# A-lân kap i ê 姊妹 á 伴
大學聯考 chhím 考 soah, A-lân 隨 kap Siù-bí hām Ka-bûn chit 2 ê 姊妹 á 伴 sio 招去海邊 á sńg 水, 想 beh 好好 á 放鬆--1-ē, 3 冬來, 特別是高 3 chit 段時間, 為 tio̍h beh 拚聯考, ē-sái 講除去厝--nih kap 學校, 無其他所在 thang 去, ta̍k 工縛 tī 冊堆內底, 無起 siáu mā ē phòa 病, taⁿ, 總算考 soah--a, ē-tàng tháu 1 口氣--a.
今 á 日 ê 日頭不止 á mé, 太平洋 hō͘ 日頭光 chhiō kah 烏金烏金, 青翠 ê 海岸山脈 khiā tī 邊--á. Ē-po͘ 時 á, bē-chió 人來 tī 海 kîⁿ sńg 水 khioh 石頭, 邊--á 兼做 chhah 車用 ê 廣場, 有賣枝 á 冰, 烏輪 kap 烘 ian-chhiân ê 擔 á ; 頭前海面看 ē tio̍h 10 外隻漁船 á tng teh 收網 á, 有 ê kha 手 khah mé--ê, 已經 tńg 來 tī 海 kîⁿ kā lia̍h--tio̍h ê 魚 á 裝箱, tòa 附近 ê 人 ē 直接 tī chia 買魚 á.
「Aih~ au 3 冬 tō 為 tio̍h 今 á 日, 總算結束--a.」A-lân thò͘ 1 口氣, bē-su beh kā chit 3 冬 ê ut-chut 借 chit 口 khùi chò-hóe tháu-pàng--出-來.
「想 bē 到有 iáⁿ 結束--a neh, 感覺 ká-ná 有 siáⁿ-mih mi̍h 件 ùi 身軀內底無--去.」Siù-bí 接續 A-lân ê 話尾講--落-去.
