有1種感動
有i ê溫度
有i ê氣味
Tī平靜ê生活內底
一直來來去去
立春了, 真冷ê雨水漸漸á落tī蘭陽平原tú播了ê ng-á頂, 落chi̍t chūn hioh chi̍t chūn, 落kah無暝無日, 落kah hō͘人lán-si, hō͘人ià-siān, 落kah開闊ê田園tiām-chih-chih, chhan像睏--去-loh!
外口稻埕tâm-kô͘-kô͘, 內面tâm濕濕. 讀小學ê蘭--á kap厝邊隔壁ê gín-á chông無路, chhan像chi̍t tīn hông關tī籠á底ê猴san-á, tī厝內滾地龍, peh chiūⁿ peh落, 無chi̍t時閒. 滾kah tng jia̍t, 蘭--á ê a母tì笠á chhēng雨moa kap hia-kóng, hiông-hiông出現tī窗á門kha, tùi廳內探頭, kā ta̍k-ê驚chi̍t-ē.
「蘭--á, lí去寮á hia等--góa.」老母用真pháiⁿ ê口氣kā hoah.
「O͘h! 好--lah!」蘭--á gāng--chi̍t-ē chiah kā in老母應.
其他ê gín-á ta̍k-ê lóng看蘭--á, hoah chi̍t聲長長ê「Hô͘--ò͘.」, chhan像蘭--á一定koh慘--a, in lóng mā知in a母kiàn-pái若叫--i, 絕對無好khang--ê.
蘭--á頭lê-lê, 門phah--開, chhián-thoa chhēng--leh, tō ùi bîn-chîⁿ-kha (gîm-chîⁿ-kha) chheⁿ-kông行tùi寮á去. 蘭--á有tām-po̍h-á煩惱, i siōng驚in a母神秘神秘kā吩咐, kiàn-pái a母若單獨叫i面談ê時, tō是i準備beh hō͘罵chi̍t tǹg粗飽, 橫直皮ài peⁿ khah ân--leh.
外口koh teh落雨, 天色烏陰烏陰, tâm濕濕ê空氣. 蘭--á ku tī寮á口, 雙手mo͘h tī胸坎, 無聊gia̍h頭tiām-tiām看雨落tī竹葉頂, 落tī厝尾頂, 落tī稻埕頂, 滴滴tap-tap. Tng看kah gōng神ê時, 聽tio̍h in a母ê hia-kóng聲, ùi後piah溝行--入-來. 蘭--á看tio̍h in a母雙手khǹg tī腹tó͘ iap 1包mi̍h-kiāⁿ tī雨moa內底, 行óa蘭--á身軀邊, ku--leh, kā用kúi-ā iân薄薄ê日子紙包ê mi̍h-kiāⁿ phah--開, oah! 是2粒燒hut-hut ê sa̍h卵neh!
「Sa̍h 2粒卵hō͘ lí做生日, 今á日chiaⁿ月12, lí ê生日.」In a母頭lê-lê, chia-mi (liam-mi) peh卵chia-mi (liam-mi)講. In a母koh tī褲袋á內, phián出用半張日子紙包ê 1 chhop鹽, khǹg tī thô͘-kha. 蘭--á tú-chiah ê驚惶kap不安, chit時變做有tām-po̍h-á kiàn-siàu kap pháiⁿ-sè.
「緊chia̍h, 緊chia̍h, hō͘其他ê兄弟姊妹看--tio̍h, tō koh oan-ke落大債.」In a母kā peh好ê卵ùn鹽了, tu來蘭--á ê面頭前, 蘭--á ùi in a母冷ki-ki ê手--nih, 接過燒hut-hut tú peh好ê卵, tiām-tiām看in a母頭頂tì ê笠á koh teh滴水.
In a母看蘭--á chia̍h kah真有滋味, ka-tī khè卵殼內iáu有tām-po̍h ê卵白來chia̍h. 2母á-kiáⁿ tō án-ne ku tī thô͘-kha chia̍h雞卵.
「A母, lí mā chia̍h 1粒.」 Ku tī邊--á ê蘭--á, 看in a母連卵to m̄甘chia̍h, the̍h另外1粒beh hō͘ in a母chia̍h.
「生日生本ài chia̍h 2粒, nah有chia̍h 1粒--ê.」In a母笑笑kā應.
Chia̍h了, in a母kā卵殼收收--leh, iap-kha iap手行tùi後piah溝--去. 蘭--á tiām-tiām看落tī稻埕頂ê雨, 今á日ê雨ē永遠落tī i chi̍t世人ê記tì內底.
留言列表
