台灣組合

今á日chái-khí上班, 經過ta̍k工ài行--過ê幼稚園門口, hn̄g-hn̄g tō聽tio̍h gín-á大聲哀叫ê哭聲, 1 ê趕beh上班ê爸爸, 頭mā無oa̍t tō ùi幼稚園緊行--出-來, chit-chūn hông留tī幼稚園內底ê gín-á, 看tio̍h爸爸走--去ê身影, i ê哭聲jú hiông jú大聲. 親目chiu看tio̍h chit 1幕, hiông-hiông想tio̍h ka-tī éng-kòe mā bat án-ne, 原來tī台灣, 大人一直用粗魯koh暴力ê方式teh傷害gín-á ê心靈.

Cha-bó͘-kiáⁿ ê暗影

Cha-bó͘-kiáⁿ 4歲ê時, 無koh hō͘奶母chhōa, 換試讀khiā-ke附近ê幼稚園, 過團體生活. Tō ná像大多數ê gín-á, tī無se̍k-sāi ê環境, 面對chheⁿ-hūn ê人, 接觸經驗外ê tāi-chì, 會不止á無適應, cha-bó͘-kiáⁿ ta̍k工beh去學校chìn前tō一直chiok不安, thèng-hāu到學校門口i tō開始哭, 需要一直安tah, 甚至tio̍h kap i chò-hóe入去教室陪--i, i chiah願意入--去.

Tō án-ne陪i讀kúi工了後, ē記得ká-ná第5工ê時, hoān-sè幼稚園認為góa ta̍k工tī教室陪cha-bó͘-kiáⁿ, 顛倒hō͘ cha-bó͘-kiáⁿ無法度khah緊適應學校, hit 1工園長竟然tī大門口無tiuⁿ-tî tō ùi góa chia kā cha-bó͘-kiáⁿ hiông-hiông抱--去, 無chhap cha-bó͘-kiáⁿ驚人ê哭聲, 園長kā想beh liòng--開ê cha-bó͘-kiáⁿ ngē抱tiâu--leh, ná走ná oa̍t頭kā góa講無問題, i來處理, koh叫góa趕緊離開, 了後i緊跑入去教室. Góa m̄知beh án-chóaⁿ反應, tī幼稚園門口khiā chi̍t-ē-á, chiah ta̍uh-ta̍uh-á駛車離開, 心內chiâⁿ不安.

Boeh暗á去接cha-bó͘-kiáⁿ ê時, 園長kā góa講:「Chái-khí抱--入-去了後, cha-bó͘-kiáⁿ ná哭koh ná chhoah ka-tī ê頭毛, 個性chiâⁿ ngē!」Góa完全m̄知影1 ê 4歲ê gín-á, 竟然ē用chiah-nī失控koh暴烈ê方式來傷害ka-tī, chiah有thang表達i ê憤怒! Chit ê tāi-chì góa一直khǹg tī心內, 驚對gín-á產生暗影. 10冬後, 有1 pái kap cha-bó͘-kiáⁿ khai-káng ê時講tio̍h chit項tāi-chì, i講hit工chái-khí tī幼稚園發生ê tāi-chì i記kah chiok清楚, mā ē記得ka-tī有出力chhoah頭毛, i講he是i siōng傷心ê tāi-chì之一. 天ah! 因為大人ê粗魯對待, soah造chiâⁿ gín-á久長ê暗影!

今á日chái-khí, koh 1 pái看tio̍h kāng款ê畫面, 心內iáu是chiâⁿ艱苦. 對大人來講, kan-taⁿ是短短kúi點鐘ê分離, m̄-koh gín-á感受--tio̍h-ê, soah是hông pàng-sak ê驚惶kap不安.

Siáⁿ-mih是自由? Tī人生中, lán thang自由選擇--ê有siáⁿ? 語言使用kám是其中1項? Iah是lán kioh是ē-tàng自由決定ê tāi-chì其實oan-na是受tio̍h限制--ê? Gín-á beh講siáⁿ-mih款語言kám是gín-á ka-tī決定--ê? Iah是大人提供ê選擇?

Beh tī充滿禁忌kap限制ê社會體制內底, beh hō͘ gín-á自由自在發展, 大人tio̍h keng出jōa大ê空間? 對抗--ê是siáⁿ? Gín-á若是無大人thèⁿ-tiâu--leh, beh án-chóaⁿ生出獨立自主ê能力? Beh án-chóaⁿ面對食人ê體制? Gín-á ê心靈是siōng-kài敏感--ê, 大hàn行chhoa̍h--去ê人生, kiám-chhái是細hàn時無得tio̍h夠額ê照顧kap尊重, chiah tio̍h ka-tī走chhōe安慰.

新ê 1年, 祝福ta̍k-ê有新ê體驗kap收成.

什麼是自由？在人生中，我們可以自由選擇的有什麼？語言使用是其中一項嗎？或者是我們以為可以自由決定的事情其實也是受到限制的？孩子要講什麼語言是孩子自己決定的嗎？還是大人提供的選擇？

要在充滿禁忌與限制的社會體制內，要讓孩子自由自在發展，大人必須撐出多大的空間？對抗的是什麼？孩子如果沒有大人撐住，要如何長出獨立自主的能力？要如何面對吃人的體制？孩子的心靈是最為敏感的，長大後走偏的人生，或許是小時候沒有得到足夠的照顧與尊重，只好自行走尋慰藉。

Lán出門kap lí ê gín-á伴共學chhit-thô ê時, lín thǹg赤腳tī公園內底走跳, chhiâng-chāi ē tú tio̍h邊--á ê gín-á講:「In真無禮貌.」

Lín tī樹林á iah草埔ó͘ thô͘ sńg沙á, mā不時ē有人勸講án-ne ó͘ kah 1 khang 1 khang, ē害人行路poa̍h-tó, m̄-thang hō͘ gín-á án-ne sńg.

若有水khut-á, lín koh-khah歡喜, tiāⁿ-tio̍h sńg kah kui身軀tâm-lok-lok, sûi tō有人hoah講:「Lóng無照規矩, pàng hō͘ gín-á o͘-peh sńg.」

Lín tī公園khioh樹oe iah是葉á sńg, mā tiāⁿ-tiāⁿ有人ē阻擋, 講án-ne lah-sap無chheng-khì.

Tī公共便所hō͘ gín-á使用khah ke ê水槽á洗手, mā ē有人lé講:「水滴kah kui thô͘-kha, lín nah pàng hō͘ gín-á來chia sńg水?」

前kúi工á tī報紙面頂看tio̍h施明德寫了1篇文章, 題目是〈英靈kap冤魂〉, i寫講, 北京kā tī台灣因為支持共產黨soah hō͘中華民國統治集團chhèng-sat ê人, chhāi 1支「無名英雄碑」, 施明德看過chiah-ê人hông chhèng-sat chìn前大聲hoah「共產黨萬歲」, 北京替chiah-ê人chhāi石碑記念, ná像chiâⁿ受tio̍h施明德肯定.

M̄-koh góa soah感覺有問題, 問題tō是: 當年hō͘中華民國統治集團chhèng-sat ê人, 大部份lóng有名有姓, 查hō͘清楚chiah chhāi碑, kā名刻--起-lih chiah tio̍h ā, 是án-chóaⁿ北京無án-ne做? 政治現實, chhāi記念碑是teh應付niâ, 中國共產黨早tō無需要chiah-ê人ê故事來做政治宣傳--loh!

施明德chit篇文章另外1段講--tio̍h, i講i親目chiu看tio̍h 228事件台灣人主動參與反抗軍隊來戰死, 所以i對228受難家屬一直提出質疑, 是án-chóaⁿ kā受難者講做是冤枉死--ê, thang好去領補償金?

Góa ka-tī mā bat寫過chit款ê文章, 提出chit款質疑當然是應該--ê, m̄-koh真怪奇, 是án-chóaⁿ施明德kan-taⁿ質疑228受難家屬, 是án-chóaⁿ無去質疑美麗島事件i hit-kóa同志? 是án-chóaⁿ無質疑i ka-tī認中華民國chit ê賊做父? 施明德siōng愛講「權力hō͘人腐化」, m̄-koh 228受難家屬無掌握權力, 是án-chóaⁿ mā腐化--a?

Góa認為, 體制hō͘人腐化, 腐化ê人kan-taⁿ ē kéng符合ka-tī需要--ê去做, 北京是án-ne, 228 hit-kóa衰尾道人ê後代mā án-ne, 施明德tō koh-khah m̄免góa koh ke講--a.

Kám beh相信? Lán已經se̍k-sāi超過37冬--a, ē-tàng kap lí做國校, 國中, 高中ê同學, 有影是chiok大ê緣份kap福氣. Lí kap lín tau ê人, 是góa se̍k-sāi siōng-kài善良koh溫和ê家庭, lí chéng tio̍h lín a母, 有siōng-kài溫馴ê個性kap善良ê心. 多謝lí, 總--是聽góa一直講thi̍h bē soah. 多謝lí, 讀國中, 高中了後, koh ta̍k工來goán tau等--góa, 有tú時á góa khùn過頭, piān-nā聽tio̍h goán a母tī樓kha樓梯頭hoah 1聲:「A鳳, A如來--a!」Góa tō ná像hông電--tio̍h, sûi peh--起-來, kā制服chhēng好, kap lí chò-hóe騎腳踏車去學校, tō án-ne lán tàu-tīn騎6冬.

Ē記得國校一年ê時, 有1 pái lí買1條pûn泡泡--ê (tn̂g-ko形), lí chiâⁿ a-sá-lih借góa pûn, m̄-koh góa soah thiau-kang kā kui條lóng chek-chek--出-來, lí tī邊--á看kah lóng gāng--去, kiōng-beh哭--出-來, góa soah koh chiâⁿ iāng想beh替lí pûn 1粒chiok大粒ê泡泡, 出力pûn kah kui面lóng漲紅--去, 是講泡泡pûn kah 1半tō破--去, lí chiok siūⁿ-khì oat--leh tō走入教室, hit-tang-chūn góa知影ka-tī做m̄-tio̍h tāi-chì, soah m̄知beh án-chóaⁿ處理. 一直到放學行路隊, beh經過lín tau竹林後piah ê田岸路ê時, hn̄g-hn̄g tō看tio̍h lín a母kā teh哭ê lí抱tiâu--leh, teh等góa行--過-去, lín a母講:「Goán秀如身體無好, lí mài欺負goán秀如......」聽tio̍h lín a母khiā tī青lèng-lèng ê竹林腳, 隔1區結穗kah黃gìm-gìm ê田án-ne kā góa講, góa kā頭àⁿ kē-kē, lóng m̄敢taⁿ頭看lí kap lín a母, kan-taⁿ頭lê-lê顧leh緊行--過, hō͘ lín a母ê聲留tī kha-chiah後, thèng-hāu聲音jú來jú hn̄g, góa chiah緊走tńg厝. Sui-bóng lín a母teh罵--人kap phiàn gín-á ê聲sàu是kāng款輕koh溫柔, chi̍t-sut-á tō bē pháiⁿ, m̄-koh góa有影hō͘ i chhoah--tio̍h, 後--來góa m̄-bat koh欺負phēng góa khah細hàn--ê, 人生無行chhoa̍h--去, 無的確koh tio̍h感謝lín a母hit-tang-chūn溫柔對góa講ê話leh!

Sui-bóng有chit-pái ê事件, lán kui-ê國校期間iû-goân是黏chò-hóe, 原因是lí siuⁿ好欺負--a (àⁿ頭懺悔). Hit-chūn一二年讀半工, 放學了後, chia̍h飽tàu góa tō ē走去lín tau寫功課, ta̍k工準時去lín tau報到, lín a-má看tio̍h góa tō ē hoah:「A如, 玉鳳來chhōe lí--a!」Hit-chūn góa ta̍k工to tī lín tau出出入入, 自在koh歡喜, 親像無受約束ê野gín-á. Gín-á時ê記tì--nih, lóng是góa去lín tau chhōe lí sńg, lí ná像無來過goán tau. 奇怪, 像góa án-ne 1 ê有sió-khóa Asperger's syndromeê gín-á, nah ē kap 1 ê有sió-khóa Kanner's Syndromeê gín-á sńg ē起--來? Koh sńg kah不止á和樂, 一直sńg到chit-má, 徹底phah破『物以類聚』chit句話.

細hàn時chūn lí tiām靜koh sán, 身體無勇, m̄-koh lí soah chiok gâu畫塑膠ê冊thiap-á頂ê bàng-kah人物,『三隻小豬』,『小英的故事』,『龍龍與忠狗』,『小甜甜和安東尼』, 連紙ang-á lí to有法度ka-tī畫, chiah koh the̍h chit-kóa ka-tī畫ka-tī做ê紙ang-á sńg pān-kong-hóe-á. Lán mā chhiâng-chāi phak tī lín tau ê埕, khioh紅磚á khà--落-來ê磚á角, 2 ê gín-á-phí tō tī thô͘-kha畫--起-來. 有tang時á lán mā ē sńg bih-sio-chhōe, tī lín tau ê大竹圍, poa̍t-á樹, 蓮霧樹, kap hit口ē-sái sńg水chhèng ê水井走sio-jiok, lín tau ta̍k sì-kè lóng有lán做gín-á時chò-hóe sńg ê影jiah.

Hō͘人m̄甘--ê是, 今年2013年秋天, lí用Line kā góa講lín舊厝hō͘ 怪手thiah掉ê消息, lí koh講lí有khioh 1 tè舊厝ê厝瓦做記念. Góa應lí講: He是充滿lángín-á時記tì ê所在ah! Hiông-hiông感覺ka-tī gín-á時ê記tì mā hông thiah掉--去! 是án-chóaⁿ美好ê tāi-chì總--是bē久長? 庄腳ê老大人kám m̄是siōng惜情--ê? 舊厝無--去-a, 相信惜情ê lí心內一定mā chiâⁿ無奈ho͘ⁿh! Góa南部厝--nih ê相簿內底, iáu有1張lán大hàn了後tī lín tau poa̍t-á樹腳hip ê相片, góa ē好好á珍惜chit張有lín tau舊厝做背景ê相片.

Dear同學

國校出業到taⁿ, 已經30 kúi ê kôaⁿ--人過--去, 前2 pái辦ê同窗會, 是tī lán 18歲kap 28歲hit時, 聽講lí lóng熱情參加, 出chîⁿ出力, che是lí ê男兒本色. 看tio̍h chìn前留--落-來ta̍k-ê tàu-tīn hip ê相片, lí笑kah chiok燦爛chiok純真--ê, chiâⁿ phah-sńg, góa lóng礙tio̍h某種鬱卒憂悶ê情緒bih--起-來. Ka-chài 43歲ê今年kôaⁿ--人, lán總算辦第3 pái ê同窗會, m̄-koh, 同學, lí soah永遠欠席lán玉田國小第34屆孝班ê同窗會.

今年ê同窗會, chiok chē人lóng是出業30冬後chiah頭1 pái見面, cha-po͘--ê lak漆kan-taⁿ來4 ê. 步入中年ê同學, 外表身材甚至聲音lóng變chiok chē, ta̍k-ê kek頭腦, ná chia̍h白果ná phah-piàⁿ回想, chiah ē-tit-thang kā國校6冬ê記tì tàu-tàu--出-來, 有歡喜mā有哀愁. 同學, lí若有來, 氣氛應該ē koh-khah high! Lí ê làu-khùi-tāi siōng chē, 活潑愛lāu-jia̍t ê lí, 一定ē tńg來kap goán tàu-tīn. 同學, 相信lí有tńg來kap goán同在! 同窗會了後, goán照常去看班長, i kāng款斯文ian-tâu, kan-taⁿ是身體iû-goân無勇, 班長ê身體kap心靈承受ê折磨kap苦疼, 相信lí siōng ē-sái體會, m̄-koh lí無thang koh hō͘ i安慰鼓勵--a.

同學, 想bē到lán tō án-ne tī同窗會sio閃身, bē koh sio-tú. 安慰--ê是, 1997年góa tńg宜蘭做社區營造khang-khòe ê時, tú tio̍h kāng款tńg故鄉ê lí, lí ê gín-á面kap好笑神lóng無變, tō kap國校時chūn kāng款, chi̍t看tio̍h lí tō認--出-來-a, chi̍t點á to無sêng chhit-thô chiok久ê老大--ê, lí kám有影bat chhit-thô--過?

Hit-tang-chūn lán beh tī玉田村成立巡守隊, lí mā熱心參與所有過程, iáu是kāng款phok-kiat gâu kek-khoe-hâi. 巡守隊成立大會hit工, chi̍t開場tō是lí ê節目, lí tī後台面色白sún-sún kā góa講:「同學, góa緊張kah tih-beh死--去-a! 腳手phi̍h-phi̍h-chhoah~」Góa假影放輕鬆kā lí安tah講:「妥當--lah! 免驚--lah! 同學, 小casse--lah!」其實góa心內OS: 若換做是góa, beh tī全部是看ka-tī大hàn ê鄉親面頭前演出, góa可能ē昏--去. M̄-koh lí chi̍t chiūⁿ場, 有影轟動武林, 驚動萬教, 鄉親ê笑聲kap pho̍k-á聲lóng無停. Gâu kek-khoe-hâi ê lí, chhēng棕簑, tì瓜笠á, 手kòng鑼á, poaⁿ古早時tī暝--nih巡邏ê人, ná kòng koh用lí ê台灣國語大聲hoah『天乾物燥, 小心火燭』, 『天乾物燥, 小心火燭』, se̍h kui-ê會場, 氣氛tō án-ne hō͘ lí炒kah chhiâng-chhiâng滾.

先來分享goán kiáⁿ ê語言使用發展.

A-siâng是母語家庭大hàn ê gín-á, chēng細hàn到taⁿ goán m̄-bat kap i講過1句華語, tńg a公a-má tau, 親人mā lóng講台語, 若tú tio̍h有人「無sè-jī」puh 1句華語, tō有人ē跳出來講:「In chit ê是講台語--ê, lí講中國話i聽無--lah.」

A-siâng大隻雞慢啼, 2歲chiah開始「講話」(意思是goán開始聽有i講ê語詞), 續--落1段chiok長ê時間, kan-taⁿ goán ang-á-bó͘ chiah聽有i teh講siáⁿ, 總--是有tú時á oan-na ē聽無ioh無. 到kah i 3歲ê時, 親人koh有chhiâng-chāi見面ê朋友mā開始聽有i臭奶呆ê台語. Taⁿ, i 3歲7個月--a, 全台語使用, 濁音, 介音, kap “tu” ê音iáu發無, 講話iû-goân是臭奶呆.

A-siâng 2歲5個月ê時參加假日共學(2禮拜1 pái), 2歲9個月ê時參加平日共學(1禮拜2工), 開始有長期koh固定ê gín-á伴. Gín-á ê口語能力tng teh發展, 大人lóng ē替gín-á做通譯, m̄-nā是翻譯話語, koh有行為動作. 除去語言, gín-á koh ē透過動作, 表情, 聲調變化, 情境來溝通, tī細hàn gín-á chit ê階段, 話語往往m̄是siōng優先ê交際互動能力, chiah ē, gín-á sui-bóng話語bē通, iáu是有法度sńg tàu-tīn.

共學團chiâⁿ大部份家庭是用華語做第1語言. A-siâng 3歲ê時, i iáu聽無華語, ta̍uh-ta̍uh-á, ùi聽無, 到半ioh有, 到開始o̍h人講kúi ê華語詞, 可比講『不要』. 到taⁿ, i完全聽有共學成員講ê華語--a, tī厝mā ē ka-tī se̍h-se̍h念1句接1句ê華語, 有tú時á koh ē用華語應--人. I感覺o̍h i ê朋友講話chiok好sńg--ê.

[活動放送]

今年siōng尾pái ê北區親子共學團父母教養實踐班, 12/28-29 beh tī板橋忠孝公園活動中心舉辦, 招收對象主要針對有意願參與「平日共學團（週一四或週二五）」「農學生活團（週一三五）」以及「假日共學團」的家庭. 歡迎大家參加, 報名簡章請見社團法人台灣親子共學教育促進會.

[目錄]

好滋味ê咖哩／美味咖哩@ Phek-iàn

2013/9共學記錄／Tōa-thâu-liân

似曾相似的大埔事件／A-ka

楊碧川編著《世界史》出版

Tī樹á-kha sńg沙á ê時, A森the̍h i ê車ùi A-siâng ê沙á面頂kauh--過, A-siâng bē爽kā phah. 第1時間góa無看--tio̍h, 聽tio̍h A-siâng大聲jiáng góa chiah óa--過. 另外1 ê m̄是共學團ê gín-á mā óa來beh sńg沙á, A-siâng出手kā擋boài hō͘人加入, 對方ma-ma對A-siâng講:「Lí bē-sái出手phah--人!」Góa請i hō͘ gín-á ka-tī去互動. 對方ma-ma sûi siūⁿ-khì講:「Tú-chiah lí ê gín-á kā人phah, koh phah kah chiok大力--ê, m̄-koh lí lóng無處理!」是指責koh m̄敢相信ê口氣. Góa:「"處理"無一定現ài tī tāi-chì發生chit-ē ā, gín-á m̄是chi̍t開始tō ē-hiáu用講--ê, in需要練習, che tō是過程ā.」對方:「Góa知影有1派是lín chit款做法, góa mā知影ka-tī ài koh-khah放手, m̄-koh góa bē hō͘ góa ê gín-á hông phah, lán互相尊重無kāng款ê教養方式.」 

了後, hit ê弟弟iáu是beh óa來sńg沙á, in ma-ma kā講:「He是hit ê哥哥teh sńg--ê, i無愛hō͘人sńg, lí m̄好kā i用, lán來去邊--á sńg.」「若是有人beh kā lí phah, lí ài緊走, koh kā i講bē-sái phah--人.」 

Chit件tāi-chì, hō͘ góa思考chiâⁿ chē. 

A-siâng ē出手phah--人, lóng是i teh「顧地盤」ê表示, 若是有人óa--來, iah是the̍h i ê mi̍h-kiāⁿ, i chhiâng-chāi ē大聲jiáng iah是出手sak--人e--人phah--人, i借án-ne ê動作beh kā對方趕走嚇驚走. 

Gín-á chit款反應行為, 是生物本能, bē-tàng講是暴力. 

大多數台灣人認知的世界，往往只有美國和中國，我們對世界歷史的理解，也同樣只有美國或中國統治者觀點的歷史認識。

楊碧川以數年時間編寫了一部《世界史》，希望給我們的下一代有更廣闊的世界觀與歷史觀，全文約60萬字，分為（上）、（下）兩冊，共542頁（A4）。

本部《世界史》於2010年7月25日完稿。世界仍繼續運轉，世界史也同樣尚未結束，楊碧川仍持續地書寫，往後將陸續上網供各位補充、更新。

若需要這本《世界史》（上、下兩冊），影印工本費600元，請寄e-mail到taioan.chouhap@gmail.com與我們聯絡，或郵政劃撥「帳號：19607424，戶名：陳德樺」，並請註明郵寄地址。

[目錄]