Lán chhím tī屏東a公a-má tau tòa 1禮拜, kui禮拜lí ta̍k工to sńg kah真夠khùi,「sńg」, 對iáu-bōe 3歲ê lí來講, 是成長ê刺激, 是teh吸收成長ê養分. Khòng-khoah ê活動空間, sù-sī ê生活環境, chiâⁿ chē chhit-thô伴, chiâⁿ chē kap人互動ê機會, 踏ē tio̍h thô͘, 摸ē tio̍h樹á, 田岸路邊看ē tio̍h活lèng-lèng ê牛á, 鴨á, 鵝á......
想起góa細hàn ê時, sui-bóng tòa tī算都市ê所在, m̄-koh hit-chūn無hiah-nī chē無必要ê「發展」, 走chông chhit-thô ê空間kui sì-kè, 厝邊隔壁gín-á伴sio招, kui工to tī外口chhit-thô; 去到市內a公a-má tau, kāng iân ê gín-á mā總--是sio招, kui工tī街á路iah是巷á底sô來sô去; 若tńg去到海邊á a公a-má tau, koh-khah是sńg kah m̄知人, peh樹á, tī海kîⁿ jiok花跳, ó͘ chhiah-chhùi-á, kui庄頭pha-pha走.
Lán chit-má tòa chia, 是大都市邊ê城鎮, 無大都市hiah-nī ak-chak, 本底是tiām靜sù-sī ê生活環境.「經濟開發」ê口號, soah hō͘ chit ê所在jú來jú cháu-cheng, 大phiàn大phiàn青翠ê土地hō͘怪手lu平--去, 1棟1棟ê大樓直直chhāi--起-來, jōa-nī chē草埔樹林hông chhoh掉, pìⁿ做人工化ê「公園」, 在地人生活ê品質khah輸觀光thàn-chîⁿ ê考慮,「發展ê必要」khah贏過生存實際ê需要.
「進步」kap「發展」ê口號m̄-tāⁿ一直kā lán活動ê空間束ân--去, hō͘「進步」kap「發展」佔chhun ê公共空間, soah mā hō͘ lán jú來jú無方便, jú來jú bē sù-sī, hām siōng基礎ê公共工程to ló-chhó kah hō͘ lán tio̍h面對無應該tú--tio̍h ê危險. 大車路jú開jú chē, jú hùn jú khoah, lán soah jú行jú無路; 公園jú做jú chē, 樹á kap草埔soah jú來jú chió過âng-bûn-thô͘地; 草埔bē-sái踏, 樹á bē-sái peh, 有水bē-sái óa; 人行路活動ê空間hán得好好無pháiⁿ--ê; 若teh siáu siáⁿ樹栽花欉, hām山路2 pêng邊本底ê大樹to ó͘了了, 改種無適合在地風土ê植物; khiā-ke區根本欠缺公共空間ê合理安排......
Lán ê經濟發展--a, lán ê教育程度提升--a, lán「開發」ê步調jú來jú緊, m̄-koh lán siōng基本ê生存需要一直被迫犧牲, lán ê環境記tì kap生活模式一直被迫改變! Lán koh tio̍h強迫ka-tī忍受無必要承擔ê風險kap痛苦!