)唯一ê乞食, án-chóaⁿ tī沉底了後koh重頭khiā起; tī Auran, góan看tio̍h外來者kúi百冬ê同化, 無才tiāu消滅Pazeh ê命脈; tī Kahabu, 隆川兄大聲kā góan講 i tō是四庄番; tī Taⁿ-bí-kheⁿ, góan看tio̍h 921地動了後, in組織社區自主ê意識kap力量, kā pha-hng--去ê庄頭, 變做kiáⁿ孫ē-tàng重頭khiā起ê田園.

「Góa m̄是人, góa m̄是『人』, góa是Pazeh! Góa是Siraya! Góa是番!」Tiām靜ê謝緯紀念營地某1角勢, āng聲ê聲sàu, bē-su 1支刀, kā tiām靜ê暗暝切kah碎糊糊, chit款魄力, chùn-būn tio̍h營地對面ê鯉魚窟, 水痕1 sûn 1 sûn kúi-nā點鐘久koh無消散......

M̄免驚, góan m̄是teh sio罵sio thâi, chia mā m̄是武術館, che是賴貫一牧師用i「堅強」ê性命力teh kap góan分享「台灣族群」.

講tio̍h族群關係, lán真緊tō想tio̍h一般teh講ê 4大族群(其實chit款分法有問題)──Hō-ló, Hak, 原住民, 外省人. 原住民是尾--á好聽teh講--ê, 台灣社會普遍叫in「番á」, 意思是無開化ê動物, m̄是人tō tio̍h--lah. 賴牧師tō是ùi chia講起--ê......

Lán Hō-ló iah是Hak kioh是chiâⁿ做漢人jōa文明jōa hiau-pai, 歷史掀--開kā看, 根本tō無1 ê民族號做「漢」, 漢是1 ê王朝ê名, 除起khiā tī黃河洛水ê人, 其他所在--ê lóng m̄是人, 號作『東夷』『西戎』『南蠻』『北狄』, tī中原人心目中, lán ê cha-po͘祖mā是hō͘ in看soe-siâu ê番(蠻南ê福建). 今á, chit-tīn tī China活bē落--去ê南蠻, 渡過烏水溝hām平埔má生--落-來ê後代, soah koh用「Lí是番, góa是漢」teh phìⁿ-siùⁿ別人, che kám m̄是真笑khoe? 到kah 1903年台灣koh有teh食番á肉, 番á鞭, 用番á骨khòng膠, 自認是「人」ê南蠻kám真正有phēng番khah chiâⁿ「人」?

Chiâⁿ做Hō-ló人, chiâⁿ做有台獨意識ê台灣人, 真chē人認定ka-tī ê祖先是ùi唐山來--ê, in hoah出「Pêⁿ-pêⁿ是漢人, soah bē-sái ka-tī chiâⁿ做1國?」chit款ê台獨理論.

「Góa教lín講góan Pazeh ê話kám好? [桌á] 叫做 [lalatan], [椅á] tō是 [aitukoan]......」坐tī góan面頭前ê apu (Pazeh話「a-má」ê意思)笑bi-bi án-ne講.

Tī「Auran」(愛蘭部落), góa頭1 pái看tio̍h清楚知iáⁿ koh認同ka-tī平埔身份ê Pazeh老人. Tām-po̍h-á khiau-ku, 頭毛白kah發金, 講話kap行動lóng iáu koh真勇健ê Pazeh apu, kap góan開講ê時, 用i ê歌聲唱Pazeh ê古調, 用i ê嘴唸ka-tī用羅馬字拼寫ê Pazeh話語, hit-chūn ê i, kap一般90 kúi歲ê老人是hiah-nī-á無käng款, 刻tī面容頂kôan, hit種開朗ê自信kap韌性ê性命力展現--出-來ê氣質, hō͘ góa記tī心肝底, 原本遙遠生疏ê「平埔族」形象ùi chia開始活--起-來.

2003年熱--人, 埔里ê台語生活營是1段台灣歷史, 生態kap kiōng beh消失--去ê平埔族群ê對話. 賴牧師對台灣宗教kap被殖民ê歷史觀察, 對台灣chiâⁿ做1 ê海洋新國家應該ài有ê內涵, koh有i強調ê「多元族群史觀」, kap i用「做平埔族m̄是民族運動, 是新台灣起造運動」來投入平埔族群運動ê Vison, lóng hō͘ góa真大ê衝擊kap思考.

5 kang ê營隊, góa koh khah認真面對ka-tī ê「過去」, 到底góa是Hō-ló人? Hak-kâ-ngìn? Iah是身軀內底流有Makatao(馬卡道) kap Hoanya (洪雅)平埔血ê人? 百gōa冬前, in互相koh是hiah-nī-á衝突, tī族群觀點頂kôan, góa應該扮演siáⁿ-mih角色? 身軀內底血脈ê意義koh ài án-chóaⁿ轉換做新台灣ê核心價值? 賴牧師講ê台灣人起造新國家ài有ê心胸, 腹腸kap氣度koh ài án-chóaⁿ ùi ka-tī做起?

今年熱--人, 23歲ê góa mā行到人生另外1 ê khám-chām, ká-ná行到十字路口kāng款, 對人生ê理想, 性命ê出路, kap未來ê方向有1-kóa giau疑hām驚惶. 總--是, tī埔里, góa看tio̍h真chē人性命力ê光kap堅持理念ê熱情, Pazeh ê apu, 賴牧師, Thao(邵族) ê藝術家Shapiz Batu, Taⁿ米坑á ê官--先-生, chiah-ê人seⁿ-thòaⁿ tī台灣chit-tè土地, beh做ka-tī ê主人, beh決定ka-tī ê歷史, mā teh起造ka-tī ê理想, tō像賴牧師講--ê「人生ài活kah親像藝術品ê展現」, in tī無形中累積--ê是1種新台灣人ê價值, 1種tī生活中實踐ê性命價值. Góa ùi in身--nih感受tio̍h不斷成長ê動力, mā tī chia chhōe-tio̍h未來人生ê形影.

Chit-pái生活營gún去Kahabu kap Pazeh部落. Gún先去Pazeh部落──Auran, 續--落-來tō去Kahabu部落──蜈蚣崙(Giâ-kang-lun) ê『楓香公園』.

蜈蚣崙是埔里第2大里, mā是高砂族Tayal kap平埔族ê邊界, tī公園ē-sái看tio̍h防守用ê瞭望台; 里長伯--á講, 高砂族「出草」一定ē先到in蜈蚣崙chia. 當然, Kahabu mā ē kā反擊--tńg-去, che是部落kap部落1種維持Balance ê方式.

921了後, 蜈蚣崙ê厝倒了了, 重起了後, 平埔部落ê氣味失去bē-chió. M̄-koh, ē-sái ùi坐tī公園--nih ê老人, gín-á kap來來去去居民ê面chhiuⁿ--nih, chhōe出1-kóa-kóa-á「番á味」.

里長伯--á講 i teh爭取經費, thang發展蜈蚣崙chiâⁿ做埔里ê觀光景點, 吸引觀光客入來蜈蚣崙. 里長伯teh講ka-tī khiā起ê所在, 感覺tio̍h i驕傲ê表情kap chiâⁿ做番ê自信.

M̄-koh, 蜈蚣崙ê發展, kám真正對居民是好--ê? Kám ē破壞本底ê氣味kap tiām靜? Che hōan-sè值得lán思考.

7/1~7/5台語生活營kap TGB(學生台灣語文促進會) 10冬ê同窗會結束tńg到淡水了後, TGB幹部teh分享chit 5 kang ê刺刻hām成長, góa chiah hiông-hiông tì覺tio̍h ka-tī kui-kang浸tī行政事務ê生活方式, 頭殼jōa久無teh tńg-se̍h--a.

5 kang ê營隊, 透過賴貫一牧師ùi多族群出發ê史觀, hō͘ góan重新走chhōe平埔族ê認同. Kui營隊雖bóng kan-taⁿ 5 ê學員kap 8 ê工作人員, m̄-koh是第1 kái「ta̍k ê人」tī埔里chhōe-tio̍h養分kap性命力.

「無史tō無國」是jōa chē被殖民統治國家ê悲哀, lia̍h無chit-ê mê-kak, koh khah án-chóaⁿ hoah台灣獨立建國iáu是lak tī統治者ê史觀--nih. 讀川伯--á ê《簡明台灣史》入門ê góan, ùi chia tì覺tio̍h台灣beh péng身, tio̍h-ài khiā tī勞苦大眾ê立場對抗統治集團(China勢力, 買辦, 投機政客), 賴牧師ê多族群史觀, tú好像1支大tâng--ê, 注射「有唐山公, 無唐山má」ê平埔文化, hō͘ góan清楚走chhōe平埔認同是beh kap China文化斷臍, 破空虛ê漢民族意識. Éng過kan-taⁿ知iáⁿ ài讀平埔歷史, ài知iáⁿ ka-tī是平埔後代, 是án-chóaⁿ tio̍h án-ne走chhōe soah sa無cháng, chit-kái聽賴牧師講母文化ê認同, kui-ê概念chiah開始完整.

「台建」出身ê賴牧師, 用牧師人ê身份, chhōe-tio̍h台灣起國ê石盤了後, kui心投入去中台灣族群ê組織khang-khòe, chit-má i是全台灣平埔族總聯絡人, 對i來講, che kan-taⁿ是1種虛名, 重要--ê是後piah ê責任kap政治意涵. I用i ê性命力teh pháng台灣起國ê基礎, 在地平埔族群mā òe-tio̍h賴牧師ê熱情, ta̍uh-ta̍uh-á點引文化ê火母.

Góan去拜訪ê Pazeh (巴宰族) 91歲ê apu (Pazeh語, a-má ê意思)是Auran (Pazeh語, 烏牛欄, chit-má叫愛蘭)地區iáu koh ē-hiáu完整講母語--ê. Pazeh chêng到taⁿ lóng是統治者ê phah手, 是台灣各族群內底, kap統治者khiā siōng óa, mā thâi人siōng thiám--ê, kap Auran隔壁ê Kahabu (chit-má ê蜈蚣里)比--起-來, Pazeh享受chē-chē統治者撥--落-來ê經濟資源, 顛倒Kahabu長久以來lóng是做Pazeh ê長工, kui庄sàn-chhiah.

Góa tńg來兵營了後, 一直到cha-hng chiah回復正常.

5冬來, 第 1 kái提早離開, 心內真m̄甘, m̄知beh án-chóaⁿ sio辭, m̄-chiah beh走ê時chiok狂, 前1暝mā無kā ta̍k-ê講. Hōan-sè lín感覺góa無離開, 無去做兵, tī 1 pái 1 pái ê活動--nih看tio̍h góa, m̄-koh ta̍k pái見面, góa lóng bē-su有『恍如隔世』ê感覺. 做兵teh-beh 1冬--a, m̄-koh góa感覺離學生時代有夠hn̄g ê hn̄g.

算真好運, chit kái góa無缺席, mā看tio̍h lán內底ta̍k-ê ê成長. 過去kúi冬, 2001~2003營隊ê講師khah ē記得--ê是góa hām TTL, koh khah chìn前(1999~2000) ê講師是khah知iáⁿ Tek-hôa. Chit kái營隊, góa有注意--tio̍h, 林--先-生chiok chia̍p提起Chiau-hông hām Bō͘-chin, 課程時間若有beh改, mā lóng chhōe--in.

Che是真好ê現象, lán 1代thèⁿ 1代, 學習承擔責任, 面對自我挑戰. Tī chit ê過程--nih, kiám-chhái ē chiok thiám頭, m̄-koh o̍at頭kā看, lán比舊年kāng chit chūn, kám是ke真無kâng--a? Khah敢表達, khah ē-hiáu處理tāi-chì, kám m̄是?

除去Chiau-hông kap Bō͘-chin, Î-kun mā真無簡單, 舊年參加生活營了後, tō chi̍t ē手tī Si-chong hia tàu-saⁿ-kāng, mā hō͘ ka-tī真緊tō看tio̍h運動ê chi̍t-kòa mê-kak kap問題, án-ne, 來參加今年ê生活營, hō͘ ka-tī真緊tō進入討論ê狀況.

生活營辦到taⁿ mā第8冬--a, kiàn-pái辦, 工作人員的確 lóng比學員khah chē, 營隊煞, koh無thang隨看tio̍h tiām ê籽puh-íⁿ. 是án-chóaⁿ beh辦生活營? 辦生活營beh chhòng siáⁿ? Chiah-ê問題一直khǹg tī TGB幹部ê心肝底teh走chhōe.

今年生活營tī網路頂相tio̍h西螺交流道邊--á ê庄á──Pi-thâu-pòe, 1 ê樸實ê農村, kap lán ê故鄉kāng款, 無chhia-iāⁿ ê ngē體設備, 無名聲透kui台灣ê頭人, 有--ê kan-taⁿ是tī日頭kha曝kah烏ta-sán ê choh-sit人, tī chia辦營隊ē-tàng得tio̍h siáⁿ?

5工ê時間, ta̍k-ê se̍h西螺延平老街, 參觀豆油工場, 米ká工場, 豆kí皮工場, tī社區行踏, 學做粿, kap choh-sit人開講, tàu khau菜......, chiah-ê看煞了後beh chhòng siáⁿ? 是koh ē-tàng án-chóaⁿ?

對在地人來講, TGB kan-taⁿ是參觀團體其中 1 批大學生, lán走了後, in猶原án-ne生活, bē改變siáⁿ-mih. Ah對lán來講--leh? Ta̍k-ê àn無kāng所在來到西螺生活5工, 看chiah chē mi̍h件, ka-tī有siáⁿ-mih體驗? Tī性命--nih有siáⁿ-mih kha-jiah留--落-來?

Tī chia, hō͘ góa看tio̍h基層人民ê性命力, 1 tīn óa附土地生存ê人, 雖bóng hō͘政客頭人chau-that kah thiám-thiám-thiám, hō͘社會主流價值當做gōng人, m̄-koh in iáu是無放棄土地, iáu是beh維持 in做人ê尊嚴.

自舊年學台語文到taⁿ, tú-á好1年--a! Ùi無到有, góa看ē tio̍h ka-tī ê成長, mā有刺激tio̍h ka-tī想法ê改變. Koh再講, 台語文方面ê進步, koh是chhím開始ka-tī想bē到--ê.

參加TGB生活營第2 kái--a, chit 2 kái體驗lóng無kāng款, m̄-koh有1點kāng款--ê是: tú--tio̍h ê人lóng真愛台灣chit tè土地, 無論是ko͘-put-jī-chiong來做, iah是心甘情願--ê, siōng無, in lóng有付出.

體驗無kâng, 衝擊mā無kâng, hō͘ góa siōng大ê衝擊, tō是「社區營造」chit ê部份.

Ta̍k ê人lóng愛ka-tī tòa ê厝邊環境súi koh清khì. M̄-koh真正beh叫 lí義務來做, koh無人願意做gōng大呆. Án-ne「beh牛犁田koh無愛hō͘ i食草」ê心態, 實在hō͘人感覺真失志.

自舊年ê Taⁿ-bí-kheⁿ社區到今年ê Pi-thâu-pòe, góa相信m̄-tāⁿ是chit 2 ê社區án-ne, 全台灣所有ê社區 lóng是án-ne.

其實, chhím開始ê時chün, góa mā無想過ē來西螺, 是Sìn-chì kā góa ko͘-chiâⁿ, góa chiah來--ê. Góa對西螺本來根本無了解, 參加chit ê營隊了後, chiah知iáⁿ西螺有chiah chē mi̍h件.

營隊有去參觀豆油工場kap西螺老街, mā有去Pi-thâu社區. Tī豆油工場, góa看tio̍h豆油ê製造過程, 烏豆á豆油ài曝日頭, 4到6個月chiah ē變做 lán teh食ê豆油.

營隊mā有去看西螺7崁, 西螺7崁ê由來是張廖家族來台灣ê時chūn, 治安chiâⁿ bái, 為tio̍h安全, 以部落做單位, 分做 7崁, 是家族民防ê制度, 西螺7崁其實是武館ê意思.

林--先-生koh有chhōa góan去Pi-thâu社區. Pi-thâu社區tī林--先-生ê phah拚了後, 有gín-á tī社區ê圍牆á畫圖, mā有chiok chē種花ê所在. 今á日看--tio̍h ê Pi-thâu社區, kap以早無kāng款.

──《TGB通訊》第58期(2004/7)

◎第8屆台語生活營(2004/6/26-30)專刊

Chit pái生活營tī西螺ê Pi-thâu-pòe舉辦, 課程--nih安排參觀西螺街á kap Pi-thâu-pòe, 感受--ê soah完全無kâng.

Tī西螺市á頭, chhōa路ê導覽解說員廖--先-生, chhōa ta̍k-ê沿路欣賞古早厝, chiâⁿ專業teh紹介chiah-ê建築ê特色kap意義.

M̄-koh góan chit tīn--ê, 沿路ká-ná kan-taⁿ看ē tio̍h建築, 1間行過1間, tòa tī建築內底ê o͘-jí-sáng o͘-bá-sáng, ná無存在--leh. Tī in門kha口, 聽廖--ê講解建築ê花草, chit間講煞隨徙tùi別間--去, chhun tham頭ê老人嘴á開開, 目chiu金金, 滿腹ê故事kâm tī嘴--nih koh吞落腹tó͘底.

Tī Pi-thâu-pòe, Chì-hun大--ê chhōa góan sì-kè lòng sì-kè sô, liam-mi落田tàu khau菜, liam-mi tī kám-á店teh學做chhì-khak粿, 等--leh去人厝內看人做phok-á籽, koh 1時á, 車路邊chhah--leh, kap洗菜a伯tī田岸路講--起-來, 聽a伯kàn-kiāu政府kap農會, 目nih-á niâ, koh走來去豆ki皮工場, 米ká工場, 木耳寮á體驗hip kah擋bē tiâu ê「生產線現場」.

Tī西螺市á頭, 聽--ê是死ê建築特色, 是古早好gia̍h人ê故事; tī Pi-thâu-pòe, 是親身ê體驗, 是choh-sit人ê艱苦kap不滿, 是活跳跳ê性命經驗!

台灣過去是農業為主ê社會, tī農村內底顧3 tǹg粗飽是ta̍k-ê siōng大ê生活目標. 社會事iah是政府政策lóng是學者官員hit-kóa大頭á teh制定.

M̄-koh chit-kóa官員學者teh制定政策ê時chūn, lóng關tī辦公室內開會討論, lóng無確實去了解siōng適合人民ê做法.

Tō像chit kái營隊來到Pi-thâu-pòe, tō tú-tio̍h a伯teh kàn-kiāu環保局, 因為choh-sit a伯teh燒稻草, soah去hō͘環保局開罰單, a伯kiāu講:「Góa ài過生活, hit-kóa官員有siáⁿ-mih人來看過góan choh-sit ê過程? 有toh 1 ê來問過góan是án-chóaⁿ beh燒稻草?」

燒稻草hōan-sè ē影響tio̍h空氣kap交通, m̄-koh官僚系統一向慣勢用「禁止」ê粗魯手法, tú-tio̍h siáⁿ-mih問題, 若m̄是用粗魯ê方式, tō是互相sak過來koh sak過去. 政府kám m̄是beh替人民服務--ê? Nah ē直接禁止, m̄是tàu想其他替代ê辦法?

燒稻草ē影響tio̍h空氣kap交通, ē-sái改做分區燒, iah是選擇風向來燒, mā ē-sái政府khai錢買稻草回收再利用, 處理ê方法真chē, 現此時mā有回收ê機制, 是án-chóaⁿ chiah-ê官僚無beh主動來解決問題? In是án-chóaⁿ beh掩khàm, chiah koh用罰單來迫農民--leh?