Lán chhím tī屏東a公a-má tau tòa 1禮拜, kui禮拜lí ta̍k工to sńg kah真夠khùi,「sńg」, 對iáu-bōe 3歲ê lí來講, 是成長ê刺激, 是teh吸收成長ê養分. Khòng-khoah ê活動空間, sù-sī ê生活環境, chiâⁿ chē chhit-thô伴, chiâⁿ chē kap人互動ê機會, 踏ē tio̍h thô͘, 摸ē tio̍h樹á, 田岸路邊看ē tio̍h活lèng-lèng ê牛á, 鴨á, 鵝á......
想起góa細hàn ê時, sui-bóng tòa tī算都市ê所在, m̄-koh hit-chūn無hiah-nī chē無必要ê「發展」, 走chông chhit-thô ê空間kui sì-kè, 厝邊隔壁gín-á伴sio招, kui工to tī外口chhit-thô; 去到市內a公a-má tau, kāng iân ê gín-á mā總--是sio招, kui工tī街á路iah是巷á底sô來sô去; 若tńg去到海邊á a公a-má tau, koh-khah是sńg kah m̄知人, peh樹á, tī海kîⁿ jiok花跳, ó͘ chhiah-chhùi-á, kui庄頭pha-pha走.
Lán chit-má tòa chia, 是大都市邊ê城鎮, 無大都市hiah-nī ak-chak, 本底是tiām靜sù-sī ê生活環境.「經濟開發」ê口號, soah hō͘ chit ê所在jú來jú cháu-cheng, 大phiàn大phiàn青翠ê土地hō͘怪手lu平--去, 1棟1棟ê大樓直直chhāi--起-來, jōa-nī chē草埔樹林hông chhoh掉, pìⁿ做人工化ê「公園」, 在地人生活ê品質khah輸觀光thàn-chîⁿ ê考慮,「發展ê必要」khah贏過生存實際ê需要.
「進步」kap「發展」ê口號m̄-tāⁿ一直kā lán活動ê空間束ân--去, hō͘「進步」kap「發展」佔chhun ê公共空間, soah mā hō͘ lán jú來jú無方便, jú來jú bē sù-sī, hām siōng基礎ê公共工程to ló-chhó kah hō͘ lán tio̍h面對無應該tú--tio̍h ê危險. 大車路jú開jú chē, jú hùn jú khoah, lán soah jú行jú無路; 公園jú做jú chē, 樹á kap草埔soah jú來jú chió過âng-bûn-thô͘地; 草埔bē-sái踏, 樹á bē-sái peh, 有水bē-sái óa; 人行路活動ê空間hán得好好無pháiⁿ--ê; 若teh siáu siáⁿ樹栽花欉, hām山路2 pêng邊本底ê大樹to ó͘了了, 改種無適合在地風土ê植物; khiā-ke區根本欠缺公共空間ê合理安排......
Lán ê經濟發展--a, lán ê教育程度提升--a, lán「開發」ê步調jú來jú緊, m̄-koh lán siōng基本ê生存需要一直被迫犧牲, lán ê環境記tì kap生活模式一直被迫改變! Lán koh tio̍h強迫ka-tī忍受無必要承擔ê風險kap痛苦!
1 ê法國朋友kā góa講--過:「Lín台灣人ê經濟水準tī全世界算bē-bái, m̄-koh是án-chóaⁿ lín有法度忍受chiah-nī無品質ê生活環境?」Koh-khah害--ê, lán sì-kho͘-liàn-tńg大部份人是án-chóaⁿ soah kā奴隸ê待遇當做是正常? 是án-chóaⁿ kā beh追求「人」ê基本尊嚴當做是無正常?
Góa無法度忍受hông當做奴隸對待, góa koh-khah m̄願hō͘ lí tio̍h接受做人奴隸ê運命! Góa ǹg望lí ē-tàng有安全, sù-sī koh自由ê生活環境, góa ǹg望lí thang好有受tio̍h尊重kap保障ê成長空間, góa ǹg望lí m̄免koh hông當做奴隸來chau-that.
Sui-bóng goán iáu無châi-tiāu hō͘ lí chiâⁿ做「人」ê成長環境, goán iáu無châi-tiāu改變chit ê hō͘ lán pìⁿ做奴隸ê世界, m̄-koh goán chit代ài對lín有交待, goán bē-tàng閃避chit ê責任.
我們剛在屏東阿公阿媽那裡住了一個禮拜，整個禮拜你每天都玩得盡興，「玩」，對還未滿三歲的你來講，是成長的刺激，是在吸收成長的養分。廣闊的活動空間、舒服的生活環境、有許多玩伴、很多與人互動的機會，踏得到土，摸得到樹，田岸路邊看得到活跳跳的牛、鴨、鵝……
想起我小時候，雖然住在算是都市的地方，但是那時候沒有那麼多沒有必要的「發展」，四處是跑跳遊玩的空間，厝邊隔壁囡仔伴每天都在外面活動；去到市內阿公阿媽家，同輩囡仔也總是不時在街頭巷尾鑽來鑽去；若回去海邊阿公阿媽那裡，更是玩到瘋，爬樹、到海邊追彈塗魚、挖赤嘴仔、全庄頭趴趴走。
我們現在住這裡，是大都市邊緣的城鎮，沒有大都市那麼令人煩躁，原本是恬靜舒適的生活環境。「經濟開發」的口號，卻讓這個地方愈來愈走樣，整遍整遍青翠的土地被怪手鏟平，一棟一棟的大樓不斷豎立，多少草埔樹林被鏟除，成為人工化的「公園」，在地人生活的品質抵不住觀光賺錢的考慮，「發展的必要」遠勝過生存實際的需要。
「進步」和「發展」的口號不止將我們活動的空間不斷縮小，被「進步」和「發展」佔剩的公共空間，也讓我們愈來愈不方便、愈來愈不舒適，連最基礎的公共工程都馬虎到讓我們得面對不應該遇到的危險。大路愈開愈多、愈拓愈寬，我們卻愈走愈沒路；公園愈做愈多，樹木草埔卻愈來愈少；草地不能踏、樹木不能爬、有水不能靠近；人走路活動的空間難得有沒壞的；若正流行觀賞什麼樹栽花欉，連山路兩旁原本的大樹都挖光，改種不適合在地風土的植物；住宅區根本欠缺合理的公共空間安排……
我們的經濟發展了，我們的教育程度提升了，我們「開發」的步調愈來愈快，然而我們最基本的生存需要一直被迫犧牲，我們的環境記憶和生活模式一直被迫改變！我們更得強迫自己忍受不應該承擔的風險和痛苦！
有個法國朋友曾跟我說過：「你們台灣人的經濟水準在全世界算不錯，但是為什麼你們能夠忍受那麼沒有品質的生活環境？」更糟糕的是，我們身邊大部份人為什麼反將奴隸般的待遇當做是正常？為什麼想追求「人」的基本尊嚴反而被當做不正常？
我無法忍受被當做奴隸對待，我更不願讓你必須接受做人奴隸的命運！我希望你可以擁有安全、舒適又自由的生活環境，我希望你能夠享有得到尊重與保障的成長空間，我希望你不必再被當成奴隸來糟蹋。
雖然我們仍沒有能力給你做為「人」的成長環境，我們仍沒辦法改變這個讓我們變成奴隸的世界，但是我們這代人必須對你們有所交待，我們無法閃避這個責任。
──《TGB通訊》第162期(2013/3)
留言列表
